Tononkalo KANTO

17/08/2026

" MPANDRESY ANAO "

Handray fitahiana lehibe ianao manomboka anio.
Ny fatorana sy ny fanahianao rehetra dia hario.
Raiso Jesosy Tompo mba hiditra an-tsehatra eo amin'ny fiainanao.
Fa izay natombokao dia tsy maintsy ho vitanao.

Angataho Ilay herin'ny Fanahy Masina mba hanolo-tsaina.
Sokafy ny varavaram-ponao toy masoandro izay miposaka vao maraina.
Omeo laka Jesosy mba hitoetra sy hanjaka.
Dia aoka ny tena sy ny fanahinao no hijoro sy hitraka.

Mifalia amin'ny fanantenana fa mpandresy ianao.
Ireo ady izay lalovanao izao dia tsy natao haharava anao.
Olon'afaka ianao sady efa voavidin'ny ràn'i Kristy.
Nateraka mba handresy fisedrana mandra-pahatongavanao ary! ( amin'ny tanjona ).

Miareta amin'ny fahoriana ary mahareta amin'ny fivavahana.
Reseo avokoa izay mety ho sakan-tsakana hibahana.
Aza atao hampihemotra anao fa vao mainka anangona hery.
Ho lehibe ny hiafarana koa matokia fa tsy miady irery.

Jesosy no itokio fa tsy maintsy vitanao io⚠️

འ.لąօʂìղ🗞️

16/08/2026

JESOSY IRERY IHANY NO ITOKIO 🖕

Ho anao izay mahatsiaro tena fa miady mafy any ho any.
Ity dia misy fampaherezana kely izay natokako ho anao.
Hafatra tena kanto no sady mampisinda ny tomany.
Ho zaraiko mba hampitraka indray mandeha ny lohanao.

Tsarovy izao hafatra izao fa mety hanampy anao bebe koa ()
Raha toa ka sendra misy ny mampijaly anao amin'ny fiainana.
Aza mifikitra aminy loatra fa tena mankarary an-doha.
Izany hoe : mitebiteby lava,tsy mba misy itarainana "
( mivavaha ).

Fantatro fa tsy moramora ilay misedra olana.
Kanefa dia aza atao fatorana na koa sakana hampijanona ❗
Fa ny famoizam-po lalina sy ny fanamelohan-tena dia tsy vahaolana.
Raha tena tianao tokoa ny ho lasa olom-banona.

Mijoroa amin'ny fahamarinana ry anina fa ny olona dia mety tsy hahatsapa.
Ny hoe " tena tia sady nijalijaly kely ianao ry fitiavana 💓 ".
Nanao izay kely mba ho vitanao ianao fa impiry impiry moa izay no efa naratra ?
Aza kivy e,
Fa ilay adinao sy ny fitiavanao mangina dia misy mahatazana.

Mazana ny fiainana fa kosa dia mbola eto foana ianao no mijoro.
Mamakivaky ny onja mahery sy ny alina migaina.
Aoka ny fonao mba tsy ho kivin-torotoro 😓Mahereza sy mahatanjaha ary manàna herin-tsaina.

Mahery hatrany ianao ary koa tsy mba irery.
Na firifiry aza izay efa nandao anao sy mbola sedrainao anio.
Tsy mila kivy e,
Averiko foana ombieny ombieny...
Mafy fa tsy maintsy vitanao foana io,
( Jesosy irery ihany no itokio )

འ.لąօʂìղ 🗞️

15/08/2026

APETRAKO AMINAO 🛐

Ray ô,
Apetrako aminao ny fijaliako rehetra eto !
Izay mety ho lalam-pitondranao ny fiainako dia ijoroako sady ekeko.
Fa ny fihevitro dia tsy mba fihevitrao, hoy Izy anao raha nanambara.
Ka manaiky ny fandaharanao aho Tompo ô,
satria dia tsy mahalala.

Ray ô,
Apetrako aminao ny faniriako rehetra izay mbola tsy tanteraka.
Hambino amin'ny zavatra ataoko aho mba tsy ho kivy na dia reraka.
Fa tsy moramora tokoa ny mibanjina an'ireo tanjona izay irina(...)
Miady mafy amin'ny fiainana e,
ka mahatsapa fijaliana.

