Tononkalon'ny Tanora

Tononkalon'ny Tanora "Pejy natao ho antsika tanora tia sy mamorona Tononkalo"

20/12/2016

NY TENA TIA

Ny tena tia tsy mba mahafoy
na miady aza indraindray,
Fa satriny foana hanohy
ireo fiarahana hatrizay!

Ny tena tia raha saro-piaro
tsy hoe tsy matoky velively,
Fa izao ny antony ka fantaro:
tiany ianao ho azy irery!

Ny tena tia tsy mba mahay
mampirafy anao izany,
F'ianao ilay tokana iray
tiany indrindra eto an-tany!

Ny tena tia tsy mba manolo
na miaraka amin'ny hafa intsony,
F'efa nomeny anao daholo
ilay fitiavana ao am-pony!

Ny tena tia ihany koa
dia fitia no tadiaviny,
Fa tsy mitady tombon-tsoa
amin'ny olona tiaviny!

TOLOTRA HARINIAINA,
27/09/2016

AVELA...malala a,Avela ho tezitra izay tezitramahita antsika miara-dia,Fa ho sasa-poana izy raha mihevitrahoe handrava i...
28/10/2016

AVELA...

malala a,

Avela ho tezitra izay tezitra
mahita antsika miara-dia,
Fa ho sasa-poana izy raha mihevitra
hoe handrava ilay fitia!

Avela handrava izay handrava
ilay fitiavantsika mifamaly,
Fa io mitoetra lalan-dava
na dia somparan' ny tsy faly!

Avela hiteny izay hiteny
sy hanakiana tanteraka,
Fa rehefa ela ny ela ireny
hangina ihany rehefa reraka!

Fa ny fitiavantsika roa
tsy ho resin'ny fotoana,
Tsy ho voakosika ao am-po
fa mitoetra foana foana!

Ny fitiavantsika koa
tsy ho ravan'ny mpanenjika,
F'efa mafy o***a matoa
hatrizao tsy mety rendrika!

TOLOTRA HARINIAINA. 25/10/2016.

28/10/2016

Volampeno Aina Mi'Rajo
Tiavo amin'ny fahalemeny
Ny olon.tianao
F'aza tiavina amin'ireny
Hatsarany izao sy izao.
Tiavo amin'ny fahantrany
Ny malalanao
F'aza tiavina amin'izany
Harena mety handao..
Tiavo amin'ny toetra ratsiny
No koa ezaho hahitsy
Dia ho tsapanao ny fafin'
izany tia amin'ny zava.misy.
Raha tena tia marina ianao!!!

24/10/2016

Ny hany paradisako?
Ny anilanao ihany
Ny hany fiononako?
Ny angolanao miteny
Ny molotrao mitsiky
Masoandro vao maraina
Ny masonao mikipy
Manala sento, taraina..
Ny anilanao ry tiako
No mamiko indrindra eto an-tany
Loharanom-pifaliako
Ianao irery ihany
Ilay orokao mipetaka
Eo imolotro iny
Sy ny bitsikao malefaka
Mibitsika teny mamy
Milaza sesilany
Tiako sy lalaiko..
Mbola ihany paradisako
Ianao miondana eto an-tratrako
Fa ihany koa ankafiziko
Rehefa ianao ka mangatsiaka
Mamihina ahy mafy
Mifikitra tsy miala
Arahin'oroka manify
Omban-teny tena mamy..
Koa raha misy paradisa hafa
Ankoatra ny eo anilanao
Dia inoako aho fa tsy ho tafa
Raha tsy miaraka aminao
ANDRI NY AINA ( A.N.A.H )

19/10/2016

" FO MIFANKATIA "
_________________
Tsy hifanary ao anatin'ny sarotra
Fa hifanohana foana na inona hitranga
Hijoro isika fa tsy hanan-tahotra
Ho diavintsika ny lanitra manga
_

Hifanohana foana na misy mandrava
Hiaraka isika hisedra ny mafy
F'ireo mpankahala aleo hitabataba
Ny fitiavantsika malala tsy ho faty a!
_

Aleo anaratsy any ireo mpankahala
Tsy tampenam-bava fa aleo izy iteny
Mpanenjika ireny, tsy maintsy ao afara
Himbona isika handresy an'ireny
_

Na kotro-baratra mafy dia mafy
Na avandra hifafy hamotika voly
Ny fitiavantsika dia tsy mety maty
Mafy fatorana ka tsy hivaha intsony
_

Na hisy orambaratra mafy mikija
Na herikerika handama ny làlana
Tsy hisy ahasakana na iza na iza
Fa vonona isika na hiady fiakarana
_

Na rahona mainty manako-masoandro
Manembatsembana ny azavana
Na enjika, heso, maraina sy antonadro
Ny fitiavantsika vao maika mafana
_

Na inona hidona na inona hitranga
Dia vonona isika ny hiara-dia
Na rahona mainty na lanitra manga
Ny antsika fitiavan'ny fo mifangia
_

Safidy ny antsika niaraha-nanao
Anjara sy lahatra avy amin'ilay Ray
Mitantana antsika ilay ao ambony ao
Niara-nivoady ho mandrakizay
_

Tsy mba ho rava na ho voahozongozona
Fa fitiavana matotra tsara fitoetra
Tsy mety misava na misy manozona
Ny antsika fitiavana tsy manam-petra
_

Etsy ho helofako helo ny tiako
Ny fo-ntsika roa no ndeha hiara-dia
Hifampisakambina isika sy 'ndriko
Mba ho porofon'ny tena fitia.
..

