لحظة

لحظة لحظة 🤌
ضحك بنكهة الصداع 🤦‍♂️
نقد ساخر لواقع الصويرة اليومي
من الحفرة حتى القرار ❗

🌙 رمضانيات (الحلقة 2)عبيقة المقطوع… بطّال رسمي و صايم موسميهو ماشي بطّال…هو “قيد الدراسة” من شي عشر سنين.رمضان عندو كيبد...
20/02/2026

🌙 رمضانيات (الحلقة 2)
عبيقة المقطوع… بطّال رسمي و صايم موسمي
هو ماشي بطّال…
هو “قيد الدراسة” من شي عشر سنين.
رمضان عندو كيبدأ مع العصر.
قبل منو؟ راه فمرحلة “السبات التعبدي”.
كتدوز عليه الضو، الضجيج، الدنيا كاملة… و هو فالفراش، داير رجل فوق رجل، كأنه خدام فالحلم ديالو.
كتسمعو مو يقول:
– نوض را الشمس طلعات!
كيجاوبها من تحت الغطاء:
“غير خلييني نتقرب من الله بشوية صبر.”
كيفيق مع الرابعة، شعر مشلّط، وجه منفوخ، عينيه نص مفتوحين…
كيخرج للحومة بحال شي فيلسوف مفصول من الجامعة.
ديما مقطوع.
مقطوع فلوس.
مقطوع نية.
مقطوع حتى من الحلم.
إلى شي واحد قال ليه:
– دير شي CV.
كيجاوبو:
“رمضان شهر راحة نفسية.”
ولكن…
غير كيضرب المدفع و يفطر،
كيوقع التحوّل الأسطوري.
يشرب الما،
يضرب الحريرة ضربتين،
يمد يدو للشباكية بلا رحمة…
و منين “يفطر الحال” 😏
كيشعل الݣارو،
كيجلس رجل على رجل،
كيطلب قهوة سوداء “ثقيلة بحال ظروفي”،
و فجأة…
كيولي محلل سياسي اقتصادي اجتماعي عالمي.
كيقول:
“المشكل فهاد البلاد هو سوء توزيع الفرص.”
و هو ما وزّع حتى نهارو بين السرير و القهوة.
كيحلف ليك بلي غير يعيطولو شي واحد يخدم…
و هو تلفونو عامر غير بـ باقات منتهية الصلاحية.
فالليل كيخرج يدور،
كيضحك،
كيخطط لمشروع خيالي:
“غادي نفتح ستارتاب ديال شي حاجة كبيرة.”
شنو هي الحاجة؟
ما كيعرفش.
غير كبيرة.
و منين تقولو:
– نوض بكري غدا و سير قلب على خدمتك.
كيجاوب بثقة:
“غدا نبدأ حياة جديدة… بعد رمضان.”
و هادي كتعاود من رمضان لرمضان…
بحال المسلسلات التركية، غير بلا تطوّر.
هو ماشي كسول…
هو غير مشروع مؤجل إلى إشعار غير معروف.
و أي تشابه مع شي عبيقة مقطوع فحومتكم…
راه غير من وحي القهوة و الݣارو بعد الإفطار 😌🔥

🌙 رمضانيات (الحلقة 1)الموظف لي كيتحوّل فـ رمضان لكائن جامدهو ما تبدّلش…هو غير صايم.من نهار كيشوف الهلال، كيدخل للإدارة و...
19/02/2026