Ray ô,
Apetrako aminao ny fanahiana rehetra izay any anatiko.
Valio vavaka aho Tompo ô, fa izao no mba tena satriko.
Hody fifaliana avokoa ireo ranomaso izay nozakaiko 😓
Ho mpandresy aho ao aminao ary hody venty ilay rano nantsakaiko.......................AMEN 🙏🛐........................

འ.لąօʂìղ 🗞️

14/08/2026

" MISAOTRA JESOSY Ô "

Tsy misy Tompo afa-tsy Anao Jesosy ô.
Manaiky ny tenako mba ho Anao Jesosy ô.
Tsy misy hery afa-tsy Anao Jesosy ô.
Faingana fa mila ny herinao Jesosy ô.
Tsy misy lalana afa-tsy Anao Jesosy ô.
Ny foko♥️ no varavarana idiranao Jesosy ô
Tsy misy fahamarinana afa-tsy Anao Jesosy ô.
Ny fanakianana dia tsy hamoizako anao Jesosy ô.
Tsy misy fiainana afa-tsy Anao Jesosy ô.
Lavitra ny fanaintainana raha miaraka aminao Jesosy ô.
Tsy misy fahasambarana afa-tsy Anao Jesosy ô.
Na inona hitsivalana; izaho tsy ho lao Jesosy ô.
Tsy misy fiadanam-po afa-tsy Anao Jesosy ô.
Omeo anay ny soa avy any aminao Jesosy ô.
Tsy misy ny tena tia afa-tsy Anao Jesosy ô.
Manatreha o! Avia fa mitady Anao Jesosy ô.
Tsy misy tanteraka sy lavorary afa-tsy Anao Jesosy ô.
Ny momba anay dia amboary mba ho mendrika Anao Jesosy ô.
Tsy misy mahay manafaka afa-tsy Anao Jesosy ô.
Ny efa reraka sy solafaka dia atsangano Jesosy ô.
Tsy misy mahay mampijoro afa-tsy Anao Jesosy ô.
Inty foko torotoro no ankalazako Anao Jesosy ô.
Tsy misy reharehako afa-tsy Anao Jesosy ô.
Izaho dia kely fa Ianao no lehibe Jesosy ô.
Tsy misy hafa itokiako afa-tsy Anao Jesosy ô.
Na mafy aza ny fijaliako; izaho tsy hiala aminao Jesosy ô.

▶https://www.facebook.com/profile.php?id=61550523175203

འ.لąօʂìղ🗞️

13/08/2026

INDRAY ANDRO ANY...

Dada a,
Tsapako fa fitiavanao ahy no anton'izao.
Ka mba satriko ny hanoratra tononkalo ho anao.
Manoloana ny ezaka rehetra izay nataonao tamiko hatrizay.
Eto indrindra izaho zanakao dia mba maniry mafy hoe : " ampy 'zay ❗ ".

Dada a,
Mafy tokoa ny fijalianao fa ianao dia mbola tsy henoko nitaraina.
Fantatro amizay ry dada fa,
any anatinao any dia misy hetaheta tsy hay lazaina.
Mafy aminao fa miezaka foana ianao, manao ny ainao tsy ho zavatra.
Ontsa loatra ny fon-janakao ka mba hitondra anao am-bavaka.

Ray ô,
Tahio manokana iny dada malalako iny,
Tahio amin'ny asa fivelomany izy mba hahazoany izay iriny.
Ary omeo fahendrena ihany koa izahay zanany mba hahay hahazo sy hahatsapa.
Fa ny tanjon'ny dada aminay dia lehibe sady lalim-paka.

Dada a,
Mino sy matoky aho fa mbola ho tafita isika mianakavy.
Ankino amin'Andriamanitra mandrakariva fa ilay anjarantsika mbola ho avy.
Eto izahay zanakao dia hiezaka mba hitsinjo ny any afara.
Mbola ho tafita isika indray andro any e,
Izay fotsiny no tiako ambara 🙏🛐

འ.لąօʂìղ 🗞️

13/08/2026

MIVALO AMINAO 🛐

Ray ô,
Inty aho, ilay zanakao izay nania.
Efa diso lalana ka hiverina aminao.
Mba jereo kely izato foko manjoria.
Fa manenina noho ny ditra izay natao.

