18/04/2026
Our king. The legend!
Norman Hill mill-Belt Valletta, magħruf ukoll bħala “Iċ-Ċiċċo” għadu kemm ġie rikonoxxut għas-sehem kbir tiegħu fil-qasam artistiku u kulturali, partikolarment dak tal-Karnival ta’ Malta, fejn għal għexieren ta’ snin ipproduċa wħud mill-isbaħ karrijiet. Għal dan il-għan, il-Kunsill Lokali onorah b’Ġieħ il-Belt Valletta, f’ċerimonja fl-aħħar jiem.
L-unur, l-akbar wieħed fil-lokalitajiet, jenfasizza l-kontribut li Hill għamel matul is-snin, partikolarment fil-ħolqien u l-promozzjoni ta’ attivitajiet li għaqqdu lill-komunità Beltija.
Permezz tal-ħidma u t-talent artistiku tiegħu, Hill irnexxielu jsaħħaħ żewġ elementi li huma għal qalb il-Beltin – il-Karnival Malti u ċ-ċelebrazzjonijiet marbuta mat-tim tal-Belt.
Dawn l-avvenimenti, kemm fil-Grawnd f’Ta’ Qali kif ukoll fit-toroq tal-kapitali, huma magħrufin għall-atmosfera vibranti tagħhom bi żfin, kant, kostumi u karrijiet trijonfali.
Ir-rikonoxximent liċ-“Ċiċċo” wasal bl-appoġġ tas-Sindku Olaf McKay, il-Viċi Sindku Alfred Zammit u l-Kunsillieri Ray Azzopardi, Ylenia Montfort, Roberta Bonello u Vince Fabri, Daniel Diacono.