🌙 رمضانيات (الحلقة 1)
الموظف لي كيتحوّل فـ رمضان لكائن جامد
هو ما تبدّلش…
هو غير صايم.
من نهار كيشوف الهلال، كيدخل للإدارة و كيحط الروح ديالو فـ وضعية الطيران الاقتصادي.
كيجلس فالكورسي…
كيحل الحاسوب…
و كيجمّد.
كتسولو:
– عافاك هاد الوثيقة ضرورية اليوم.
كيجاوبك بنبرة فيها زهد الدنيا:
“خليه حتى يفطر الله علينا.”
هو ما رافضش يخدم…
هو غير كيشوف بلي الحركة الزايدة ممكن تنقص من الأجر 😌
مع العاشرة صباحاً كيولي عندو صداع “شرعي”.
مع الثانية عشر كيولي عندو دوخة “إيمانية”.
مع الثالثة العشية… ما تبقاش تهضر معاه، حيث كيدخل فمرحلة الخطر البرتقالي ⚠️
كتشوفو كيحدّق فالشاشة…
تحسبو خدام.
و هو فالحقيقة كيتخيل صحن الحريرة و البيض مسلوقين و الشباكية كيلمعو فالضو.
و إلى شي مواطن غلط و قال ليه:
“سمح ليا غير دقيقة…”
كيجاوبو بنظرة فيها رسالة واضحة:
“حتى أنا باغي دقيقة… دقيقة المغرب.”
ولكن…
غير كيضرب المدفع 🚨
كتوقع المعجزة.
كيشرب شوية ما…
كيولي نشيط بحال شي واحد شرب بطارية Duracell.
كيخرج يصلي التراويح،
و من بعد كيهبط فالفيسبوك يكتب:
“رمضان شهر النشاط و الإنتاجية.”
هو نفس الموظف.
غير فرمضان كيخدم بنظام:
Service après ftour.
و أي تشابه مع شي موظف فمدينتكم…
راه غير من وحي الطوابير قبل الأذان 😌🔥
#لحظة

الأمل الصويري دار الريمونتادا وقال كلمتو فـ كأس العرش 👑⚽الأمل الرياضي الصويري قالها بصوت عالي: “حنا هنا!” وتأهل للدور ال...
18/02/2026

الأمل الصويري دار الريمونتادا وقال كلمتو فـ كأس العرش 👑⚽
الأمل الرياضي الصويري قالها بصوت عالي: “حنا هنا!” وتأهل للدور الثاني الإقصائي من منافسات كأس العرش، من بعد ما قلب الطابلة على نادي دينامو مراكش وربحوه بجوج لواحد.
الماتش بدا شوية بحال شي فيلم تشويق… أصحاب الأرض تلقاو هدف وخلاو الجمهور يشد قلبو بيديه ويقول: “واش غادي تبدا علينا بكري؟” 😅
ولكن ولاد الصويرة ماشي من النوع لي كيسلم بسهولة.
فالشوط الثاني، الحكم صفر على ضربة جزاء، وتقدم ليها بلال أيت علال بكل ثقة، دار الكرة فالشباك وقال للحارس: “سمح ليا خويا، الخدمة خدمة.” ⚽🔥
ومن بعد جا ياسر المسكين، لي ما كان مسكين حتى فـ والو، وزاد الهدف الثاني وكمّل الفرحة 🎉
والمثير فالقصة أن الأمل لعب هاد المباراة بلا الركائز الأساسية، حيث الطاقم قال: “نخليو العدة الكبيرة لبطولة الأحد.” يعني دخلوا بخطة ذكية، بحال شي مدرب كيخبي الورقة الرابحة حتى لآخر لحظة 😉
الماتش كان فيه استحواذ وسيطرة كبيرة من الأمل، ولكن لاعبي دينامو مراكش دارو سدّ دفاعي بحال شي حيط إسمنتي، وزيد عليهم الحارس ديالهم لي كان داير فيها بوفون ديال زمانو 🧤😂
ومع ذلك، الضغط المتواصل خلا الدفاع يتفكك، وجات الأهداف بحال ما كيجي البحر على السور ديال الميناء 🌊
الرسالة واضحة:
الأمل الصويري ماشي غير فريق، راه روح مدينة كاملة كتقاتل، كتطيح وكتفيق، وكتقلب النتيجة حتى آخر دقيقة 💙
دابا التركيز كامل على مباراة البطولة الأحد، والجمهور الصويري خاصو يكون حاضر، حيت الفريق عطى الإشارة… والباقي غير البداية 🔥⚽
#لحظة🍐

فواحد المدينة صغيرة، لي الخراب فيها ما محتاج لا ميكروفون لا تعليق صوتي، كاين واحد كيعتبر راسو صحفي.هو فالحقيقة أقرب لمرش...
16/02/2026

