Tononkalo KANTO

15/05/2026

" VAVAKA AMIN'NY FOTOAN-TSAROTRA ✝️ "

Ray ô!
Mino aho fa mahita ahy ianao izao.
Mitalaho sy miangavy raha toa ka sitrakao.
Jereo amin'ny fitiavanao ilay foko izay mibitsika.
Fa manoloana ireo olako indraindray dia manitikitika.

Ray ô!
Omeo hery aho mba hahafahako hijoro foana.
Ny fiaretako sy ny fikelezako aina anio dia aza avela ho zava-poana.
Tolory fahendrena inty mpanomponao mba hahay hamisavisa.
Ny hoe : " Inona no tokony h'ataoko mba hahatonga ahy ho tafita? "

Ray ô!
Amboary ny fiainako mba handroso lalandava...
Ianao no antenaiko ry Fanahy mpanazava.
Hazavao ny lalan-kizorako mba tsy hisy rahoraho.
Ho lavitra ny rihoroho sy ny zahozaho.

Ray ô!
Misaotra anao sahady aho amin'ny finoako sy ny fanantenako.
Mamindrà fo amiko tamin'izay nety ho fahotako.
Amin'ny anaranao Jesosy no anaovako izany vavaka izany.
Ho mpandresy anie izay rehetra matoky anao any ho any..........................AMEN...........................

འ.لąօʂìղ 🗞️

14/05/2026

" NENINA 😢 "

Ny nenina dia tamberina noho ny lasa.
Tsy azo averina intsony rehefa tsy zaka.
Ny nenina dia alahelo izay mifangaro fahadisoam-panantenana.
Mety ho vakatry ny safidy izio na koa hadalana.

Ny nenina dia ratsy foana mandrakariva.
Ho any tompony ihany fa tsy azo afindra.
No miaritra sy mizaka izay mety ho voka-dratsiny.
Mahatsiaro tena fa nitelina izay fatsi-patsiny.

Ny nenina dia azo sorohina mialoha.
Amin'ny alalan'ny safidy tsara sy ny fanaovan-tsoa.
Mampiala nenina ny saina mba tsy ho any an-davaka.
Dia ny fitiavana sy famindram-po ary ny vavaka.

Ny nenina dia tsy mandeha aloha fa any afara.
Raha misy olona tia anao dia karakarao tsara.
Sanatria ka tena tsy anjara dia afaka ny adidinao.
Tsy natao hifanerena akory ny fitiavana rehefa tsy misy azo atao.
https://www.facebook.com/profile.php?id=61550523175203
R.لąօʂìղ 🗞️

14/05/2026

13/05/2026

" ILAINA KOA NY MANDEHA IRERY INDRAINDRAY "

Amin'ny fiainana dia ekena fa tsy misy mahavita tena.
Mandia tany tsy maintsy ho solafaka ary miloloa lanitra koa mety ho lena.
Fa fahendrena dia ny mandinika sady mandray lesona tamin'izay nety ho tsy fahatomombanana.
Ka ny saina am-panahy no atao matanjaka tsara mba tsy ho rendriky ny sampanana 💔

Satria manko dia izao :
Tsy voatery ho afaka hanampy anao foana ny olona.
Mila mianatra mandeha irery koa ianao indraindray rehefa mitolona.
Ary mila mahay mankasitraka sy mionona amin'izay efa anjara.
Fa matoa tsy tanteraka ny sorona dia angamba mbola ao afara...

Mianara manetry tena ka dia aza mifikitra intsony amin'izay efa hitanao fa tsy nety ( tamin'ny safidinao ).
Mihainoa ny feon'ny fieritreretana mba hanosika anao ho mpandresy.
Dia ataovy mifanesy ireo vavaka mangina arahan'asa.
Matoky an'Andriamanitra amin'ny fonao rehetra fa tsy maintsy ho tafa.
Ianao izay mamaky ity hafatra ity 🙏
https://www.facebook.com/profile.php?id=61550523175203
འ.لąօʂìղ 🗞️

13/05/2026

HAFATRA HO AN'NY LEHILAHY 💌

Ry lehilahy!.....

Isika dia mila mamantatra foana ny hoe : " inona no tokony hataoko mba hahafa-po tanteraka ny olon-tiako ?
Inona no tena ilainy avy aty amiko eo amin'ny fisiako ?
Fantaro tsara fa ny vehivavy dia fatra-pitady an'izay mety ho fifaliany.
Ka inona ary ny vaha olana amin'izany mba hahatonga an'ny lahy tena tiany ?

Eo ihany ny hatsarana ety ivelan'ny maso fa ireto avy no tena mahamaika.
Tsy mila mampirafy an'azy mihitsy ialahy sao dia taraika.
Tia anao izay izy matoa saro-piaro eny amin'ny fiarahanareo roa.
Aza atao kitoatoa ilay fitiavana omeny fa hajao tsara tokoa.

Tsy ampy azy ialahy raha toa ka tsy mahay mijery ny fisiany( eo amin'ny fiainanao ).
Avelao avokoa izay tsy izy fa mora miteraka fijaliany(...)
Hajao sy karakarao tsara izy mba hahatonga an'azy ho tavela.
Rehefa sendra maloka ny tavany dia ampangino mba tsy honena🥲.

Tohano tsy ho lavo izy; manoloana izay kely mba tokony ho vitanao aminy.
Ary aza asiana tambiny na dia kely akory aza ny efa laniny.
Mitiava ny maminy amin'ny maha izy azy fa efa hainao ihany ny vehivavy.
Ataovy izay hampaharitra ela ny fitiavanareo roa mba tsy hanakabona ny tady( fifamatorana ❤️‍🩹).

