Miharisoa - Ny Pejy

23/04/2026

LOLO ANGAMBA...

Lafatra sy kanto tsy dia fahita loatra
Tazako nandalo indray hariva izay
Tovovavy iray izay manja tafahoatra
Nanaitra ny fitia natory hatramin'izay...

Dia nanofinofy hatrany ny hoe nifandamoro
Naminavina foana izay mety koa anarany
Dia lasa fahazarako ilay mijorojoro
Miandry an'azy handalo sao eto indray no làlany.

Fa andro maro izay, volana aza angamba
Sasatry ny niandry aho ka nahatsiaro valaka
Maraina sy hariva no niandry, tsy nitranga
Lolo angamba izy iny fa izaho no tsy ampy vavaka.

Fa na lolo aza ianao, ny foko tafalatsaka
Mipotraha indray mandeha dia ento zah hanaraka

✍️MIHARISOA
📜RedyRedy 23 aprily 2024

07/07/2024

MADIO NY SAIKO

Tia anao ny foko, ny saiko mila ho adala
Niriko efa hatry ny ela ny hiantso anao malala
Tsy ataoko ety ivelany ary tsy mba ho lazaiko
Fa raha misy manontany, Madio hoa ny ahy ny saiko

Ny foko tena tia, fa ny zavatra hafa tsapako
toa mila sy maniry ho eo anilanao ny vatako
hanoroka sy hamihina no hany mba kasaiko
Fa raha misy manontany, Madio hoa ny ahy ny saiko

Rehefa eo ianao, ny foko toa mitebiteby
Mody hoe tsy taitra, no sady mody hendry
Fa any anatiko any fitia no efa antenaiko
Fa raha misy manontany, Madio hoa ny ahy ny saiko

✍️ MIHARISOA
Redyredy 04 Jolay 2024

26/12/2023

OROKA POETA

Ianao nihevitra f'izay ny androany
Hoe mba oroka fotsiny ihany
Kay nitohy dia nitohy tsisy fetra
Hafa mihitsy 'lay oroka poeta

Oroka tsy mba eo molotra
na koa vatana roa mifanosika
Fa an-tsoratra hifamaliana
Ary arahana kely ady rima

✍️MIHARISOA
📜RedyRedy

26/12/2023

20/12/2023

TSY NIOVA

Tsy niova mihitsy ianao na ela aza tsy nihaona
ilay akantonao miavaka eny foana
'Lay angolanao sy tsikinao malefaka
ilay fijerinao somary menamenatra
mambambo fo tanteraka

Tsy niova mihitsy ianao, tanora lalandava
Ny mony adolan-tsento aza manakaiky vava
Tsisy niova mihitsy fa toy ny fahiny hatrany
Ny hoe maman'izy dahy toa tsy mampino ihany
Raha ny hitako androany

Ilay sangisangitsika sy anihany kely
Dia samy torak'hehy rehefa mifampijery
Satry tena satry iresaka maharitra
ho eo anilanao na aza mandram-pahantitra
ry sipa manjakely tena mahafinaritra...

Tsy niova mihitsy ianao na endrika na bika
tsy niova ihany koa ilay toetranao sariaka
tsy niova koa 'lay foko naniry anao ho malala
tsy niova koa 'lay toetrako tsy sahy nanambara
fa tia sy taratara hatrany am-piandohana...

✍️MIHARISOA

12/12/2023

DIABETIKA

Any izay ianao miondana eo an-tratrany,
inoko fa tsy fantany
F' indray ataonao azy
ireny teny mamy fataoko taminao
sy ireny vazivazy
ary sangy izay fanaoko, mba ampihomehy anao

Dia miondana eo ianao kanefa dia inoako
fa mbola renao ao ny fidoboky ny foko
Dia ho tadidinao ilay teny tamin'izany
Fa tsy ho vitanao raha ny hanadino ireo tantara mamy.

Fa mamy tena mamy raha ny fiarahatsika
fa angamba hoa ianao somary diabetika
ka tsy mahazaka mamy,
dia naleonao nakany...

Kanefa rariny ihany
Fa tsara raha hialana ny zava-mankarary

✍️MIHARISOA

12/12/2023

Inona ilay hira natolony ho anao? 🥺

02/12/2023

TSY NANADINO

Reko fa ianao hoe lasan'olon-kafa???
Nitselatra ny foko no somary nalaelo
Nanganohano kely nahatsiaro indray ny lasa
Dia ireo tantara mamy, zary tsiambaratelo.

Ny teniko fahiny hoe tsy ho vitanao ny hanadino an'ah
asa loatra angaha!?...fa toa nivadika ny rasa
toa lasa latsalatsa, ao anatiko ao ireny
fa izaho no tsy miteny, no sady koa tsy mino
fa lasa zaho indray no tsy nahavita nanadino...

Tsy mbola nanadino aho, fa iniako tsy tenenina
Ezahiko afenina...,tsy ataoko fantatrao akory
hoe tsy mahita tory aho mahatsiaro ny tantara
kanefa tsy hiverenako ny film efa hitako fa ratsy fiafara...

MIHARISOA

02/12/2023

Niakatra avoavo aho sao eto no ahatazanako
Hoe nandaitra taminao ve ny todin'ny fitiavako
Sa fampiononan-tsaina ve ilay hira tamin'izay!?
Hoe: "mbola ho avy ny andro ahatsiarovanao ahy" 🎶

ilay ora tsy ampoizimpoizina no mbola andrasana
Sa ve mandainga kosa ingahy Érick Manana!?

✍️MIHARISOA