فواحد المدينة صغيرة، لي الخراب فيها ما محتاج لا ميكروفون لا تعليق صوتي، كاين واحد كيعتبر راسو صحفي.
هو فالحقيقة أقرب لمرشد سياحي ديال الكوارث… غير الفرق أنه كيشوفهم إنجازات.
النهار كامل داير دورة ميدانية على بشكليط، كيطوّف بين الحفاري بحال شي عالم آثار كيبحث على حضارة غارقة.
غير الفرق أن الحضارة ما غرقاتش بالمطر… غرقات بالقوادس لي فايضين بلا ما تطيح قطرة وحدة.
كيوقف قدّام حفرة قدّ الفم ديال التمساح.
يشوف فيها، يشوف فالكاميرا، ويقول:
“هنا مشروع استراتيجي لتصريف المياه.”
المياه؟
راه غير الواد الحار داير مؤتمر صحفي بلا دعوة.
الناس كيتشكاو،
السيارات كتمرض،
الطوموبيلات كتخرج منها أصوات ماشي ديال ميكانيك… ديال استغاثة.
وهو؟
كيقلب غير على زاوية ما تبانش فيها الكارثة.
إلا كان خاصّو يميل البشكليط 45 درجة باش يبان الرصيف مستقيم، يديرها.
إلا خاصّو يقص الصورة ويخلّي غير قوس السماء، مرحبا.
المهم العام زين…
والمسؤول خدام…
والمشكل غير فـ “نظرة تشاؤمية لبعض المواطنين”.
هاد السخافي بايع حنكو بالتقسيط.
كل لايف عندو رعاية غير معلنة:
“بتمويل من الصمت.”
مرة طاح قدّام الناس فحفرة لي كان كيسمّيها “تهيئة ظرفية”.
بشكليطو دخلت فيها الرويضة القدامية حتى قلباتو
وهو طايح...... شي عيالات تيتهامسو : ما سمعتيهش كيقول “آي ”… 🤕🤕
🤷سمعتو كيقول:
“راه الأمور تحت السيطرة.”
المدينة كتغرق فريحة القادوس،
وهو كيكتب:
“أجواء ربيعية.”
الناس كتغوت،
هو كيحط موسيقى هادئة فوق الفيديو باش تخفّف “الطاقة السلبية”.
حتى ولات الحفاري عندها هيبة أكثر من المقالات ديالو.
الحفرة واضحة وصريحة،
وهو غامض ومغسول بالمجاملة.
وفالأخير، ولات المدينة كتضحك عليه بصوت منخفض…
حيت حتى الضحك خاصّو رخصة.
بقا غير يدور بالبشكليط،
ينقّح الصورة،
ويمسح الريحة بالكلمات.
ولكن الحقيقة؟
ماشي فالتعليق.
الحقيقة ساكنة فالحفرة…
وكل نهار كتوسع شوية،
يمكن نهار تبلع حتى الصحفي ديالها 🤌
ختاماً ، أيّ تشابه في الأحداث أو الأشخاص أو الحفاري أو القوادس الفايضين بلا شتا… فهو من وحي الرائحة فقط، وأي علاقة له بالواقع فهي مسؤولية الواقع لا غير. 😌
#لحظة

ملحمة البالة… الموسم المفتوح لردم الحفرفي بعض المدن كيتبدل المجلس البلدي،وفي الصويرة كيتبدل غير نوع الرمل.مهنيّو سيارة ا...
13/02/2026

ملحمة البالة… الموسم المفتوح لردم الحفر
في بعض المدن كيتبدل المجلس البلدي،
وفي الصويرة كيتبدل غير نوع الرمل.
مهنيّو سيارة الأجرة صنف الثاني عندهم علاقة طويلة مع الحفر.
علاقة ما فيهاش ورد، فيها غبرة.
كل صباح كيخرجو يخدمو، وكأنهم داخلين لسباق حواجز:
تفرمل… تدور… تهبط… تطلع… وتدعي الله “ما تضربش الكارطير”.
قبل الانتخابات، كانت الوعود كتدور أكثر من الطوموبيلات.
“إصلاح شامل”، “تهيئة كبرى”، “إعادة الاعتبار”…
وفي نفس الوقت، كانت البالة كتخدم overtime.
التجزئة الخامسة؟
هديك ماشي حي… هديك أكاديمية.
أي سائق جديد خاصو يدوز منها باش ياخذ دبلوم فـ “فن المناورة بين الحفر”.
حفَر عندها تاريخ طويل من الردم، حتى ولى الرمل كيعرف الطريق أكثر من الإسفلت.
دازت الانتخابات، تبدلات التشكيلة، تبدلات الصور فالمكاتب…
ولكن الحفرة قالت:
“أنا باقية”.
وجات وقفة 5 فبراير 2026،
مهنيّو الطاكسي رافعين صور الحفر بحال شي معرض فني بعنوان:
“واقعية مؤلمة – الجزء الخامس”.
الرسالة كانت واضحة:
خاص حل جذري، ماشي إسعاف أولي بالرمل.
لكن بعد أيام قليلة…
رجع نفس المشهد:
لا جرافات، لا أوراش كبيرة، لا ضجيج ديال إصلاح شامل…
غير البالة، كترجع للواجهة، بحال شي منتخب قديم عارف الطريق مزيان.
وولات المعادلة بسيطة:
قبل الانتخابات → ردم.
بعد الانتخابات → ردم.
بعد الوقفة → ردم.
كأن المدينة داخلة فـ “برنامج وطني للترقيع المستدام”.
التجزئة الخامسة ماشي الوحيدة، ولكن هي النجمة.
الحفرة اللي عندها CV محترم:
سنوات خدمة، عشرات عمليات الردم، وتجارب ميدانية مع مهنيّي الطاكسي.
وفي وسط هاد السخرية، كيبقى السؤال ثقيل:
واش الحفر خاصها ميزانية؟
ولا خاصها غير مهنيين عندهم بالة ونية حسنة؟
حيت إذا بقى الحال هكذا،
غادي يولي الردم بالبالة مهنة موازية،
ويمكن حتى يطلبو فيه رخصة جديدة🤣
---ـ- لحظة 🍐

