25/01/2026
“အဖေတွေဟာ သူတို့ချစ်တဲ့အကြောင်းကို သူတို့နည်းသူတို့ဟန်နဲ့ဘဲ ဖော်ပြတတ်ကြတယ်”
ကိုယ်ဟာ ဆရာညီပုလေးရဲ့ စာအုပ်
နှစ်အုပ်ဘဲဖတ်ဖူးတာ။ ပထမတအုပ်က ထက်မြက်တဲ့ဓားသွားပေါ်က ချိုမြမြပျားရည်စက် နာဂနတ်ရဲ့ စာအုပ် နဲ့ ခု လမင်းရဲ့ချိုသာတဲ့လက်ခုပ်သံဆိုတဲ့စာအုပ်ရယ် ပေါင်းမှ နှစ်အုပ်တည်းရယ်။
ဒီစာအုပ်က ၁၉၉၀ မှာ ဆရာအဖမ်းခံရတော့ ထောင်ထဲရောက်မှ သိတဲ့ ဂီတာကိုရူးသွပ်တဲ့ ဇွန်မိုး ဆိုတဲ့ လူတယောက်အကြောင်းကို ဆရာက ဖြစ်ရပ်မှန်၇၅%လောက် နဲ့ ဝတ္ထုပြန်ရေးထားတယ် လို့ ဆိုပါတယ်။
တကယ်လို့ သင်ဟာ ပါပီယွန်ဖန်ဆိုရင် ဇွန်မိုးဆိုတဲ့နာမည်ကို စိမ်းမှာမဟုတ်ပါဘူး။ ကျနော်ကိုယ်တိုင်လဲ ဒီ လမင်းရဲ့ချိုသာတဲ့လက်ခုပ်သံ စာအုပ်ကို ပါပီယွန်ညွှန်းလို့ ဝယ်ဖတ်မိတာပါ။ အမေပါပီဟာ ဇွန်မိုးကို အားကျပြီး တရက်ခြောက်နာရီ ဂီတာတီးသတဲ့။
ထားပါတော့ စာအုပ်အကြောင်းသွားရအောင်။
ဒီစာအုပ်က ဘေ့စ်ဂီတာကို ရူးသွပ်တဲ့ ဇွန်မိုးဆိုတဲ့ ဆယ်ကျော်သက် လူငယ်လေးတယောက်အကြောင်းပါ။ သူဟာ ဘေ့စ်ဂီတာကို ဘယ်လောက်ထိ ရူးသွပ်လဲ ဆိုရင် တရက်ကို ခြောက်နာရီအနည်းဆုံး တီးကျင့်သတဲ့ မိခင်က စိတ်ဝေဒနာရှင်ဖြစ်လို့ ဆေးရုံတင်ထားရလို့ သူတို့ညီအကိုနှစ်ယောက်က ဖခင်နဲ့ကြီးပြင်းလာရတဲ့အကြောင်းတွေ ဖအေနဲ့သားကြားမှာ ဖြစ်တတ်တဲ့ ကတောက်ကဆလေးတွေ ၊ ဒီနေရာမှာ ဆယ်ကျော်သက်တွေမှာဖြစ်လေ့ရှိတဲ့ ဘာရောဂါလို့ခေါ်ရမလဲမသိ၊ သူစိမ်းတွေ ဆရာလုပ်တာကို ကျေကျေနပ်နပ်ကြီးခံတတ်ကြပေမယ့် ကိုယ့်မိဘတွေက ကိုယ့်ကိုဆရာလုပ်တာကို မခံချင်တာက ဘာရောဂါလို့ခေါ်မလဲ။ ခင်ဗျားတို့ကျနော်တို့လဲဖြစ်ဖူးကြမှာပါ။ ဇွန်မိုးဆိုတဲ့ ဇာတ်ကောင်က လဲ အဲ့လိုဘဲ ပန်းချီဆွဲစသင်တော့ အတော်လေး ဆွဲတတ်နေတဲ့အချိန်မှာ သူ့ဖခင်ဖြစ်သူက ဆရာလုပ်လို့ဆိုပြီး ပန်းချီဆွဲတဲ့အလုပ်ကိုဆက်မလုပ်တော့ဘူး။
