03/11/2020
ATGATT
All The Gear All The Time
မော်တော်ဆိုင်ကယ် စီးတော့ မယ်ဆိုရင် အမြဲ သတိရနေသင့်တဲ့ စကားစု လေးပါပဲ။
အဲ့ အထဲမှာ မှ အရေးအကြီး ဆုံးနဲ့ အသက်အန္တရာယ် ကို အကာကွယ်ပေးနိုင်ဆုံးက ခေါင်းဆောင်း Helmet ပါ။
အသက်ပါသွားတဲ့ Accident အများစုကို ကြည့်လိုက်ရင် ဆိုင်ကယ်စီး ဦးထုပ်မပါလို့ ဆုံးရှုံးလိုက်ရတာ များပါတယ်။
ဆိုင်ကယ်ရယ်လို့ စပေါ်လာကတည်း က တဲွလျက် ပါလာတာ က အရှိန်ပါ။ဒီ အရှိန်ကို တပ်မက်တဲ့ စိတ်ကြောင့်ပဲ အတော်များများရဲ့ အသက်တွေကို ပေးဆပ်လိုက်ကြရပါတယ်။တတ်နိုင်သမျှ အကာအကွယ်ရအောင် ခေါင်းဆောင်းတွေ ၀တ်ဆင်ကြပေမယ့် ဆိုင်ကယ် ပြိုင်ပဲွတွေမှာ ပထမဆုံး ၀တ်ကြတဲ့ ခေါင်းဆောင်းတွေက လေသူရဲတွေ ဆောင်းတဲ့ ဆံပင်တွေ လေလွင့်မနေအောင် ကာကွယ်ထားတဲ့ နွားသားရေ နဲ့ လုပ်ထားတဲ့ ခွက်ပုံစံလေးတွေပါပဲ။ဒါလည်း ဘာမှ မပါတာထက် စာရင် တော်ပါသေးတယ်။
၁၉၃၅ လောက်မှာ Lawrence of Arabia လို့ လူသိများတဲ့ T.E Lawrence ဟာ သူ့ရဲ့ Brough Superior ဆိုင်ကယ် ကြီး နဲ့ မှောက် ပါတယ်။ခေါင်း ကို ပြင်းပြင်း ထန်ထန် ထိပြီး ဆေးရုံ ရောက်ပြီး မကြာမှီ မှာ ပဲ ကွယ်လွန်သွားပါတယ်။
အဲ့ဒီမှာ Lawrence ကို ကုသပေးတဲ့ ဦးနှောက်နဲ့ အာရုံကြော အထူးကုဆရာဝန်ကြီး Sir Hugh Cairns က မော်တော်ဆိုင်ကယ် accident တွေကြောင့် ဦးခါင်းပိုင်းဆိုင်ရာ ထိခိုက်မှုတွေကို လေ့လာရင်း နဲ့ ပထမဆုံး "Crash Helmet"လို့ ခေါ်တဲ့ ထိခိုက်ဒဏ်ခံ ဆိုင်ကယ်စီး ဦးထုပ် ပေါ်ထွက်လာပါတယ်။ဒီ ဦးထုပ်ကလည်း ခေါင်းကို ထိုးဖောက်၀င်ရောက်လာမယ့် အရာဝတ္ထုတွေကနေ ကာကွယ်ပေးရုံက လဲွလို့ ပြီးပြည့်စုံတဲ့ helmet တော့ မဖြစ်သေးပါဘူး။
၁၉၅၀ မှာတော့ ကယ်လီဖိုးနီးယား ပြည်နယ်သား Herman Roth ရဲ့ တီထွင်မှုကြောင့် အမာထည် အပြင်ခွံ၊အတွင်းသား အပျော့၊လေကာမှန် နဲ့ မေးသိုင်းကြိုးတွေ ပါတဲ့ ပြီးပြည့်စုံတဲ့ ဆိုင်ကယ်စီး ဦးထုပ် ဒီဇိုင်း ပေါ်ထွက်လာခဲ့ပါတယ်။
Helmet မှာ အခြေခံ အားဖြင့် ပုံစံ ၃ မျိုး ရှိပါတယ်။
ဦးခေါင်း တစ်ခုလုံးကို ကာကွယ်ပေးနိုင်တဲ့ Full Face,
3/4 လို့ခေါ်တဲ့ ခေါင်းရဲ့ ၄ ပုံ ၃ ပုံကို ကာကွယ်ပေးနိုင်တဲ့ Open Face,
1/2 လို့ ခေါ်တဲ့ ခေါင်းရဲ့ တစ်၀က်ကိုပဲ ကာကွယ်ပေးနိုင်တဲ့ "သံပုရာခွံ" တို့ပဲ ဖြစ်ပါတယ်။