"وزارة الشجرة للتنبيه الطرقي ⛔في واحد الزنقة فالمدينة، فالليل، كاين مشهد كيضحك وكيحزّن فآن واحد: حفرة كبيرة مخبية فالظلا...
12/02/2026

"وزارة الشجرة للتنبيه الطرقي ⛔
في واحد الزنقة فالمدينة، فالليل، كاين مشهد كيضحك وكيحزّن فآن واحد: حفرة كبيرة مخبية فالظلام، والطوموبيلات والموتورات كيدورو بحذر بحال شي سباق على حياتهم. ولكن المفاجأة؟ المواطن العبقري دار شجرة كبيرة وسط الطريق باش تحذر الناس! 🌳😂
صافي، ما بقاتش لوحات معدنية، ما بقاتش أضواء حمراء، غير شجرة كتحاول تقول: "دير بالك، إلا ما بغيتش تهبط فالحفرة!" نعم، الشجرة ولات الشرطة، ولات المهندس المدني، ولات إنارة الطريق فآن واحد.
هاد المشهد مضحك ولكن فـنفس الوقت كيعكس الحقيقة المرة: المواطن ولى هو لي يصلح ويحمّي، والبلدية؟ كتفرج من بعيد وكأنها كتقول: "راه مشينا بعيد فالحلول الإبداعية". التنمية؟ غايبة، والحفر بقات هي القائدة الحقيقية فالزنقة.
وفالأخير، هاد الشجرة الصغيرة ولات رمز للذكاء الشعبي، للعبقرية ديال المواطن، وللكوميديا اليومية ديال المدينة: الناس كيتقاتلو مع الحفر باش يوصلو لبيوتهم سالمين، والبلدية؟ كتشوف غير من بعيد… يمكن هادي هي الطريقة الجديدة للتنبيه فالطرق المستقبلية: شجرة هنا، شجرة غدا، والحفر… باقية بلا حل! 🌿💥

صالح… لي كان كيشبه الشعب حتى ولى ما كيعرفوش😎صالح قبل الانتخابات ما كانش غير سياسي، كان جمعية خيرية تمشي على جوج رجليها.ف...
09/02/2026

