09/08/2026
မြင်အပ်၊ မမြင်အပ် (အပိုင်း-၁၇)
+++++++++++++++++++++
နောက်ထပ်ထူးဆန်းသည့် ဖြစ်စဉ်အချို့ကို မူးယစ်ဆေးဝါးပပျောက်ရေး အထိမ်းအမှတ်ပြတိုက်တွင် ကြုံတွေ့ဖူးသေးသည်။ တည်နေရာမှာ ကမာရွတ်မြို့နယ်၊ ဟံသာဝတီလမ်းနှင့် ကျွန်းတောလမ်းထောင့်တွင်ရှိသည်။ ပြတိုက်အဆောက်အအုံအား ၁၉၉၈ ခုနှစ်တွင် စတင်ဆောက်လုပ်၍ ၂၀၀၁ ခုနှစ်၊ ဇွန်လ(၂၆) ရက်နေ့ စတင်ဖွင့်လှစ် ခဲ့ခြင်းဖြစ်သည်။
အဆိုပါ မူးယစ်ပြတိုက် အဆောက်အအုံ၏ သက်တမ်းမှာ ၂၅ နှစ်ခန့်သာ ရှိသေးသော်လည်း၊ အဆောက်အအုံ ဆောက် လုပ်ထားသည့် မြေနေရာမှာမူ ရန်ကုန်မြို့၏ ရှေးအကျဆုံး အထင်ကရ မြေနေရာတစ်ခု တွင်တည်ဆောက် ထားခြင်းဖြစ်၏။ ယင်းမြေနေရာမှာ ကြံတောသုဿာန် မြေနေရာဟောင်းပင်ဖြစ်သည်။ ယခင်က ရန်ကုန်မြို့တွင် ကြံတောသုဿာန်နှင့် တာမွေသုဿာန်(၂)ခုသာရှိပြီး၊ အဝန်းအဝိုင်း ကြီးမားသည့် ကြံတောသုသာန် အား အသုံးပြုမှု ပိုများသည်။ ယင်းသုဿာန် မြေနေရာဟောင်းအနက် ၁၅.၁၁ ဧကအကျယ်အား မြေရှင်း၊ မြေသန့် ပြုလုပ်ခဲ့ပြီး မူးယစ်ပြတိုက် တည်ဆောက်ထားခြင်းဖြစ်သည်။
ငယ်စဉ်က ရပ်ကွက်အတွင်း နာရေးဖြစ်၍ ကြံတောသုဿာန်သို့ လိုက်ပါပို့ဆောင်လျှင် ကုက္ကိုပင်ကြီးများ အုပ်ဆိုင်းနေသည့် နေပြောက် မထိုးသော သင်္ချိုင်းမြေကို မှတ်မိသည်။ ယခု လုပ်ငန်းခွင်ဝင်သည့် အရွယ်မှ အလုပ် တည်နေရာမှာ မူးယစ်ပြတိုက်တွင် ဖြစ်၍ ဒုတိယမ္ပိ ထပ်မံရောက်ခွင့်ကြုံရသည်။ မူးယစ်ပြတိုက် ဝန်းထဲတွင်လည်း အရိပ်ရပင်၊ သီးပင် စားပင်၊ ပန်းအလှပင်စသည့် အပင်ကြီးငယ်စုံလင်လှသည်။