အန္တရာယ် အကင်းဆုံးနဲ့ ကာကွယ်မှု အပေးနိုင်ဆုံးကတော့ Full Face ဖြစ်ပြီး Open face နဲ့ သံပုရာခွံ တွေမှာ မျက်နှာနဲ့ မေးရိုး ကို ကာကွယ်ပေးနိုင်စွမ်းမရှိသလို ဖြစ်သမျှ accident တွေရဲ့ ၅၀ ရာနှုန်းဟာလည်း မေးရိုးနဲ့ သွားတွေကို ထိခိုက်လေ့ ရှိတာ တွေ့ရပါတယ်။
ဦးထုပ်တစ်လုံးကို ပထမဆုံးရွေးရမှာက အပြင်ခွံရဲ့ အရည်အသွေးပါ။
အပြင်ခွံ ကို Thermoplastic သို့မဟုတ် Polycarbonate စတဲ့ ပစ္စည်းတွေနဲ့ မှ လုပ်မထားဘူး ဆိုရင်တော့ ဆက်ကြည့်မနေသင့်တော့ပါဘူး။
ဒုတိယ ကြည့်ရမှာက Impact absorbing liner လို့ ခေါ်တဲ့ အတွင်းသားပါ။သူ့ကို Expandable Polystyrene လို့ခေါ်တဲ့ EPS အသား နဲ့ လုပ်ထားတာ များပါတယ်။ ဦးထုပ် အတွင်း က ဖော့တွေက ခေါင်းဆောင်းရင် မနာအောင် လုပ်ပေးထားတယ်လို့ ထင်ရပေမယ့် သူ့ အဓိက ရည်ရွယ်ချက်က ဖြစ်ပေါ်လာတဲ့ ရုတ်တရက် ဆောင့်အားတွေကို သူ့ဆီမှာ တတ်နိုင်သလောက် လျှော့ချ ကာကွယ်ပေးဖို့ပါ။
နောက်တစ်ခု က လေကာမှန်ရဲ့ အရည်အသွေးပါ။အလွယ်တကူ မကဲွရ မအက်ရသလို။
ကဲွရင် အက်ရင်လည်း မျက်နှာကို ထိခိုက်စေမယ့် အချွန်တွေ အစွန်းတွေ မထွက်စေရပါဘူး။
နောက်ဆုံးတစ်ခု ကတော့ မေးသိုင်းကြိုးပါ။အရေးမကြီး ဘူး ထင်ရပေမယ့် အရေးအကြီးဆုံးပါ။မေးသိုင်းကြိုး သေချာ တပ်ထားမှ Accident ဖြစ်တဲ့အခါ ဦးထုပ်က ကျွတ်မထွက်ပဲ လိုအပ်တဲ့ ကာကွယ်မှုကို ပေးနိုင်မှာပါ။မေးသိုင်းကြိုး တပ်ရာမှာလည်း ကလစ်တွေ နှိပ်စိ တွေထက် Double D ring လို့ခေါ်တဲ့ D ပုံစံ သံကွင်း ၂ ထပ်မှာ ကြိုးလျှို တဲ့ နည်းက အခိုင်ခံ့ဆုံးနဲ့ စိတ်အချရဆုံးပါ။
စ သုံး ခါစမှာ ခက်ခဲတယ် ထင်ရပေမယ့် တဖြေးဖြေး အဆင်ပြေသွားပါလိမ့်မယ်။ကြိုးစားကြည့်ပါ။တခြား ဘယ်နည်း ကမှ သူ့လောက် စိတ်မချရပါဘူး။
အဲ့ဒီတော့ အစ်ကိုကြီးရေ ကျွန်တော်တို့က ဦးထုပ် တစ်လုံး ကောင်းမကောင်း၊ဆောင်းသင့် မဆောင်းသင့် ဘယ်လိုရွေးရမလဲ။
ကိုယ်က ရွေးစရာ မလိုပါဘူး။ဆိုင်ကယ် ဦးထုပ်တစ်လုံးကို ဆောင်းဖို့၊ရောင်းဖို့ သင့်မသင့် ကို စမ်းသပ် ဆုံးဖြတ်ပြီး အရည်အသွေး သတ်မှတ်ပေးတဲ့ အဖဲွ့အစည်းတွေ ရှိပါတယ်။
သူတို့က ဦးထုပ်တစ်လုံးကို ဘယ်လိုတွေ စမ်းသပ်စစ်ဆေး သလဲ ဆိုတော့
Impact Test,ဆောင့်အားဒဏ် ခံနိုင်စွမ်း
ဦးထုပ်ကို လူဦးခေါင်း ပုံစံ လုပ်ထားတဲ့ သတ္ထုလုံးပေါ်မှာ စွပ်ထားပြီး အမြင့်တစ်ခု ကနေ လွှတ်ချပါတယ်။အောက်မှာ က အပြား၊အလုံး၊ထောင့်ချိုး၊ပိုက်လုံး၊မြင်းခွာ ပုံ အစရှိတဲ့ ပုံသဏ္ဏန် အမျိုးမျိုး ရှိတဲ့ ပေတုံးတွေ ခံထားခြင်းအားဖြင့် ဖြစ်နိုင်ခြေရှိတဲ့ ပစ်ဆောင့် နိုင်ခြေတွေကို ဖန်တီးပြီး ဦးထုပ်ရဲ့ ထိခိုက်ပျက်စီး မှုကို ဆန်းစစ်ပါတယ်။