صالح… لي كان كيشبه الشعب حتى ولى ما كيعرفوش😎

صالح قبل الانتخابات ما كانش غير سياسي، كان جمعية خيرية تمشي على جوج رجليها.
فين ما دار، تلقاه كيهضر على المقهورين، كيبكي معاهم، كيسمع ليهم، وحتى إلا طاحت شي دمعة من عينيه كان كيمسحها ويقول:
“هاد الشي كيوجعني فقلبي”.
كان صالح كيعرف ثمن الخبز، ثمن البوطا، وعدد الحفر فالطريق، وحتى شحال كتكلف “الحريرة بلا لحم”.
كيقول:
“أنا واحد منكم… وغااادي نصلّح الأحوال”.
والشعب قال:
“الله يجيب، هادا باين صالح بصّح”.
دازت الانتخابات… وربح صالح 🎊
ومن تما… وقع الانقطاع الكهربائي فالعاطفة.
صالح تبدّل بحال التطبيق ملي كتدير ليه تحديث فاشل.
الهدرة نقصات، الابتسامة ولات رسمية، والسلام بقى غير فالتصاور.
ولا كيهضر غير بلغة جديدة ما مفهومة:
“الملف قيد الدراسة”،
“خاصنا الوقت”،
“راه الأمور معقّدة”،
يعني: ما تصدعوش ليا راسي.
المقهور لي كان كيتلاقى مع صالح فالقهوة، ولى دابا كيتلاقى غير مع الحارس ديالو.
كيقول ليه:
“السي صالح مشغول”،
ومشغول فاش؟
فالتصاور، فالبدلات، فالضحك، وفي إصلاح الأحوال…
ديال راسو فقط.
صالح ما صدّق صالح لوالو.
صدق غير الكرسي لي داير بحال اللصّاق: صعيب يتنحّى.
صدق غير التصفيق لي كيجي بلا سبب.
والوعود؟
تحطّو فدرج، تسدّ بالمفتاح، وتنسّاو بحال شي فاتورة قديمة.
والطريف فالموضوع، أن صالح دابا كيخرج فالتلفزة ويهضر على:
“ثقة المواطنين”.
والمواطن كيشوف وكيقول:
“آش هاد الثقة؟ راه حتى الهاتف ديالك ما بقى كيشدّ”.
الخلاصة؟
صالح قبل الانتخابات كان “صالح”،
ومن بعدها… ولى غير ناجح فالهروب.
وفهاد البلاد، المشكل ماشي فصالح بوحدو،
المشكل أننا كل مرة كنطيحو فـ نفس الفخ…
وبنفس الاسم:
صالح

مݣدول الصويري: طالب بلا قراية، وبلا خدمة، ولكن بخبرة وطنية فالقهاويمݣدول، ولا كما كيناديوه صحاب القهوة: “الطالب”، هو واح...
08/02/2026

مݣدول الصويري: طالب بلا قراية، وبلا خدمة، ولكن بخبرة وطنية فالقهاوي
مݣدول، ولا كما كيناديوه صحاب القهوة: “الطالب”، هو واحد الكائن الصويري العجيب، كيتنفس هواء البحر، وكيعيش على الويفي العمومي والدعاء ديال الوالدة. طالب؟ آه نعم، طالب… ولكن طالب فالراحة، وففنّ تأجيل الحياة حتى إشعار آخر.
كيقوم مݣدول مع العصر، ماشي حيث الليل طويل، ولكن حيث المستقبل ما مستعجلش. كيدير جولة تأملية فالحومة، كيشوف البحر، وكيقول:
“الصويرة مدينة الفرص”
ومن بعد كيدخل للقهوة… وما يخرجش منها حتى كتسدّ الفرص.
مݣدول كيهضر على البطالة وكأنه ضحية مؤامرة كونية بدّات من عهد الفينيقيين. الدولة ظالماتو، الجامعة ما فهماتو، والخدمة ما كتقلبش عليه. أما هو؟ راه دار ليه أقصى مجهود ممكن: فكر فالموضوع بعمق، ومن بعد قرر يأجلو.
عندو CV فخيالو، فيه 10 سنين ديال “التجربة فالتفكير”، و3 لغات ما كيهضر حتى وحدة فيهم مزيان، وماستر فـ“لو كان”. إلى قلت ليه دير شي تكوين، يجاوبك:
“راه ماشي فالسوق”
وهو ما عمره دخل للسوق… غير لسوق السردين.
فالدار، كيعيش مع مو، وكيعتبر راسو مستثمر فالعلاقات العائلية. مصروفو الشهري جا من “الله يسهل”، وحلمو يخدم خدمة محترمة بلا مدير، بلا توقيت، وبلا صداع… وبطبيعة الحال براتب صويري عالمي.
مݣدول ماشي غير شخص، راه كاريكاتير متنقل، شهادة حيّة على جيل باغي كلشي دابا، وما باغيش يبدأ من شي حاجة. كيتشكى من الحياة، وهي مازال كتسناه غير يفيق

😂 فمشهد سريالي كثر من مسرحيات العبث، خرج علينا غالي من مخيمات تندوف وقال فجأة: “أنا مستعد نشارك المغرب فاتورة السلام!” إ...
07/02/2026