Mahatsapà diso rehefa diso fa aza miandry azy hiteny mialohanao.
Aza dia araraotina loatra ilay fahatsorany sao dia hanenenanao.
Fa noho ny fitiavany no mahatonga an'azy mbola mandefitra lava.
Satria tiany loatra ianao sy izy mba hifampatoky sy hifanaja.

Aza miova lesy;
Tano ny azo fa sarotra ny mila.
Betsaka ny tia an'azy fa ialahy no efa sanjila.
Noekeny tamin'ny fony ialahy ary nametrahany ny fitiavany.
Namoizany an'ilay tanàna nihaviany sady nandaozany any ireo havany.
https://www.facebook.com/profile.php?id=61550523175203

R.لąօʂìղ 🗞️

11/05/2026

" NY FIAINAKO REHETRA DIA AVY AMINAO "

Fanahy Masina ô;

Etoana dia mitalaho aminao inty zanakao.
Izay efa trotraka tamin'ny adim-piainana.
Mba tantano sy arovy eo ambany elatrao.
Fa mahatsapa hirifiringidim-panaintainana.

Fanahy Masina ô;

Misy fotoana izaho dia tena reraka tanteraka.
Miezaka mitraka fa mbola mitady ho ketraka.
Reraka aho Jesosy ô; indro dia miandrandra ny herinao.
Tena tsapako mihitsy e; fa tsy mahefa n'ino n'inona aho raha tsisy Anao.

Fanahy Masina ô;

Hatanjaho ny tena sy ny foko ary ny saiko.
Izay mety ho lalam-pitondranao ahy dia tena tsy haiko.
Koa ampianaro ny foko mba hahay hankasitraka foana foana.
Tsy ho kivy sanatria na dia mafy aza ny manoloana.

Fanahy Masina ô;

Tafio ny herinao aho mba hiatrehako ny adim-piainako.
Miangavy Anao an-tanan-droa mba hamaly an'izao fitarainako.
Mila Anao hatrany hatrany aho satria dia toy ny ireny sampam-bonin-kazo🥀
Raha toa ka misaraka aminao aho dia ho very maina sy halazo ( miezaka mba maniry fa tsy mahazo ).

Tsy kivy aho Jesosy ô fa mbola matoky Anao.
Ny fiainan-koaviko rehetra dia apetrako aminao.

འ.لąօʂìղ 🗞️

10/05/2026

" MAHAIZA MISAFIDY✔️ "

Aza midongy ny hiaraka amin'olona efa manam-bady.
Mba tsy hanahirana ny fifandraisanareo roa sy ny azy.
Mialà moramora fa io fitiavana io dia tsy natao ikambanana.
Tsy hoe zavatra na kilalao akory ka dia hiaraha-manana.

Ho anao izay maniry ny fitiavana haharitra ela.
Aza ny vadin'olona efa hitanao ireny no jerijerena.
Miandrasa an'ilay tena tia sy manaja anao amin'ny fony.
Avelao zareo roa amin'ny fahasambarany ka mahaiza ianao mitony.

Tiany io vadiny io fa ianao dia ataony fangalana ny tsy mahita.
Miarakaraka eny foana ianareo roa; saingy izay dia vita!
Olon-kendry ianao ka tsy tokony hanao tsinontsinona ny fahatanoranao.
Fa raha tsy mitandrina dia ho potika eo ny ho avin'ny fiainanao.

Eto ampamaranana ary dia manasa anao aho mba hieritreritra.
Raha tia anao marina tokoa moa izy dia nahoana no tsy mety miherika.
Mahalalà tsy tiana rehefa izay ny fandehan'ny tantara.
Ataovy any an-tsaina foana ny hoe ianao dia manana tanjona tsara ( Ho anao sy ny ankohonanao ary ny firenenao ).

འ.لąօʂìղ🗞️

09/05/2026

" TSY RESY AKORY IANAO RAHA MANGINA "

Mahaiza mangina rehefa izao.
Misy olona mitady ady aminao.
Mangina no tokony hataonao.
Mba tsy hampirehitra ny fahatezeranao.
" Avelao izy himonomonona eo "

Mahaiza mangina fa aza mimenimenina.
Aza be tatasiaka laotra fa mampanenina.
Ny miteniteny zavatra tsy tokony holazaina.
Mahafa-baraka tena sady mandatsak'aina.

Mangina rehefa misy zavatra tianao hatao samirery.
Avadi-badiho impito ny lelanao mba tsy hampiely ( ny fandaharanao ).
Na ny fidiram-bolanao izay ao anatin'ny tokan-tranonao.
Tazomy ho tsy ambara telonao sy ny vadinao.

Ny lafim-piainana manontolo mihitsy no aza atao fantatry ny be sy ny maro.
Asio ihany ilay fetra fa tsy fantatrao izay fahavalo.
Mahaiza manakombom-bava mba hahafahanao mandroso amin'ny lalin-dalina...
Aza manaiky ho baikon'ny fonao fa diniho ny tena marina.

Ka inona ary ny tokony hatao mba hahaizana mifehy tena.
Manàna fitoniana hatrany fa izay no fahendrena.
Ho fisorohana ny fifamaliana sy ny tsy fahatomombanan'ny vina.
Miezaha mifehy tena ary mahaiza miasa mangina.

འ.لąօʂìn 🗞️