18/11/2022
ဆင်းတုတော်_ကိုးကွယ်တာ_ဘာကြောင့်လဲ
☘🌺☘🌺🌺🌺☘🌺☘
ဂေါတမမြတ်စွာဘုရား ပရိနိဗ္ဗာန် စံလွန်သွားတာ နှစ် ၂,၅၀၀ ကျော်ခဲ့ပါပြီ။
၁။ သက်ရှိထင်ရှား ရှိမနေတော့တဲ့ မြတ်စွာဘုရားကို ဆည်းကပ်ကိုးကွယ်လို့ ရသေးသလား ?
၂။ ကိုးကွယ်နေလို့ကော အကျိုး ရှိပါမလား ?
၃။ ဗုဒ္ဓဘာသာက ဆင်းတုတော်တွေ၊ ရုပ်ပုံ, ပန်းချီကားတွေကို ကိုးကွယ်တဲ့ ဘာသာလား ?
၄။ ဆင်းတုတော်တွေ၊ ရုပ်ပုံတော်တွေကို ရှိခိုးကိုးကွယ်နေလို့ ဘာအကျိုး ရှိမှာလဲ ?
ဒါတွေက အနောက်နိုင်ငံသားတွေ၊ ဘာသာခြားတွေ သိချင်တဲ့၊ မေးတတ်တဲ့ မေးခွန်းတွေပါ ပဲ။
ဂေါတမမြတ်စွာဘုရားဟာ ပရိနိဗ္ဗာန် စံလွန်သွားပြီ ဖြစ်ပေမဲ့သူ ဟောကြားထားတဲ့ တရားအဆုံးအမတွေက ပကတိအတိုင်း ရှိနေကြတုန်းပါ ပဲ။
သူ ဘုရားဖြစ်အောင် ကြိုးပမ်းခဲ့တာ အခုလို တရားအဆုံးအမကို ဟောပြဖို့နဲ့ နိဗ္ဗာန်ရောက်ကြောင်း တရားကို ညွှန်ပြ ပေးခဲ့ဖို့ပါ ပဲ။
ဒီ တရားတော်တွေက ယခုချိန်ထိ အကုန် ရှိနေသေးတာမို့ ဒီတရားတော်အတိုင်း လိုက်နာကျင့်ကြံ အားထုတ်ရင်း မြတ်ဗုဒ္ဓ ရှိစဉ်တုန်းကလိုပဲ ထပ်တူထပ်မျှ အကျိုးထူးများကို ခံစား ရပါတယ်။ နိဗ္ဗာန်ချမ်းသာကိုလည်း မျက်မှောက်ပြု နိုင်ပါတယ်။
ဗုဒ္ဓမြတ်စွာ ပရိနိဗ္ဗာန် မစံမီမှာ ဗုဒ္ဓကိုယ်စား ကိုးကွယ်ဆည်းကပ်ဖို့အတွက် စေတီ (၄)မျိုးကို သတ်မှတ်ပေးတော် မူခဲ့ပါတယ်။
ဓာတုစေတီ
~~~~~~~~
ဗုဒ္ဓရဲ့ ရုပ်ကလပ်တော်ကို မီးသဂြိုလ်တဲ့အခါ ကျန်ရစ်တဲ့ ဓါတ်တော်များကို ဘုရားရှင်ကိုယ်စား ကိုးကွယ် နိုင်တယ်။
ဓမ္မစေတီ
~~~~~~~
ဗုဒ္ဓမြတ်စွာဘုရား (၄၅)နှစ်တိုင်တိုင် ဟောကြားတော် မူခဲ့တဲ့
ပိဋကတ်သုံးပုံ၊ မဂ်လေးတန်၊ ဖိုလ်လေးတန်နဲ့ နိဗ္ဗာန်တရားတော် တို့ကို ဘုရားရှင်ကိုယ်စား ကိုးကွယ်၊ ဆည်းကပ် နိုင်တယ်။
ဥဒ္ဒိဿစေတီ
~~~~~~~~~
သက်တော်ထင်ရှား မြတ်စွာဘုရားကို ရည်မှန်းပြီး ရေးသားတဲ့ ပုံတော်တွေ၊ ပန်းချီကားချပ်တွေ၊ သစ်သားဆင်စွယ် စသည်တို့ကို ထုလုပ်ထားတဲ့ ဆင်းတုတွေ၊ အုတ်၊ သဲ၊ အင်္ဂတေ စသည်တို့ဖြင့် တည်ဆောက်ထားတဲ့ စေတီပုထိုးတွေ ဒီအရာတွေ အားလုံးကို ဘုရားရှင်ကိုယ်စား ရှိခိုးပူဇော် နိုင်တယ်။
ပရိဘောဂစေတီ
~~~~~~~~~~~
မဟာဗောဓိပင် အပါအ၀င် ဘုရားရှင် အသုံးပြုတော်မူခဲ့တဲ့ သပိတ်၊ သင်္ကန်း၊ တောင်ဝှေး စသည်တို့ကိုလည်း ဘုရားရှင်ကိုယ်စား ဆည်းကပ်၊ ကိုးကွယ် နိုင်တယ်။