ပြတိုက်အဆောက်အအုံမှာ သံကူကွန်ကရစ် ၃ ထပ်ခွဲ အဆောက်အအုံဖြစ်ပြီး ခန့်ညားထည်ဝါစွာ ဆောက်လုပ်ထားသည်။ အထပ်တိုင်း၏ ကြမ်းပြင်နှင့် မျက်နှာကျက်အကွာအဝေးမှာ မြင့်မားသည့်အပြင် အလယ်တွင် ကွက်လပ်ချန်ထားပြီး အတွင်းဝရန်တာပတ်လည်ဖြင့် လေဝင်လေထွက်ကောင်းမွန် စေရေးအတွက် တည်ဆောက် ထားပုံရသည်။ ၃ ထပ်အပေါ်တွင်မှ ပတ်လည်ထပ်ခိုး တစ်ထပ်ထားရှိပြီး၊ စတင်ဖွင့်လှစ်စဉ်က စာကြည့်တိုက်နှင့် သက်ဆိုင်ရာ Sector အလိုက် ဌာနဆိုင်ရာ ရုံးခန်းများ ထားရှိခဲ့သည်။
အဆိုပါရုံးခန်းများ အသုံးမပြုတော့သည့် နောက်ပိုင်းမှ ထပ်ခိုးရှိ အခန်းကျယ် တစ်ခန်းအား မိမိတို့ရုံးခန်း အဖြစ် စတင်ဖွင့်လှစ်ဆောင်ရွက်ခဲ့ကြသည်။ ဝန်ထမ်း(၈)ဉီးခန့်ဖြင့် အနယ်နယ်အရပ်ရပ်မှ မူးယစ်ဆေးဝါးဖမ်းဆီးမှု သတင်းအချက်အလက်များအား ကွန်ပျူတာတွင်း ထည့်သွင်း၍ Analysis ပြုလုပ်ပေးရသောဌာနစိတ် တစ်ခုဖြစ်သည်။ (ယခုထိုနေရာတွင်မရှိတော့ပေ။) လိုအပ်သည့် နည်းပညာနှင့် စက်ကရိယာများအား ဩစတြေးလျရဲတပ်ဖွဲ့(AFP)မှ ကူညီပံ့ပိုးပေးခဲ့သည်။
တစ်ရက် ဩစတြေးလျသံရုံးမှ ဇနီးမောင်နှံ ၂ ဉီးတို့ ရုံးသို့ အလည်အပတ်ရောက်လာသည်။ ထိုစဉ် မိမိတို့ ရုံးခန်း နံရံတဖက်ရှိ စင်တစ်ခုပေါ်၌ ဘုရားပုံတော် ကားချပ်တခုတင်ကာ သောက်တော်ရေခွက်နှင့် ပန်းအိုးတစ်လုံး ဆပ်ကပ် ပူဇော်၍ ဘုရားစင်ပြုလုပ်ထားသည်ကို မြင်၍ ခင်ပွန်းဖြစ်သူ သံမှူးက-
“ဘုရားပုံကားချပ်ထက်စာလျှင် ဘုရားဆင်းတုတော်ထား၍ ပူဇော်လျှင်ပိုမကောင်းဘူးလား?” ဟု မေးမြန်း သည့်အပြင် ထားလိုက သူမှလှူဒါန်းလိုကြောင်း ပြောလာသည်။ သံမှူး၏ ဇနီးဖြစ်သူမှ လည်း “ပဲခူးက ဘုရားကြီးစောင်းတန်းမှာ ပန်းပုဆိုင်တွေရှိတယ်၊ လက်ရာကောင်းတယ်၊ အဲဒီမှာ သွားဝယ်ကြမယ်လေ” ဟုဆိုပြန်သည်။ “ဆင်းတုဝယ်ပြီးရင် ဘာလုပ်ပေးဖို့လိုသေးလဲ?” ဟုလည်းမေးလာသည်။