စစ်ဆေးတဲ့ အဖဲွ့အစည်းပေါ်မူတည်ပြီး အသုံးပြုတဲ့ ပေတုံး၊ပစ်ချတဲ့ အမြင့် နဲ့ ဆောင့် အားတွေ ကွာခြား ပါတယ်။
Position Stability(Roll-off) Test,ကျွတ်မထွက်နိုင်စွမ်း
ဦးထုပ်ကို ၁၃၅ ဒီကရီ စောင်းထားတဲ့ ခေါင်းပုံစံ ပေါ် စွပ်ထားပြီး မေးသိုင်းကြိုး တပ်ထားလိုက်ပါတယ်။ ဦးထုပ်ရဲ့ နောက်ပိုင်း အောက်ခြေမှာတပ်ထားတဲ့ ဝါယာကြိုးကို ဝိတ်တစ်ခုနဲ့ ဆဲွချခြင်း အားဖြင့် ဦးထုပ် ကျွတ်ထွက်မထွက်ကို စမ်းသပ်ပါတယ်။
ပြီးရင် ခေါင်းပုံစံ ကို ပက်လက်လှန်ပြီး ခုဏလိုပဲ မေးနေရာကို ဝါယာကြိုးတပ်ပြီး ဝိတ်တစ်ခုနဲ့
ဆဲွချွတ်ကြည့်ပါတယ်။
Dynamic Retention Test,ဆဲွအားများကို တောင့်ခံနိုင်စွမ်း
ဦးထုပ်ကို ခေါင်းပုံစံ ပေါ် စွပ်ထားပြီး မေရိုးနေရာတွေကို ၂၃ ကီလိုဂရမ် အလေးချိန် နဲ့ ၁ မိနစ် ချိတ်ထားကြည့်ပါတယ်။ပြီးတာနဲ့ ၂၃ ကီလို ဝိတ်ကို ဖြုတ်ပြီး ၃၈ ကီလိုဂရမ် အလေးတုံး ချိတ်ပြီး ဝိတ်တုံးကို လွှတ်ချကြည့်ပါတယ်။အဲ့ ချိတ် အား ဆောင့်ချအား တွေကို မခံနိုင်ရင်ပဲ ဖြစ်ဖြစ်၊ဦးထုပ် ပုံပျက်သွားတဲ့ ပမာဏ က ၃၀ မီလီမီတာ ကျော်ရင်ပဲ ဖြစ်ဖြစ် စာမေးရးပဲွကျပါတယ်။
Chin Bar Rigidity Test,မေးကာတန်း ခံနိုင်စွမ်း
ဦးထုပ်ကို ပက်လက်လှန်ထားပြီး ၅ ကီလိုဂရမ် အလေးကို မေးကာတန်းပေါ် ပစ်ချပါတယ်။မေးကာတန်း ချိုင့် ဆင်းလာတဲ့ ပမာဏ ဟာ သတ်မှတ် အတိုင်းအတာ ကို ကျော်လို့ မရပါဘူး။
Shell Pe*******on Test,အပြင်ခွံ ထိုးဖောက် ခံနိုင်စွမ်း
ဦးထုပ်ကို ချထားပြီး ချွန်ထက်တဲ့ ပုံစံရှိတဲ့ ၃ ကီလိုဂရမ် အလေးချိန် ကို သတ်မှတ်အမြင့်ကနေ လွှတ်ချပါတယ်။အချွန်ဟာ ဦးထုပ်ကို ဖောက်မ၀င်ရသလို စိုက်လည်းမနေရပါဘူး။
Faceshield Pe*******on Test,လေကာမှန် ခံနိုင်ရည်
တစ်နာရီ ကို ကီလိုမီတာ ၅၀၀ ပြေးနှုန်းရှိတဲ့ ခဲပျော့ ကျည်ထွက်တဲ့ လေသေနတ် နဲ့ ရှေ့လေကာမှန် ရဲ့ ၃ နေရာကို ပြစ်ကြည့်ပါတယ်။ပေါက်မထွက်ရသလို ကျည် ထိတဲ့ အချိန်မှာ ချိုင့်၀င်မှု ပမာဏ က ၂.၅ မီလီမီတာ ကို မကျော်ရပါဘူး။
Flame Resistance Test,မီးလောင်ခံနိုင်စွမ်း
၇၉၀ ဒီကရီ စင်တီဂရိတ် အပူရှိတဲ့ မီးတောက်နဲ့ ဦးထုပ်ရဲ့ မျက်နှာစာတွေ မေးသိုင်းကြိုးတွေ လေကာမှန်တွေကို သတ်မှတ် အချိန်ကာလ တစ်ခုနဲ့ လိုက်ထိုးပါတယ်။မီးတောက် ဖယ်လိုက်တဲ့ အချိန်မှာ လောင်နေတဲ့ မီးတွေဟာ ကာလ တစ်ခု အတွင်းငြိမ်းရမှာ ဖြစ်သလို ဦးထုပ်အတွင်း ကိုသက်ရောက်တဲ့ အပူရှိန်ဟာလည်း ၇၀ ဒီကရီ စင်တီဂရိတ်ကို မကျော်သင့်ပါဘူး။