😂 فمشهد سريالي كثر من مسرحيات العبث، خرج علينا غالي من مخيمات تندوف وقال فجأة: “أنا مستعد نشارك المغرب فاتورة السلام!” إييه، نفس الرجل اللي ما يقدر يحرك طوموبيل بلا إذن، ولى اليوم كيهضر على “الفواتير” و“الدفع”!
سؤال: شنو هاد الفاتورة؟
سنين احتجاز المدنيين؟
المساعدات اللي مشات لجيوب القيادة؟
ولا الغاز والضو اللي كيدفعو الجنرالات؟
الضحك الكبير هو التوقيت: البارح كيهدد بالحرب، واليوم كيهدّر على “التعاون” وكأنه فواحد سيمينار تنمية بشرية.
ويزيدها تهريج: كيقلك الجبهة “ما غاديش تحل محل الصحراويين”! إييه، وواحد ضحكة… راه هو وزمرتُه اللي سرقوا صوت الناس لعقود!
و”تقاسم فاتورة السلام”؟ نكتة الموسم بلا منازع. المغرب كيبني وينمي الصحراء ديالو، وغالي عندو غير شيكات بلا رصيد وأوهام قديمة…
الخلاصة: غالي، جمع فواتيرك وخليهم عندك، ولا قدمهم للي كيسلفوك باش تعيش. القطار ديال الحكم الذاتي تحت السيادة المغربية دايز، واللي فاتو، ما ينفعوش التلويح بتذاكر منتهية الصلاحية 😂💥

لحظة 🤌 الحفر فطرقات الصويرة… معاناة كبرت وسكات طال 😡مدينة الصويرة، المدينة لي معروفة بالجمال ديالها والبحر والرياح، ولات...
07/02/2026

لحظة 🤌

الحفر فطرقات الصويرة… معاناة كبرت وسكات طال 😡
مدينة الصويرة، المدينة لي معروفة بالجمال ديالها والبحر والرياح، ولات اليوم معروفة حتى بالحفر لي عامرين الطرقات ديالها. فين ما دُرت وجهك، تلقى حفرة كتسنى شي ضحية جديدة: طاكسي، موطور، ولا حتى شي مواطن مسكين دايز على رجليه. طرقات ولات بحال رقعة شطرنج، ضربة هنا وضربة لهيه، والنتيجة وحدة: الخطر، الأعطاب، والتذمر.
وسط هاد المشهد المؤسف، كاينة حفرة ماشي بحال بحال، حفرة ولات حديث الساكنة، وولات عندها اسم وشهرة أكثر من شي مسؤول… فـ التجزئة الخامسة، كتربّع حفرة كبيرة وعميقة، نسميوها “عسيلة الحفر”. حفرة ما بقاتش غير حفرة، ولات معلمة، ولات رمز للإهمال، ولات فخ مفتوح كيهدد السلامة ديال الجميع.
“عسيلة الحفر” ما كتفرّقش بين طاكسي ومواطن، بين شاب وشيخ، كلشي كيطيح فمشكلها. مواتير طايحين، سيارات معطلة، ومواطنين كيحطّو يديهم على قلبهم كل مرة يدوزو من تما. ومع ذلك، الحفرة مازال ثابتة فمكانها، كتتوسع مع كل شتاء، وكتكبر مع كل تجاهل.
الأكثر من هاد الشي كامل، هو الصمت ديال المجلس البلدي ديال الصويرة. شكايات الساكنة كاينة، الصور منتشرة، والكلام داير، ولكن لا إصلاح، لا تدخل، لا حتى توضيح. تقاعس واضح وإهمال ما بقا عندو حتى تبرير. واش خاص شي كارثة باش يتحرك المسؤول؟ واش مطالب الساكنة ما عندها حتى قيمة؟
فالأخير، الحفر ماشي غير مشكل طريق، الحفر مشكل ثقة. ثقة بين المواطن والمؤسسات، ثقة ولات مهزوزة مع كل حفرة كتبقى بلا حل. و“عسيلة الحفر” غتبقى شاهدة على هاد الإهمال، حتى يفيق الضمير، ويتصلح الحال، وترجع الصويرة مدينة تستاهل اسمها ومكانتها

Address

Essaouira
44000

Website

Alerts

Be the first to know and let us send you an email when لحظة posts news and promotions. Your email address will not be used for any other purpose, and you can unsubscribe at any time.

Shortcuts

Share

Category