23/01/2020
اقسم بالله ان هادشي لي غاتقراه غادي يفرحك و ماكرهناش يوصل لكشي بالبارطاج ديالكم لانه يستحق النشر 🇲🇦🇲🇦🇲🇦❤️
بلسان متطوعين عطاو من وقتهم وجهدهم :
المتطوع 1
الصراحة لبارح كنت كانقول مال بنوعلي مقلب لينا على داك الدوار وابعيييد وضربنا بزاف ولكن من ناحية أخرى كانشوفو أن كاين ناس بعاد علينا ب 600 كلم ماشي طريق مقادة كلها حفاري وفيراجات وتيشكا والثلج والحجر تايطيح منها ومع ذلك ربي را قسم الأرزاق بين عباده كل واحد وربي فين بغا يشوفو واخا هوما عايشين تما را ربي سخرنا (قال لينا سيرو ديو واحد السخيرة لخوتكم وأنا أنحفظكم من كل مكروه وأنا مكلف بكلشي غير سيرو) وبصح مشينا وتمرمدنا ومانعسناش وضربنا لبرد وكلشي وتخيلو شوفو شحال من واحد مشا وتا واحد ماوقعات ليه شي حاجة ، واللي أنقول هو أصعب تجربة دوزت هي نسوق فتيشكا وطايح فيها الثلج و واخا قالو ليا وقف خفت نتحبسو تما ولا شي حاجة وكلشي مخلوع تا أنا وبديت كانقول ليهم باش مايتخلعوش شوفو را مولف نسوق فالثلج 😅😅 المهم الحمد لله الحمد لله ، تقبل الله منا ومنكم صالح الأعمال وجعل هذا العمل في الميزان المقبول ❤
المتطوعة 2
صراحة احساس زوين حسيتو أول مرة نمشي لشي قافلة كنت غادا معولة على تمارة و الصهير و التكرفيسة و لكلشي ولكم لحظة لي كتشوف فعوينات دوك الوليدات تنسى كلشي العمل التطوعي شي حاجة زوينة كتعطي قيمة للإنسان كتخليك متميز على ناس الاخرين حيت ماشي أي واحد غادي يقدر يدير داكشي لي كنديرو حنا و التحديات لي كناخدو الطريق كانت صعيبة الرجعة تكرفسنا و حتى الشيفور الله يسمح لينا منو مي كلشي داز طوب الحمد لله
المتطوع 3
أول مرة غنمشي لقافلة صراحة إحساس زوين ملي كتشوف هاديك الضحكة ديال الدراري الصغار وحتى الكبار فرحانين كاتحس بواحد الفرحة مكتوصفش وكتشوف هدوك الناس كيفاش عايشين فأعالي الجبال والبرد الله يكون فالعون شكرا شباب مغاربة ونفتخر كنتم رائعين ❤❤
المتطوعة 4
قبل من بدا نعبر و نقول إحساسي بغيت نشكر كل واحد ساهم في هذا العمل الجبار ، ثلاثة أشهر من العناء والتعب و الخدمة و التكرفيس باش نقدرو نوصلو للمبتغى ديالنا أنه نفرحو دوك الناس و ندخلو البهجة على قلوبهم رغم أنهم مساكن مابخلوش علينا بالكرم و الضيافة ديالهم و تقاسمو معانا داكشي لعندهم صراحة كانت تجربة واعرة بزااااااااااف واجهنا بزاف التحديات و تخطيناهم والعجيب بالأمر وخا العيا و الارهاق كملنا لأخر نفس و كنا يد واحدة وتعاونا أنا فخورة بنفسي و فرحانة أني معكم وليتو عائلتي الثانية تقاسمت معاكم لحظات زوينة و مؤثرة الله يجعلها في ميزان حسناتنا و يتقبل من الجميع ومغاربة ونفتخر دمتم متألقين كنبغيكم كاملين😍😍😍😍❤❤❤❤❤