(ဒါတွေဟာ SNELL က လုပ်တဲ့ စမ်းသပ်မှုတွေ ဖြစ်ပါတယ်)
အဲ့ဒီလို စမ်းသပ်မှုတွေကို ဘယ်သူတွေက လုပ်ပေးသလဲ ဆိုတော့
DOT(U.S Department Of Transportation),FMVSS218
ဆိုင်ကယ် ဦးထုပ်တွေကို အမေရိကန် နိုင်ငံအတွင်းမှာ ရောင်းချခွင့် ရဖို့ဆို DOT လက်မှတ် ရထားဖို့ လိုပါတယ်။သူ သတ်မှတ်ထားတဲ့ အကွာအဝေး အလေးချိန် တွေနဲ့ ဦးထုပ်ကို ဘယ်လောက် ခံနိုင်ရည် ရှိလဲ။ဘယ်လောက် စိတ်ချရမလဲ စမ်းပါတယ်။ဒါပေမယ့် DOT ရဲ့ စမ်းသပ်ချက်တွေဟာ အသက်သာဆုံး အပျော့ဆုံးပါ။
FMVSS218 ဆိုတဲ့ စံနှုန်း အရ စမ်းသပ်ချက်တွေကို သူကိုယ်တိုင် ပြုလုပ်ခြင်းမရှိပဲ အခြားသူတွေကို ကန်ထရိုက်ပေးပြီး သွင်းလာတဲ့ ဦးထုပ်တွေကို ကျပန်း စမ်းသပ်စေပါတယ်။
DOT ရဲ့ လက်မှတ် ရဖို့ လွယ်ပါတယ်။
ECE(Economic Commission for Europe),22.05
တစ်ချို့က EU နိုင်ငံတွေ အတွက်လို့ ဆိုပေမယ့် တစ်ကယ်တမ်း EU နဲ့ စီးပွားရေး အရ ပတ်သက်နေတဲ့ နိုင်ငံတွေပါ အကျုံး ဝင်တာမို့ နိုင်ငံ ၅၀ ကျော် အပေါ် သက်ရောက်မှု ရှိပါတယ်။DOT ထက် ပြင်းထန် တင်းကြပ်တဲ့ စည်းမျဥ်းစည်းကမ်းတွေနဲ့ စစ်တာမို့ DOT ထက် ပို စိတ်ချရတယ် လို့ ဆိုနိုင်ပါတယ်။
DOT က အကြမ်းဖျဥ်း လောက်ပဲ စစ်ပေမယ့် ECE ကတော့ ခေါင်းပုံစံ အမျိုးမျိုး အတွက် Fitting ကောင်းမကောင်းနဲ့ ထိခိုက်မှု ဘယ်လို သက်ရောက်သလဲ ဆိုတာ က အစ စစ်ပါတယ်။
လက်ရှိက version 22.05 ကို သုံးနေပါတယ်။version ပေါ်မူတည်ပြီး ဦးထုပ်ပေါ် ပစ်ချတဲ့ ဝိတ်တုံးရဲ့ အလေးချိန်နဲ့ ပုံစံ ကွာပါတယ်။
SNELL,M2020
ပြိုင်ကားမောင်းသမား Pete Snell ဟာ ၁၉၅၆ ခုနှစ် ကားပြိုင်ပဲွ Accident တစ်ခုမှာ Roth ရဲ့ ဒီဇိုင်း အတိုင်းထုတ်လုပ်ထားတဲ့ Helmet ဆောင်းထားလျက်နဲ့ ပဲ ကွယ်လွန်ခဲ့ရပါတယ်။ဒီတော့ Pete ရဲ့ သူငယ်ချင်းတွေ နဲ့ မိသားစုတွေဟာ သူ့ နာမည်ကို သူရို့ ကိုယ်ပေါ်မှာ တက်တူးတွေ ထိုးပြီး လွမ်းမော တမ်းတ နေမယ့် အစား ၁၉၅၇ မှာ SNELL memorial foundation ကို ထူထောင် လိုက်ပါတယ်။သိပ္ပံပညာရှင်တွေ ၊အင်ဂျင်နီယာတွေ စုပေါင်းပြီး Helmet တစ်လုံးရဲ့ ဒဏ်ခံနိုင်ရည်တွေကို စမ်းသပ်မယ့် နည်းစနစ်တွေ နည်းလမ်းတွေ ကို အတည်ပြု သတ်မှတ်လိုက်ခြင်းအားဖြင့် Helmet Safety Testing ဆိုတဲ့ နည်းစနစ်တွေ ပေါ်ထွန်းလာခဲ့ပါတယ်။