မိမိမှ သူတို့အား ပြန်ရှင်းပြသည်။ “ဆင်းတုတော်ဖြင့် ပူဇော်လျှင်ပိုကောင်းပါတယ်၊ ဒါပေမယ့် အစဉ်အလာအရ ရဟန်းသံဃာများပင့်ဖိတ် ဘုရားအနေကဇာတင်ပွဲ အခမ်းအနားပြုလုပ်ဖို့လိုသေးတယ်၊ နို့မိုဆို ရုပ်တုတစ်ခုအနေဖြင့် သာ ဖြစ်လိမ့်မယ်” လို့ရှင်းပြတော့၊ ဩစတြေးလျလင်မယား ၂ ဉီးစလုံးမှ ဘုန်းကြီးဆွမ်းကပ်ခြင်းမှ အစ၊ အနေကဇာတင်ပွဲ ကျွေးမွေးဧည့်ခံစရိတ်များပါ လှူဒါန်းပါမည်ဟု စိတ်အားထက်သန်စွာ ကမ်းလှမ်းလာ၍ လက်ခံ လိုက်ပြီး စီစဉ်ကြသည်။
ဤနေရာတွင် ဘုရားစင်အား ပုံတော်ကားချပ်ဘဲထားရသည့် အကြောင်းကလည်းရှိပြန်သည်။ မိမိရုံးခန်းတွင် မက ဝန်းအတွင်းရှိ အုပ်ချုပ်မှုဆောင် အဆောက်အအုံတွင်လည်း အလားတူ ဘုရားပုံတော် ကားချပ်သာ ပူဇော်ထားရှိသည်။ အဘယ့်ကြောင့်ဆိုသော် ဘုရားဆင်းတုကိုးကွယ်လျှင် အနေကဇာတင်ရမည်။ အနေကဇာတင်လျှင် ဘုန်းကြီးပင့် ရွတ်ဖတ် သရာယ်ဇယ်ရမည်။ ထိုသို့ဘုန်းကြီးပင့်မည့်ကိစ္စကို ဝန်လေးမိကြ၍ ဖြစ်ကြောင်း မေးမြန်းသိရှိရ သည်။
ဝန်လေးရသည့် အကြောင်းလည်း ရှိပြန်သည်။ မိမိတို့မရောက်မီ နှစ်ကဖြစ်သည်။ အုပ်ချုပ်မှုဆောင်ရှိ မူးယစ်ပြတိုက်တာဝန်ခံ(ဒုညွှန်မှူး)မှ နှစ်ဆန်း(၁)ရက် နေ့တွင် ဘုန်းကြီးများပင့်၍ အန္တရာယ်ကင်းပရိတ်တရားတော်နာသည်။ တိုက်ဆိုင်၍လားမသိ ထိုသို့တရားနာနေစဉ် မူးယစ်ပြတိုက် အပေါ်ဆုံးထပ် အပြင်နှဖူးစီးတွင် အလှဆင်ထားသော ကြာပန်းသဏ္ဌာန် တစ်ချပ်မှာ “အုန်း”ကနဲ ကွာ၍ကျသည်။ ကြာဖက်မှာ ကြီးမား၍ ကွန်ကရစ်ဖြင့် ပြုလုပ်ထားသဖြင့် မြေပြင်နှင့်ထိသောအသံမှာ ကျယ်လောင်လှသည်။ ယာဖက်ထောင့်မှဖြစ်၍ တော်သေးသည်။ အထိအခိုက်မရှိ။ ထို့နောက်ပိုင်း ဘုန်းကြီးပင့် ရွတ်ဖတ်သရာယ်ဇယ်ရမည့် အလုပ်ကိုမလုပ်ဖြစ် ကြတော့ကြောင်း ရှေ့မှီနောက်မှီများက ရှင်းပြကြသည်။
မိမိအနေဖြင့်တော့ တိုက်ဆိုင်သည်ဟုဘဲ ယူဆသည်။ ကောင်းမှုကုသိုလ်လုပ်၍ မေတ္တာပို့ အမျှအတန်းပေးဝေရုံ ဆိုလျှင် ပြသနာမရှိနိုင်၊ ဘုန်းကြီးထံ လျှောက်ထားသည့် အခါတွင်တော့ လိုအပ်သည့် ညှိနှိုင်းမှု ပြုလုပ်ရမည်ဟု တွေးတောမိသည်။(ဆက်ပါဉီးမည်။)
ခင်မောင်သိန်း
