12/09/2023
Ireny Kintana ...
Ireny kintana eny ireny dia malala nodimandry
Any ankoatrahoatry ny aina sy ny fotoana sy habakabaka,
Ireny zavozavo ireny, vovok’aina mbola miandry
Ny firendriny ho tsiahy na andalan-tonom-bavaka...
Ireny kintana eny ireny, pitik’afo tamin’ny fo
Raha niredareda teto ireo fitiavana mahery ;
Iny mangan-danitra iny dia lavenona avokoa
Izay manditsoka ny maso feno hanina mijery.
Ireny kintana eny ireny, fantsipantsika miranga
Nanomboana rahalahy teto an-kibon-tany hay ;
Iny mangan-danitra iny, ra tsy maina vao miampanga
Fa tsy mbola mety ritra ireo vonoana hatrizay.
Ireny kintana eny ireny, ravaravan-drarivato
Tamin’izao tontolo izao saika hatsangana ho lanitra
Kanjo helo no natao fa ilay asa dia naato,
Ary misy izao mankany hanontany an’Andriamanitra.
Ireny kintana eny ireny dia litera izay niraraka,
Misy soratr’andronao azo novakin-tsy miambatra
Saingy nokobonina izy, dia voadona ka nihahaka
Ary fe ankehitriny, tsy azon’iza na iza atambatra.
Ireny kintana eny ireny, vony manitry ny laza
Natsikafon-drivo-maina eny ankilahila ambony ;
Ireny kintana eny ireny, na mamirapiratra aza,
Tsy mazava, tsy mahiratra amin’itony tany itony.
Ireny kintana eny ireny, maso, sofi-marobe
An’ny tompontsika hendry izay variana milalao,
Ireny kintana eny ireny ; tsy mahita, tsy mandre
Na ny hadalana etoana, na ny fivavahanao.
Ireny kintana eny ireny, sambo kely telo arivo
Feno hala-tsarobidy ‘ndeha havarina any ho any...
Ary ilay mangabaka iny dia seranana marivo
Feno lalina mandrevo, mampilatsaka eto ihany.
Ireny kintana eny ireny dia tohizam-boahangy raraka
Teny am-bozon-jazavavy norobaina teny an-dàlany ;
Iny mangan-danitra iny, ranomasina malalaka
Nilentehany ho Saina ho rantoin’ny malalany.
Ireny kintana eny ireny dia masoandro mipariaka
Amin’ny làla-mandronono an-jepizepin’ny fisiana ;
Ireny zavozavo ireny, vovo-kintana mandriaka
Na enton’afo mifandramby hivonganam-pahariana.
Randja Zanamihoatra