ကျန်တဲ့ စနစ် ၂ ခုထက် ပိုမိုတိကျ ပိုမိုတင်းကြပ်တဲ့ နည်းစနစ်တွေနဲ့ သတ်မှတ် စစ်ဆေးတာမို့
ရှေ့က ၂ ခုထက် သူ့ လက်မှတ် က ပို တန်ဖိုးမြင့်ပါတယ်။
ရှေ့က ၂ ခု က နိုင်ငံ အလိုက် ခွင့်ပြုချက် လက်မှတ်တွေ လို ဖြစ်ပေမယ့် Snell ကတော့ လွတ်လပ်တဲ့ အဖဲွ့အစည်းတစ်ခု အဖြစ်အနေနဲ့ ရပ်တည်နေတာကြောင့် တစ်ကယ်ကောင်းတဲ့ Helmet တွေကတော့ DOT,ECE certificate တွေကို နိုင်ငံအလိုက်သွင်းခွင့် ရဖို့ ကြိုးစားကြသလို ဂုဏ်သိက္ခါ အတွက် SNELL certificate ကိုပါ ရဖို့ ကြိုးစားကြရပါတယ်။
M2020 က လက်ရှိ အသုံးပြနေတဲ့ version ပါ။
SHARP
ဗြိတိသျှ နိုင်ငံအတွင်းကို ဆိုင်ကယ်စီး ဦးထုပ် တင်သွင့်ခွင့် လို့ ဆိုနိုင်ပေမယ့် သူက ECE လက်မှတ်ရပြီး သား ဦးထုပ်တွေကိုပဲ သုံးစဲွသူတွေအတွက် ရွေးချယ်ရလွယ်ကူအောင် အရည်အသွေး ခဲွခြားပေးတယ် လို့ ပြောလို့ရပါတယ်။
ရှေ့ ၃ ခု လို Failed/Passed စတဲ့ အောင်တယ်/ရှုံးတယ် ဆိုတဲ့ ဆုံးဖြတ်ချက်တွေ အစား သူက
အရည်အသွေးကို ကြယ် ၁ ပွင့်ကနေ ကြယ် ၅ ပွင့် အဆင့်အထိ လယ်ဗယ်တွေ ခဲွပြီး သတ်မှတ်ပေးတာကြောင့် ၀ယ်မယ့်သူတွေ ရွေးချယ်ရပို လွယ်ကူစေပါတယ်။
FIM
သူကတော့ ပြိုင်ပဲွတွေမှာ သုံးမယ် ဆိုင်ကယ်စီး ဦးထုပ်တွေရဲ့ အရည်အသွေးကိုပဲ စစ်ဆေး အတည်ပြုပေးပါတယ်။
(အဓိက က တော့ ဦးထုပ်အရည်အသွေး သတ်မှတ်ပေးတဲ့ အဖဲွ့အစည်း အနေနဲ့ DOT,ECE,Snell,SHARP ၄ ခုပဲ လူသိများပေမယ့် သူ့နိုင်ငံအလိုက် သူ သတ်မှတ်ထားတဲ့ ခွင့်ပြုချက်လက်မှတ် တွေလည်း ရှိပါသေးတယ်။အောက်က ပုံတွေထဲမှာ ဇယားလေး ပါ ပါတယ်။နောက် ဆိုင်ကယ် ဦးထုပ်လို့ဆိုပေမယ့် ကား၊ Go Kart စသည်ဖြင့် speed ပြိုင်ပဲွတွေမှာ ဆောင်းရတဲ့ Safety Helmet အားလုံး အကြုံး၀င်ပါတယ်)
ပြောလက်စနဲ့ ဒီ Safery Standard တွေအကြောင်း သေချာနားလည် သွားအောင် သူတို့ ရဲ့ စမ်းသပ်ပုံ အားနည်းချက် အားသာချက် ခဲွပြထားတာလေးတွေကိုပါ ထည့်ပြီး ဘာသာ ပေးပါမယ်။
DOT,FMVSS218
အားသာချက်
-စမ်းတဲ့နေရာမှာ အားပိုသုံးတယ်။ထိပ်လုံးတဲ့ ဝိတ်တုံးကို သုံးပြီး တစ်နေရာကို ၂ ကြိမ်စီ ပစ်ချ တယ်။
-ပညာရှင်ကို ဦးထုပ်ရဲ့ ကြိုက်တဲ့နေရာကို စမ်းသပ်ခွင့် ပြုထားတယ်။
-စမ်းသပ်ရာမှာ အင်အားကို G force unit 400 အထိ အသုံးပြုခွင့် ပေးထားတယ်။
အားနည်းချက်
- ယုံကြည်မှုကို ဦးစားပေးပြီး ကျပန်း စမ်းသပ်တာ မို့ DOT ပါတဲ့ ဦးထုပ်တိုင်း စိတ်ချရတယ် မဆိုနိုင်ပါဘူး။