Ray ô,
Tsy tonga ianao mba hiantso ny marina.
Fa ny mpanota mba hibebaka tokoa.
Mivalo aminao aho ka hatsangano ho tafarina.
Tsy hanao tsinontsinona fa hanompo Anao Jesoa.

Ray ô,
Ho any amin'iza moa aho raha tsy ho any aminao.
Fa ny fahasoavanao no mbola mahatoy izao.
Mamindra fo amiko raha toa ka sitrakao.
Ny ota sy ny fahotako rehetra dia mba avelao.

Ray ô,
Apetrako aminao izany vavaka izany.
Fa Ianao irery ihany no mahay manafaka ny tenako.
Ka etoana dia tsy tanako intsony ilay tomany.
Noho ny efitra lehibe nampisaraka ahy taminao izay efa nanenenako.

Ray ô,
Mivalo aminao aho koa mba raiso an-tanan-droa.
Fa tena tsapako tokoa ilay fitiavanao ahy.
Havaozy ny fiainako mba hiatsara sy hihasoa.
Ho lavitra ny fatorana mbamin'ny fakam-panahy.

Ray ô,
Tsy avelako mihitsy ianao raha tsy mandray ny fivalozako.
Fa lozako ny heloko raha tsy hibebahako aminao.
Ka manomboka izao dia ny vavaka no atovon-tovoko.
Fa maniry mafy ny foko mba tsy hiala amin'ny fanatrehanao.

འ.لąօʂìղ 🗞️

13/08/2026

NY FANANTENAKO 🖕

Tsy ho foana ny fanantenako raha mbola misy koa ny farany.
Inoako sady antenaiko fa ny olombelona rehetra dia samy manana ny anjarany.
Ka tsy hilavo lefona ny foko raha toa ka mbola mitempo.
Tohizako hatrany ny lalako na dia misy aza ireo zava-mampisento.

Ekeko fa tsy maintsy miadiady kely aloha vao mandresy.
Ny lasa momba ny lasa ka ataoko lesona ho ahy avokoa izay rehetra tsy nety.
Fa eto aho dia mbola vonona ny hitraka sady hiaritra.
Koa tantano sy tahio aho ô ry Tompo sy Andriamanitra.

Ray ô !
Any aminao ny no hametrahako ny fitokiako manontolo.
Misy fotoana dia reraka aho indraindray, fa mahery ihany rehefa avy eo, noho ianao ilay mampijoro 🛐
Tsy miady irery mihitsy aho satria efa miaraka aminao mandrakariva.
Na tsy fantatro aza izay mety ho lalam-pitondranao ahy dia efa azoko antoka fa tsara rindra.

Tsy ho foana ny fanantenako noho ny aminao irery ihany.
Ny olana rehetra izay mihatra eo amin'ny fiainako dia antenaiko fa tsy ho mandrakizay izany.
Mandalo avokoa ny fijaliana sy fanaintainana amin'ny vatako.
Na ho ela na ho faingana ilay tanjoko dia tsy maintsy ho tratrako.
Jeso apetrako aminao 🖕🙏🛐

འ.لąօʂìղ 🗞️

12/08/2026

" HAFATRA HO AN'NY LEHILAHY "

Ry lehilahy!.....

Isika dia mila mamantatra foana ny hoe : " inona no tokony hataoko mba hahafa-po tanteraka ny olon-tiako ?
Inona no tena ilainy avy aty amiko eo amin'ny fisiako ?
Fantaro tsara fa ny vehivavy dia fatra-pitady an'izay mety ho fifaliany.
Ka inona ary ny vaha olana amin'izany mba hahatonga an'ny lahy tena tiany ?

Eo ihany ny hatsarana ety ivelan'ny maso fa ireto avy no tena mahamaika.
Tsy mila mampirafy an'azy mihitsy ialahy sao dia taraika.
Tia anao izay izy matoa saro-piaro eny amin'ny fiarahanareo roa.
Aza atao kitoatoa ilay fitiavana omeny fa hajao tsara tokoa.

