02/02/2025
အိမ်တစ်လုံးကို ဆေးသုတ်ဖို့
ဆေးရောင်တွေ အစ အဆုံး စဉ်းစားဖူးလား..
ကိုယ်က စဉ်းစားရုံမက လက်တွေ့ပါ
အကောင်ထည်ဖော်ဖူးတယ်။
သမီးလေးမွေးရင် နေဖို့ ပန်းရောင်လေးတစ်ခန်း နဲ့
သားလေးမွေးရင်နေဖို့ အပြာရောင်တစ်ခန်း..
'သမီးအခန်းက ပို ကျယ်နေတာနော်' လို့
ပြောမိတော့
မိန်းကလေးဆိုတာ ဗာဟီရ များတယ်။
အဲ့လိုအခန်းကျယ်နေမှ ဖြစ်မှာလို့ တုံ့ပြန်သံကြားတော့
သမီးလေးကို ပို ချစ်နေတဲ့ သူ့အတွက်
ကိုယ့်မှာ ပြုံးရသေးတယ်။
ကိုယ်တို့ရဲ့ Master Bedroomက
ခရမ်းနုရောင်ဖျော့ဖျော့လေး..
ဧည့်ခန်းမှာတော့ မျက်စိအေးအောင် အစိမ်းနု၊
ဟင်းမချက်တတ်တဲ့ ကိုယ့်အတွက်
သူ အကျအနပြင်ပေးခဲ့တဲ့ Kitchenအပါအဝင်
ကျန်တဲ့နေရာတွေ အားလုံး အဖြူရောင် များများသုံးခဲ့ကြတယ်။
တိုင်ပင်ဖြည့်ဆည်းခဲ့ကြတဲ့ အဲဒီ့အိမ်လေးဟာ
ကျန်ခဲ့တဲ့ နှစ်တွေတုန်းက
အရောင်းpostတစ်ခုအနေနဲ့ တက်လာတာကို
ကိုယ်က တွေ့ ဖြစ်အောင် တွေ့လိုက်တယ်။
ဘာမှ မဆန်းကြယ်သလို
ဓာတ်ပုံတွေကို တစ်ပုံချင်း
အဆုံးထိ ထိုင်ကြည့်နေရင်း
တိတ်တိတ်လေး ဆုတောင်းပေးခဲ့သေးတယ်။
"ဈေးကောင်းကောင်းနဲ့ မြန်မြန်ရောင်းရပါစေ" ပေါ့။
အပိုင်း ၁ တွေဟာ
ဇာတ်သိမ်းပိုင်း ဖြစ်သွားတာ မဆန်းပါဘူး...
ဇာတ်ပေါင်းခန်း မတိုင်ခင်
ကိုယ်တို့ ပြတ်ပြတ်စဲစဲ ဖြစ်ခဲ့ခြင်းကသာ
ဆန်းကြယ်နေတာပါ။