-ဦးခေါင်း ပုံစံမျိုးစုံ နဲ့ စမ်းသပ်ခြင်း မပြုဘူး။
-သူ့ စမ်းသပ်နည်းတွေမှာ ဆောင့်အားဒဏ် ခံနိုင်မှုကိုပဲ ဦးစားပေးပြီး တခြားအရေးပါတဲ့ မြင်ကွင်းကြည်လင် ပြတ်သားမှု၊ချွတ်ရ လွယ်ကူစေမှုနဲ့ ပွတ်တိုက်အားခံနိုင်မှုတွေ ထည့်သွင်းမထားတာကြောင့် ပြီးပြည့်စုံတဲ့ စမ်းသပ်မှု ဖြစ်မလာပါဘူး။
ECE,22.05
အားသာချက်
-ECE လက်မှတ်ထုတ်ပေးထားတဲ့ ဦးထုပ်အမျိုးအစားတွေ ဟာ သေသေချာချာ တိတိ ကျကျ စမ်းသပ်ပေးထားပြီး ဖြစ်ပါတယ်။
-စမ်းသပ်ရာမှာ အင်အားကို G force unit 275 လောက် ကိုပဲ သုံးပါတယ်။
- Safety နဲ့ ပတ်သက်တဲ့ စမ်းသပ်မှုတွေမှာ အချိန် ပို ယူပါတယ်။
- စမ်းသပ်ရာမှာ ခေါင်း ပုံစံ ၈ မျိုးလောက် အထိ အသုံးပြုပြီး စမ်းသပ်ပါတယ်။
အားနည်းချက်
-တြိဂံ ပုံပေတုံးရဲ့ ဇောင်း နဲ့ အားပျော့ပျော့ ၁ ချက်ပဲ ဆောင့်ကြည့်ခြင်းဟာ အမေရိကား လို အရှိန်ပြင်းပြင်းနဲ့ မောင်းတတ်တဲ့ နိုင်ငံတွေအတွက် စိတ်ချရပါ့မလား အငြင်းပွားစရာ ပါ။
-အဆောင့် ခံနိုင်စွမ်းကို စမ်းသပ်ရာမှာ ဦးထုပ်ကို အသေထားပြီး ရိုက်ကြည့်တဲ့ နည်း ကလည်း ထုတ်လုပ်သူဘက်ကို လှည့်စားခွင့် ပေးထားရာရောက်ပါတယ်။
-ခေါင်း ပုံစံ အမျိုးမျိုးနဲ့ စမ်းသပ်တာကြောင့် ခေါင်းပုံစံ အပြောင်း အလဲပေါ်မူတည်ပြီး Center of gravity လည်း ပြောင်းနိုင်တာမို့ ဆောင့်အား သက်ရောက်မှုတွေက ၂၀ ရာနှုန်းလောက်ထိ လျော့ကျ သွားနိုင်ပါတယ်။
SNELL,M2020
အားသာချက်
-SNELL လက်မှတ်ထုတ်ပေးထားတဲ့ ဦးထုပ်အမျိုးအစားတွေကို သေသေချာချာ တိတိ ကျကျ စမ်းသပ်ပြီး မှ အတည်ပြုပေးပါတယ်။
-G force unit 275 လောက်ပဲ အသုံးပြုပါတယ်။
-ဦးထုပ်ရဲ့ တည်ငြိမ်မှု၊ချွတ်ရ လွယ်ကူမှုနဲ့ ရှေ့လေကာ အရည်အသွေးတွေကို ပါ သေချာ စစ်ပါတယ်။
-ဆောင့်အားဒဏ်ခံနိုင်စွမ်း ကို စမ်းရာမှာ ပိုထက် တဲ့ ဇောင်းရှိတဲ့ ပေတုံးကို သုံးပါတယ်။
-နားလည်တတ်ကျွမ်း တဲ့ ပညာရှင် က ဦးထုပ်တစ်လုံး လုံးကို ဘယ်နေရာ မှာ အားနည်းချက် ရှိသလဲ ဆိုတာကို စေ့စပ်သေချာစွာ ရှာဖွေဆန်းစစ်ခြင်းအားဖြင့် လက်မှတ်ရဲ့ အဆင့်အတန်း ကို သေချာထိမ်းထားပါတယ်။
အားနည်းချက်
-SNELL လက်မှတ်ရဖို့ စစ်ဆေးခ ဈေးကြီးတာကြောင့် SNELL လက်မှတ်ရထားတဲ့ ဦးထုပ်တွေရဲ့ ရောင်းဈေးတွေလည်း မြင့်နေတတ်ပါတယ်။
-ပြိုင်ကွင်းထဲမှာ စိတ်ချလက်ချ သုံးနိုင်လောက်တဲ့ အထိ ရည်ရွယ်ပြီး စမ်းသပ်စစ်ဆေးတာမို့