ZRMD
A i n g a s y A k o
03/09/2016

11/10/2016

Raha ny fiainan'ny nofo
Eto ambanin'ny masoandro
Toa lavitry ny rotsy
Fa matetika ilaozan-tiana andavanandro...
Nofo moa ny foko mitia
Ka potiky ny ratra mazana mitamberina
Nivoady ho mandrak'izay, no hitia
Nefa ny ampitso dia feno rà hatramin'ilay penina...
Hovonoiko angamba aloha ny nofo
Mba tsy hisin'ny hirifiry anaty
Ho tontolon'ny amboroha
Any angamba ny fitia tsy mba handratra...
Tontolo iray tsy hisin'ny nofo
Mety tsy hisy intsony angamba rà
Hanosin'ilay penina fanoratro
Ka hanjaka amin'izay ny aingam-panahy...

01/08/2016

SAMY VITA

Tojo andro lohataona
ilay foko fa afa-tsaona
Fa nahita olom-baovao
hisolo ilay toeranao

Adinoko hatreo ny lasantsika
nitondra toloko sy hatsiaka
Ny lani-pitiavako niova ho manga
fa nisy nisolo ilay toeranao banga

Koa raha solafaka any ianao sanatria
aza mitonatonana intsony aty
Fa ianao efa nosoloiko
efa lasan'olona ny foko

Tsy izaho no nanadino anao vetivety
fa ianao no naverina fa tsy nety
Ka ialako tsiny amin'ny fihavanana
raha toa aho ka mba hanasa tanana

13/06/2016

TOKAM-PO MANIRERY

(VENTSON'IREO MBOLA TIA FA NISARAHANA)

Na aza ianao tsy ahy intsony
Fa lasan'ny hafa re ry tiana;
Dia ny foko tsy mitony
Fa mitempo ho anao mangiana!

Na aza ianao efa nifindra
Ka niova lasy re ry tiana;
Dia mbola ianao no tiako indrindra,
Ka tsy soloiko na oviana!

Na aza ianao tsy maty afoy
Sy tsy velon-kantenaina;
Dia ny foko kosa mbola hanohy
Hitia hatramin'ny fara-fofon'aina!

Na aza ianao efa nikosoka
Ilay anarako tao anaty;
Dia ny anaranao tsy foiko atosika,
Fa ato am-poko mandra-maty!

Na aza ianao namela irery
Sy nanary re rahavako;
Dia tsy mampiova velively
ny halehiben' ilay fitiavako!

Fa tiako loatra mantsy ianao
Ka tsy vitako ny hamafa;
Na hanova sy hanavao,
Fa indrindra hitia ny hafa!

Efa ianao no ilay safidy
notsongaiko tamin'ny maro;
Efa ianao ilay sarobidy,
ato am-poko tsy afangaro!
..Ka ho tiavi-mandry maty!

12/06/2016

POROFO FA TIA...

Tsy oroka sy safosafo
na ny tambitamby rehefa mihaona;
Tsy ianao mividy zavatra lafo
ho an'ny olon-tianao foana,

Rehefa ianareo ilay miara-dia
no porofo fa hoe TIA!

FA :

Ianao ilay tsy mamela irery
tsy mamela azy hangiana,
Fa mampitraka mampahery
raha toa izy sendra fahoriana!

Ianao ilay tsy mba mialangalana
fa manitsy azy avy hatrany,
Raha toa izy diso lalana
fa olombelona ihany!

Ianao ilay maneho fandeferana
rehefa ianareo miady,
Ka tsy mitahiry hatezerana
fa ny ampitso dia mamela azy sahady!

Ianao ilay miantso azy foana
ka milaza teny mamy,
Fa tsy miandry rehefa mihaona
vao hanonona an'izany!

Ianao ilay manaja ny fitiavany ao anaty
sy ny safidim-pony,
Ka azy irery mandra-maty
Fa tsy te hitady hafa intsony!

Raha ireo rehetra ireo no to
Dia porofo manambara:
Fa tena tianao ilay akaikin'ny fo
Izay nofidianao mba ho anjara!

TOLOTRA HARINIAINA,
11/06/2016.

Address

Antananarivo

Telephone

+261349522603

Website

Alerts

Be the first to know and let us send you an email when Tononkalon'ny Tanora posts news and promotions. Your email address will not be used for any other purpose, and you can unsubscribe at any time.

Shortcuts

Share

Category