အဲဒီတော့ ဗုဒ္ဓဘာသာ၀င်များက မြတ်ဗုဒ္ဓရဲ့ ပုံတော်ပန်းချီကားတွေ၊ ဆင်းတုတွေကို ရှိခိုးပူဇော်တာဟာ ဥဒ္ဒိဿစေတီ အဖြစ် ရည်မှန်းပြီး ရှိခိုးပူဇော်ခြင်း ဖြစ်တယ်။ သာမာန် ပန်းချီကား၊ ရုပ်ထု၊ ဆင်းတုများ အနေနဲ့ ရှိခိုးပူဇော်နေတာ မဟုတ်ဘူး။
ဥပမာ ➡
ကွယ်လွန်သွားပြီးတဲ့ မိဘများရဲ့ဓါတ်ပုံကို ရှိခိုးကန်တော့နေတဲ့ သူဟာ စက္ကူဓာတ်ပုံကို ရှိခိုးကန်တော့နေတာ မဟုတ်ဘူး။ သူ့မိဘကို ရည်မှန်းပြီး ရှိခိုးကန်တော့နေခြင်းသာ ဖြစ်တယ်။
မိဘဓာတ်ပုံက အသက်ထင်ရှား ရှိစဉ်အခါက မိဘတို့ရဲ့ ရုပ်ပုံကို ထင်မြင်လာအောင် အထောက်အပံ့ ပြုတယ်။ မိဘရဲ့ ဂုဏ်ကျေးဇူးတွေ ထင်ပေါ်လာအောင် ကျေးဇူး ပြုပေးတယ်။
စက္ကူဓာတ်ပုံကို ကျော်လွန်ပြီး မိဘတို့ရဲ့ တကယ့်ရုပ်သွင်နဲ့မိဘတို့ရဲ့ ဂုဏ်ကျေးဇူးများ ပေါ်လွင်လာအောင် ကြည့်ရှူရသလို ဘုရားပန်းချီ၊ ရုပ်ထု၊ ဆင်းတုများကို ကျော်လွန်ပြီး မြတ်စွာဘုရားရဲ့ တကယ့်ရုပ်သွင်နဲ့ ဂုဏ်တော်များ၊ ကျေးဇူးတော်များကို ပေါ်လွင်အောင် ကြည့်ရှုကြရမှာ ဖြစ်ပါတယ်။
ဒါကြောင့် ပုံတော်၊ ဆင်းတုတော် တို့ဟာ အထောက်အပံ့ ပစ္စည်းမျှသာ ဖြစ်တယ်။
ပုံတော်၊ ဆင်းတုတော်တွေ မရှိဘဲနှင့် မြတ်စွာဘုရားရဲ့ ဂုဏ်တော်များကို ရည်မှန်းပြီးလည်း ရှိခိုးပူဇော် နိုင်ပါတယ်။
မြတ်စွာဘုရား သက်တော်ထင်ရှား ရှိစဉ်အခါကလည်း ဘုရားဂုဏ်တော်များကိုသာ ရည်မှန်းပြီး ပူဇော် ရပါတယ်။
မြတ်စွာဘုရားရဲ့ ဂုဏ်တော်များဆီသို့ စိတ်ရောက်တာချင်း တူရင် အကျိုးကျေးဇူးကလည်း တူမှာပဲ။ ဂုဏ်တော်များ စုပေါင်းထားတဲ့ ဘုရားရှင်ကို ဉာဏ်နဲ့ မြင်အောင် အာရုံ ပြုရမယ်။
ဒါကြောင့် ဗုဒ္ဓဘာသာ ဆိုတာ ရုပ်ပုံ၊ ရုပ်ထုတွေကို ဆည်းကပ်ကိုးကွယ်တဲ့ ဘာသာ မဟုတ်ပါဘူး။ ဒါက မသိ၊ နားမလည်သူတွေရဲ့ လွဲလွဲမှားမှား စွပ်စွဲမှုများသာ ဖြစ်ပါတယ်။
ဗုဒ္ဓဘာသာ၀င်တွေ ဆည်းကပ်ကိုးကွယ်နေတာက အရဟံအစ ဘဂဝါအဆုံး အတုမရှိတဲ့ ဂုဏ်တော်များရဲ့ ပိုင်ရှင်ဖြစ်တဲ့ ဗုဒ္ဓဘုရား၊ ထို မြတ်စွာဘုရား ဟောကြားညွှန်ပြခဲ့တဲ့ မဂ်လေးတန်၊ ဖိုလ်လေးတန် နိဗ္ဗာန်ပရိယတ် လို့ ဆိုတဲ့ အတုမရှိ မြင့်မြတ်တဲ့ ဓမ္မတရား၊ သစ္စာလေးပါး မြတ်တရားကို သိမြင်ကြပြီးတဲ့ အရိယာသံဃာများနဲ့ မြတ်စွာဘုရားရဲ့ အဆုံးအမ ဩဝါဒအတိုင်း ကျင့်ကြံနေကြတဲ့ သမုတိသံဃာ၊ ဘုရား, တရား, သံဃာ လို့ ဆိုအပ်တဲ့ ရတနာမြတ်သုံးပါးပါ ပဲ။
ဒီလို ကိုးကွယ်ဆည်းကပ်ထိုက်တဲ့ အမြတ်ဆုံး ရတနာသုံးပါး ဆိုတာ အခြားဘယ်မှာ ရှာဖွေလို့ ရနိုင်ပါတော့မလဲ။
Credit, ဒေါက်တာမင်းတင်မွန်
ဦးမြင့်ခိုင်,
မူရင်းရေးသားတင်စက်သူများကို
လေးစားစွာဖြင့် Credit ပေးပါသည်