သာမန် လမ်းပေါ် အတွက် အသုံးတည့်တဲ့ နေကာပါတဲ့ ဦးထုပ်တွေ၊မေးလှန်လို့ ရတဲ့ ဦးထုပ်တွေ ဟာ SNELL လက်မှတ်ရဖို့ ခဲယဥ်းနေတတ်ပါတယ်။
SHARP
အားသာချက်
-ဦးထုပ်ကို ပစ်ဆောင့် တဲ့ အရှိန် ကို ရွေးချယ်ရာမှာ DOT,ECE တို့ စမ်းသပ်တဲ့ အရှိန်တွေထက် ပိုနှေးတာရော ပိုမြန်တာရော သုံးပါတယ်။
-အဆောင့်ခံနိုင်စွမ်းကို စမ်းသပ်ရာမှာ အချိန်ပိုယူပါတယ်။
-ဦးထုပ် တစ်လုံးရဲ့ ထိခိုက်ခံနိုင်ရည်ကို နေရာ ၅ နေရာ အထိ စမ်းပါတယ်။
-နည်းမျိုးစုံ နဲ့ စစ်ဆေးပြီးသား ဦးထုပ်ရဲ့ အားနည်းချက်တွေကို သေချာသိရအောင် ဦးထုပ်ရဲ့ ထိခိုက်ဒဏ်ရာ တွေကို အနုလုံ ပဋိလုံ စစ်ဆေးလေ့ ရှိပါတယ်။
-ကြယ်ပွင့်ပြ စနစ်ကြောင့် ရွေးချယ်ရတာ ပိုလွယ်ကူစေပါတယ်။
အားနည်းချက်
-ကြယ်ပွင့်ပြ စနစ်နဲ့ အရောင်နဲ့ အဆင့်ခဲွတဲ့ စနစ်တွေကြောင့် သူများတွေနဲ့ မတူတာမို့ အငြင်းပွားစရာ ဖြစ်လေ့ရှိပါတယ်။
-ECE စံနှုန်းတွေကိုပဲ မှီခိုပြီး DOT ကို ထည့်မတွက်သလောက်ပါပဲ။
-တြိဂံ ပုံ ပေတုံးနဲ့ ပစ်ဆောင့်စေတဲ့ နေရာမှာ DOT ,SNELL တို့မှာ သုံးသလောက် အရှိန်မပြင်း ပါဘူး။
အပေါ်က အမျိုးအစားတွေ၊ရာဇ၀င် သမိုင်းကြောင်းတွေ၊လက်မှတ်တွေက ဗဟုသုတ အနေနဲ့ မှတ်ထားပါ။အဓိက သင့်တော်တဲ့ ဆိုင်ကယ်စီးဦးထုပ်ရွေးဖို့ကတော့ ဆောင်းကြည့်မှ ရပါမယ်။
ကျွန်တော်နဲ့အပြင်မှာ ဆုံဖူးတဲ့ လူတွေကို ရှင်းပြလေ့ ရှိတာကတော့ Helmet တွေဟာ Jean ဘောင်းဘီ တွေလိုပါပဲ Brand ကွာရင် Fitting ကွာလေ့ ရှိပါတယ်။
အကြမ်းအားဖြင့် မျက်ခုံးအပေါ် ကနေ နောက်စေ့ အထိ ပေကြိုးနဲ့ တစ်ပတ် ပတ်တိုင်းရင် Helmet Size ကို ရလေ့ရှိပါတယ်။ဒါပေမယ့် ခေါင်းပုံစံတွေက ကွာသေးတာကြောင့် ပေကြိုးနဲ့ တိုင်းလို့ ရတဲ့ ကိန်းဂဏန်းလောက်နဲ့ သင့်တော်တဲ့ ဦးထုပ် ရဖို့ မလွယ်လှပါဘူး။
ခေါင်းပုံစံတွေကလည်း
Round Oval
နဖူး ကနေ နောက်စေ့ အကွာအေ၀း နဲ့ နားရွက် ၂ ဘက် အကွာအေ၀း အတူတူ နီးပါ။
Intermediat Oval
နဖူးကနေ နောက်စေ့ အကွာအေ၀းက နားရွက် ၂ ဘက် အကွာအေ၀းထက် အနည်းငယ်ပို
Long Oval
နဖူးကနေ နောက်စေ့ အကွာအေ၀းက နားရွက် ၂ ဘက် အကွာအေ၀းထက် တော်တော်လေး ပို
ဆို သလို ၃ မျိုး ရှိနေပါတယ်။ကိုယ့်ခေါင်း က ဘယ်လိုအထဲ ပါသလဲ ဆိုတာ သိချင်ရင် ကိုယ့်ခေါင်းကို အပေါ်စီး ကနေ တစ်ယောက်ယောက်ကို ဓါတ်ပုံရိုက်ခိုင်းပါ။ဆံပင်တွေ ပါးလျားနေရင်တော့ ခေါင်းပုံစံကို ဆုံးဖြတ်ရတာ ပိုလွယ်ပါတယ်။
