08/06/2024
မိုးကလည်း တဖွဲဖွဲ ရွာလျက်ရှိသည်
အချိန်ကား ည ၇ နာရီ
ကျွန်တော်လည်း မြန်မာငွေလေးရာကျပ်ကို
ကျစ်ကျစ်ပါအောင်ဆုပ်ထားလျက်
ဘတ်စ်ကားမှတ်တိုင်မှာရပ်နေလိုက်သည်
လမ်းမပေါ်တွင် တဝှီးဝှီးသွားနေကြတဲ့
ကားများအကြား ကျွန်တော့်ရဲ့အတွေးအာရုံလည်း
ပျံလွင့်လျက်…
ကျွန်တော်ပြန်ရမှာက မြောက်ဥက္ကလာပအထိဆိုတော့
YBS 64 ကားကိုစောင့်နေရလေသည်
ဆူးလေမှာ တစ်နေကုန်အလုပ်လုပ်ပြီး
အခုထိအိမ်ပြန်မရောက်သေးဘူးဆိုတာက
ကျွန်တော့်ရဲ့ဝမ်းနည်းစိတ်ကို
လှုံ့ဆော်ပေးလျက်ရှိသည်
ပင်ပန်းမှုတွေကတော့အတိုင်းထက်အလွန်ပေါ့
အများကြီးတွေးနေချိန်မရလိုက်ပါ
ဟော ကားလာပြီဆိုတဲ့အော်သံကြောင့်
တခြားလူများနည်းတူ ကားပေါ်တိုးဝှေ့တက်ရပြန်တယ်
ဒီအချိန်ဆို
ကားပေါ်မှာခုံမရတော့တာကို ကြိုသိနေပေမဲ့
တကယ်တမ်း ခုံမရတဲ့အခါကျ ကျွန်တော့်ရဲ့ပင်ပန်းမှုတွေနှစ်ဆတိုးသွားရပြန်တယ်
ဒါပေမဲ့ ကျွန်တော် မမူနိုင်
အခုအချိန်မှာ အိမ်ပြန်ရောက်ဖို့ကအဓိကမဟုတ်ပါလား…
ကျွန်တော့်ရဲ့အတွေးတွေကလည်း ထပ်ပြီးတော့ပျံလွင့်လာပြန်တယ်…
တကယ်တော့ ကျွန်တော်က ပညာရေးမှာထူးချွန်တဲ့
ကျောင်းသားတစ်ယောက်
ဒါပေမဲ့ ကံကြမ္မာက ကျွန်တော့်ကိုကျောင်းသားပေးမဖြစ်ဘူးထင်ပါရဲ့
တဖြည်းဖြည်း ဆိုးရွားလာတဲ့ နိုင်ငံရေးအခြေအနေနဲ့အတူ ကျွန်တော်တို့မိသားစုရဲ့
ပိုင်ဆိုင်မှုတွေအကုန်လုံးဆုံးရှုံးလိုက်ရတယ်
အိုးမဲ့အိမ်မဲ့ဖြစ်ခဲ့ရတဲ့အချိန်မှာ ကျွန်တော့်အတွက်
ရွေးချယ်စရာက များများစားစားမရှိခဲ့ပါဘူး
ကျွန်တော် ကျောင်းထွက်ဖို့ဆုံးဖြတ်လိုက်တော့တယ်
နောက်ကွယ်ကအမေ့ရဲ့မျက်ရည်စက်တွေကို
ကျွန်တော်မသုံးဖြုန်းရက်တော့ဘူး
အမေကတော့ငိုလျက်ပြောပါတယ်
သားရယ် ကျောင်းပဲတက်ပါတဲ့
သား ပင်ပန်းမှာကိုအမေမကြည့်ရက်ဘူးတဲ့
အို အမေရယ် သားကရော အမေ့ရဲ့မျက်ရည်စက်တွေကို ကြည့်ရက်တယ်ထင်နေတာလား…