Tsy ampy azy ialahy raha toa ka tsy mahay mijery ny fisiany( eo amin'ny fiainanao ).
Avelao avokoa izay tsy izy fa mora miteraka fijaliany(...)
Hajao sy karakarao tsara izy mba hahatonga an'azy ho tavela.
Rehefa sendra maloka ny tavany dia ampangino mba tsy honena🥲.

Tohano tsy ho lavo izy; manoloana izay kely mba tokony ho vitanao aminy.
Ary aza asiana tambiny na dia kely akory aza ny efa laniny.
Mitiava ny maminy amin'ny maha izy azy fa efa hainao ihany ny vehivavy.
Ataovy izay hampaharitra ela ny fitiavanareo roa mba tsy hanakabona ny tady( fifamatorana ❤️‍🩹).

Mahatsapà diso rehefa diso fa aza miandry azy hiteny mialohanao.
Aza dia araraotina loatra ilay fahatsorany sao dia hanenenanao.
Fa noho ny fitiavany no mahatonga an'azy mbola mandefitra lava.
Satria tiany loatra ianao sy izy mba hifampatoky sy hifanaja.

Aza miova lesy;
Tano ny azo fa sarotra ny mila.
Betsaka ny tia an'azy fa ialahy no efa sanjila.
Noekeny tamin'ny fony ialahy ary nametrahany ny fitiavany.
Namoizany an'ilay tanàna nihaviany sady nandaozany any ireo havany.

འ.لąօʂìղ🗞️,

12/08/2026

11/08/2026

" HAFATRA HO AN'NY VEHIVAVY "

Ry vehivavy !...

Omeo fotoana kely ny tenanao mba hamaky izao hafatra izao.
Raiso amin'ny fo feno fitiavana fa mety mahasoa anao.
Tsy natao hampisaraka izao tononkalo izao fa natao mba ho fanabeazana.
Aza gaga mihitsy ianao raha mahita ireo teniko somary mazamazana ( mivantana sady mahitsy ).

Ry vehivavy !

Mitandrema ianareo amin'ny resaka fitiavana io.
Ravaky ny tokan-trano ange ianareo e! Izay no tadidio.
Izany vehivavy izany dia olona mendrika sady vanona.
Mitsinjo ny taranany mba ho lasa olom-banona.

Ry vehivavy !

Fantaro tsara ilay olona izay hoekenao ho vady.
Tandremo sao dia mahazo lehilahy mampiady.
Fa betsaka ny lehilahy mampirafy etsy sy eroa...
Samy tiany ho azo daholo na i rafotsy na i rasoa.

Ry vehivavy !

Sahiko ny milaza fa misy lehilahy tsy manjary.
Tsy mataho-tody mihitsy no tsy mavozo Zanahary.
Tsy misy raharahiany anao intsony rehefa azony izay notadiaviny.
Eo imason'ny tena tiany ianao dia tsipahiny sady laviny ( Hodiany tsy fantatra ).

Ry vehivavy !

Aza mora babo be loatra fa indraindray io teny io dia mamitaka.
Rehefa misy olona mikoty anao any ambadika any dia aza maika ny hibitaka.
Fa ny tory fitia sy ny hatsarana dia tsy mahalaza ny ao anaty.
Avelao handeha aloha ny fotoana ka tandremo ilay fitia sao dia mora maty.

Ry vehivavy !

Hajao ny tenanao raha tianao ny hahazo lehilahy manaja vady.
Amboary tsara ny fitafianao mba tsy hitondra fakam-panahy mamoa-fady.
Raha ny fitanjakao fotsiny no nanaitra an'ilay bandy dia izao no tsarovy.
Ny filàna izay no mahamaika an'azy ka dia mety hampitsipozipozy.

Ry vehivavy !

Rehefa hitia ianao dia aleo ihany ny manam-bady an'ilay olona efa hitanao fa matahotra Zanahary.
Manaja anao sady tia anao izy ary koa tsy mampijaly.
Manana vinavina sy fitiavana matotra eo amin'ny fiarahanareo roa.
Anjaranao ny misafidy koa fantaro tsara izay mahasoa.

འ.لąօʂìղ 🗞️