ဆိုလိုချင်တာက သင့်တော်တဲ့ Helmet ရဖို့ ခေါင်းပုံစံ နဲ့ Helmet Brand ရဲ့ Fitting ကလည်း မူတည်နေပါသေးတယ်။ဒီတော့ Helmet ၀ယ်ဖို့က ဆောင်းကြည့်တဲ့ နည်း သာ အဆင်အပြေဆုံး ဖြစ်ပါမယ်။ဆောင်း ကြည့်တာတောင် အနည်းဆုံး ၅ မိနစ်လောက် ၀တ်ကြည့်ထားရပါမယ်။မေးသိုင်းကြိုး ကို မေးစိ နဲ့ ကြိုးကြား လက်ချောင်း ၂ ချောင်းပူးလောက် ထည့်ကြည့်လို့ ရရင် အဆင်ပြေပါတယ်။ခေါင်း အပေါ်၊ရှေ့၊နောက် တွေကတော့ အကုန် ထိကပ်နေသင့်ပါတယ်။
ဦးထုပ်ကို ကိုင် လှုပ်ရင် ဆောင်းထားတဲ့ လူရဲ့ ပါးတွေပါ ရော လှုပ်သင့်တဲ့အထိ Fit ဖြစ်သင့်ပါတယ်။ဒါပေမယ့် ဆောင်းထားရင် တအားတင်းကြပ်နေတာကြောင့် ခေါင်းမူးတာ ခေါင်းကိုက်တာတော့ မဖြစ်သင့်ပါဘူး။
ခရီးရှည်ထွက်မယ်ဆိုရင်တော့ ဦးထုပ်ရဲ့ လေခွင်းအား နဲ့ အလေးချိန်ကလည်း အရေးပါလာပါတယ်။နောက် ဦးထုပ် တစ်လုံးရဲ့ သက်တမ်းကို ကျွမ်းကျင် သူတွေက ၅ နှစ်လို့ သတ်မှတ်ပါတယ်။ ၅ နှစ်ကာလ အတွင်းမှာ သူ့ရဲ့ Expandable Polystyrene EPS လို့ခေါ်တဲ့ အတွင်းဖော့သားတွေ သက်တမ်းကုန်တယ် လို့ သတ်မှတ်ပါတယ်။
ထို့ အတူ မိမိ ဦးခေါင်းနဲ့ သေချာ အထိုင်ကျတဲ့ ၁ သိန်းတန် DOT လက်မှတ်ရ ဦးထုပ်ဟာ
မိမိ ခေါင်းနဲ့ ချောင်နေတဲ့ ၁၀ သိန်းတန် SNELL လက်မှတ်ရ ဦးထုပ်ထက် ပို ကောင်းမွန်တဲ့ ကာကွယ်မှု ပေးစွမ်းပါတယ်။
ဒီကြားထဲ မြန်မာပြည်မှာတော့ အစစ်ကို အစစ်၊အတု ကို အတု ပြောရောင်းတဲ့ လူတွေ ရှိသလို၊
အစစ်နဲ့ တစ်ပုံစံထဲ အတုတွေကိုလည်း အစစ်ဈေးတွေနဲ့ ရောင်းနေကြတာတွေ လည်း ရှိပါတယ်။Model အောက်သွားတဲ့ ဆိုင်ကျန် တွေကိုလည်း အခုမှ အသစ်ထွက်သလို တင်ရောင်းနေတာတွေလည်း တွေ့ရပါတယ်။
ဒီတော့ ကိုယ် ဆိုင်ကယ်စီး ဦးထုပ်ကောင်းကောင်း ၀ယ်တော့မယ်ဆို ကိုယ်၀ယ်မယ့် ဦးထုပ်ရဲ့ Model,Graphic design နဲ့ Rating လေးတွေကိုတော့ google မှာ ကြိုပြီး ရှာဖတ်သွားမယ် ဆိုရင် တော့ ရွေးရ ချယ်ရတာ ပိုလွယ်မယ် လို့ အကြံပေးချင်ပါတယ်။
ဒီတော့
"အစ်ကိုကြီးရေ ကျွန်တော် ဘယ်လိုဦးထုပ်မျိုး ဘယ် Certificate ရထားတဲ့ ဦးထုပ်၀ယ်ရမလဲ" လို့မေးလာခဲ့ရင်
"ညီလေး ဘယ်လို Accident မျိုး ဖြစ်ဖို့ မျှော်လင့်ထားသလဲ" လို့ပဲ ပြန်မေးရပါမယ်။
ဘယ်သူမှ ကိုယ်ဘယ်လို Accident ဖြစ်မယ်ဆိုတာ မျှော်လင့်ထားလို့ မရတော့ ကိုယ်တတ်နိုင်တဲ့ အထဲက အကောင်းဆုံး ရွေးချယ်ပါလို့ပဲ အကြံ ပေးပါရစေ။
အားလုံး ဆိုင်ကယ်ဗဟုသုတ နဲ့ ပြည့်စုံပြီး အန္တရာယ်ကင်းစွာ စီးနင်းနိုင်ကြပါစေ။