ကျွန်တော့်ရဲ့ဆုံးဖြတ်ချက်ကိုကျွန်တော်မပြင်ခဲ့ပါ
ကိုယ်တိုင်ရွေးချယ်ထားတဲ့လမ်းကို ကိုယ်တိုင်လျှောက်နိုင်ဖို့ကြိုးစားခဲ့တယ်
ကျောင်းထွက်တယ် အလုပ်လုပ်ခဲ့တယ်
ရတဲ့လစာကိုအမေ့ကိုအပ်ပြီး သားတစ်ယောက်အနေနဲ့
အမေ့ရှေ့မှာ အလင်းရောင်ထွန်းလင်းပေးနိုင်အောင်
ကြိုးစားနေထိုင်ခဲ့တယ်
ကံကြမ္မာရဲ့နှိပ်စက်မှုကို ကြံ့ကြံ့ခံပြီး
ရင်ဆိုင်ခဲ့ရတာပေါ့
ကျွန်တော်အားမလျှော့ပါ
လောကဓံက ပေးကမ်းလာတာမှန်သမျှကို
ကျွန်တော်တို့လက်ခံရမှာပဲမဟုတ်လား
ကျွန်တော်တက်ခဲ့ဖူးတဲ့ကျောင်းရှေ့ကိုရောက်တိုင်း
မျက်ရည်ကျမိတယ်
သူငယ်ချင်းတွေကိုမြင်တိုင်းလည်း
အဝေးမှ ရှောင်နေမိတယ်
ဒါပေမဲ့ သေချာတာကတော့ ကျွန်တော် ဘယ်တော့မှနောင်တရမည်မဟုတ်ပေ
ဒီလိုပဲ ရင်ဆိုင်သွားရင်းနဲ့
ဘဝအတွက်ရုန်းကန်လှုပ်ရှားနေခဲ့တယ်
အခုလည်း အလုပ်ကပြန်နေတုန်း
ဒီအတွေးတစ်စလေးကတောင်
ကျွန်တော့်ကိုမျက်ရည်ကျစေတယ်
ကားပေါ်မှာ ဟိုကြည့်ဒီကြည့် ကြည့်လိုက်တော့လည်း
မျက်နှာကမလန်းမဆန်းနဲ့ ပင်ပန်းနွမ်းနယ်နေကြတဲ့သူတွေချည်းပါပဲလား
ဪ ကျွန်တော့်လိုလူငယ်တွေပဲနေမှာပါ
အိပ်မက်တွေပျောက်ဆုံးခဲ့ရတဲ့လူငယ်တွေ
မိသားစုတာဝန်ထမ်းထားရတဲ့လူငယ်တွေ
လမ်းပျောက်နေတဲ့လူငယ်တွေ…
အခုလိုခက်ခဲနေကြတဲ့အချိန်မှာ
အောက်ခြေလူတန်းစားတွေက
အတော်ကိုပင်ပန်းကြရလေသည်
မြင့်တက်လာတဲ့ကုန်စျေးနှုန်းတွေနဲ့အတူ
မိသားစုဝမ်းရေးကို ဖြည့်ဆည်းနိုင်ဖို့တောင်
ကြိုးစားရုန်းကန်ရသည်မှာ မလွယ်ကူပေ
ဪ ဘယ်လိုပဲဖြစ်ဖြစ်
အိမ်ပြန်ရောက်ရင်တော့
အမေ့ရင်ခွင်ထဲတိုးဝင်ရဦးပေမည်
ဒါကြောင့် ကျွန်တော်ပင်ပန်းပါသည်
သို့သော် ကျွန်တော်မမောပါ…
တစ်နေ့နေ့ တစ်ချိန်ချိန်မှာတော့
ကျွန်တော့်မိသားစုနဲ့အတူ
ကျွန်တော်ချစ်ရသူနဲ့အတူ
ကျွန်တော်မော့ကြည့်ခဲ့ရတဲ့
လူတန်းစားတစ်ရပ်ဖြစ်အောင်တော့
ကျွန်တော်ကြိုးစားပါဦးမည်…
-မိုးရိပ်ညို-
pic from pinterest
