20/02/2026
" လေအဝှေ့မှလွမ်းလိပ်ပြာ "
တစ်ဆောင်းကုန်လို့တစ်နွေသစ်ပြန်တော့
လေအဝှေ့မှာကြွေလွင့်သွားတဲ့ပန်းလိပ်ပြာ
နွေဦးမနက်ခင်းကိုဂုဏ်ပြုတေးဆိုလို့
လေရူးတွေချိုလို့
အော်.....နွေအကူးတဲ့လား ၊
အတိတ်ကဒဏ္ဍာရီတွေ
နိုးနိုးကြားကြားအရည်ပျော်ကျ
မျက်ဝန်းမှပုလဲသီ
ငှက်ကလေးထံလွှင့်တင်လိုက်ပြီ ၊
အညာမြေသူ့ရင်ခွင်မှ
သင်းပျံ့တဲ့လွမ်းရနံ့ဝေ့အလာ
တစ်ယောက်နဲ့တစ်ယောက်
ဝေးရက်တွေလည်းကြာလို့
ချစ်သက်တွေလည်းရှည်စို့ ၊
ကြွေရွက်ဝါလေး အတောင်ဖြန့်တဲ့အခါ
ရေပူစမ်းလေး မျက်ရည်ချူတဲ့အခါ
ပုံရိပ်တွေလွမ်းနာကျ
ညနေခင်းတွေဟာအသည်းသန်မူးလို့ရူးလို့
ဒါနွေဦးတဲ့အချစ်ရဲ့ ၊
ကြည့်နေကျပြတင်းတံခါးတွေ
လျှောက်နေကျလမ်းချိုးအကွေ့တွေ
ဖွင့်နေကျသီချင်းဟောင်းတွေနဲ့
အခုချိန်မှာမင်းကိုပြောနိုင်တာတစ်ခုကတော့
" ချစ်တယ် "ဆိုတာပါပဲ ။ ။
-မြတ်ဘုန်းသော်