ဘေစ့်ဂီတာကို ဇောက်ချတီးလာရာကနေ သူ့အကိုရဲ့မိတ်ဆွေ ကိုယဉ်သူကြောင့်ကလက်ဇစ်ကယ် ဂီတာပိိုးဝင်လာပြီး ကလက်ဇစ်ကယ် ဂီတာတီးဖြစ်ပုံတွေရယ် ကလက်ဇစ်ကယ် ဂီတာ သမိုင်းတွေ အပြင် ကလက်ဇစ်ကယ် တီးမယ်ဆိုလျှင် ကိုင်ရမယ့်ပုံအနေအထား ဒီဇိုင်းကာလာတွေကိုပါ ဗဟုသုတအဖြစ် အားရပါးရဖတ်ရဦးမှာပါ။ သေချာတာတခုကတော့ ဒီစာအုပ်ကိုဖတ်ဖတ်ပြီးချင်း ဂီတာတီးချင်စိတ် ၊တီးတတ်ချင်စိတ် ၊ ဂီတာပိုး ဝင်လာမှာကတော့ အသေအချာဘဲ။
ဒီစာအုပ်ကို ဖတ်လို့ ပြီးခါနီးဇာတ်သိမ်းကျမှ လမင်းရဲ့ချိုသာတဲ့လက်ခုပ်သံ ဆိုတာ ဒါက်ိုပြောပါလားဆိုတာ သိလိုက်ရတဲ့အချိန်က သိပ်တန်တာဘဲဗျာ။ဆရာညီပုလေးရဲ့ စာအုပ်နာမည်ပေးတတ်ပုံကိုလဲ သဘောကျမိ။
စိတ်မကောင်းစရာတခုကတော့ ဇွန်မိုးဟာ ဒီစာအုပ်မထွက်ခင်မှာ ဆုံးသွားပါတယ်တဲ့ ။သူဟာဘာကြောင့်ထောင်ထဲရောက်လာရတာလဲဆိုတာတော့ မရေးပြထားပါဘူး။
ဆရာညီပုလေးဟာ ၂၁/၆/၂၀၂၃မှာ နှလုံးရောဂါနဲ့ကွယ်လွန်သွားခဲ့ပါပြီ။
ခုချိန်ဆို နာဂနတ်ဘုရားတို့ ဇွန်မိုးတို့နဲ့ တွေ့ပြီးလောက်ပါပြီ။ ဇွန်မိုးကိုလဲ သူကတိပေးခဲ့အတိုင်း စာအုပ်ရေးပြီးကြောင်းပြောပြပြီးကောပေါ့။
စာကြွင်းအနေနဲ့ ကျနော်သတိထားမိတာလေးတခုပါ ဒီလမင်းရဲ့ချိုသာတဲ့လက်ခုပ်သံ စာအုပ်အစမှာ မိတ်ဆွေကိုမိုးမြင့်နဲ့ ကိုခွန်ဆိုင်းသို့တဲ့ (သူတို့ထဲက တယောက်က တော့ ဇွန်မိုးနာမည်အရင်းထင်တယ် မှားချင်လဲမှားနိုင်ပါတယ် သိတဲ့သူများ ဗဟုသုတအနေနဲ့ ပြောပြကြပါဦး။) အဲ့လိုစာကိုဘယ်နေရာမှာတွေ့ဖူးလဲ စဉ်းစားကြည့်တော့ ပါပီယွန်ရဲ့ ဆံနွယ်ခက်ခက် စာအုပ်အစမှာလဲ ဗဟိန်းဇင်နဲ့ စစ်နိုင်ကိုအတွက် တဲ့။
