31/05/2023
මේක ලියන්න ටිකක් පරක්කු වුණා. දවසකට පැය 24 මදි කියලා හිතෙන දවස් ටිකකට පස්සේ හොයාගත්ත නිවාඩු වෙලාවක මේ සටහන ලියන්නේ,
පසුගිය මැයි 8 වෙනිදා රෑ 10.34 ට ඇමතුමක් ආවා. ගැස්සිලා ඇහැරිලා බලනකොට නාඳුනන අංකයක්.
"හෙලෝ අක්කේ " ගෑණු ලමයෙකුගේ කෝමළ කටහඬක්!
" හෙලෝ" මං කතා කළේ නිදිමතේ.
ඇමතුම ලැබුණේ කලා සංසදයේ වත්මන් ලේකම්තුමියගෙන්. ඇය කතා කළේ ඊළඟ දවසේ ඒ කියන්නේ මැයි 9 වෙනිදා පවත්වන්න නියමිතව තිබුණු අමුRTHAYA ප්රසංගයට සහභාගී වෙනවද කියන එක තහවුරු කර ගන්න. ඒත් මගේ තාත්තා රෝහල්ගත වෙලා හිටපු නිසා මට යන්න විදියක් තිබුනේ නැහැ. ඊට පස්සේ පැය ගණනක් යනකම් නින්ද යන්නේ නැතුව ඇහැරලා හිටපු මට ගොඩාක් දේවල් කල්පනා වුණා. මුලින්ම අපි විශ්වවිද්යාලයෙන් ඉවත් වෙලා හිටියත් අපෙන් පස්සේ කලා සංසදයේ වැඩකටයුතු දිගටම සිද්ධවෙනවා කියන එක ගැන දැනුණෙ පුදුම සතුටක්. ඊළඟට අපි කලා සංසදය පටන්ගත්ත හැටි, පළවෙනි AGM එක, ප්රකම්පන කලා උළෙල කරන්න සල්ලි හොයපු හැටි පිළිවෙලට හරියට ෆිල්ම් එකක් වගේ ! 😌
පලවෙනි අවුරුද්ද ඉවර වෙනකොටම වගේ මගේ අම්මා අසනීප වුණා. ඒත් එක්ක මුහුණදෙන්න සිද්ධවුණ දුෂ්කරතා එක්ක ඉගෙනගන්න එක නතර කරලා ගෙදර යන්න ඕන කියලා හිතමින් මම හිටියේ. ඇත්තම කියනවා නම් හරිම සතුටින් ඉන්නවා වගේ පෙන්නගෙන හිටියට, වෙලාවකට ඒ ප්රශ්න වලින් පැනලා යන්න පුළුවන් මොකක්ම හරි ක්රමයක් මම හොයමින් හිටියෙ. ඔහොම ඉන්නකොට දවසක් හවස DH එකයි IT ගහයි අතර තුංමං හන්දියෙදි "ඒ මචං දැන් ලෙක්චර් එකක් තියේද ? නැත්තං පොඩ්ඩක් හිටපංකො" කියලා අපේ එකෙක් ඇහුවා. මමත් ඉතිං නතර වුණා මොකක්ද සීන් එක කියලා බලන්න.
" මචං අපි සයන්ස් එකේ කලා සංගමයක් පටන් ගත්තොත් ඒකට උදව් කරනවද ? උඹ කවි එහෙම ලියනවා කියලා ආරංචියක් ආවා..." (තව මොනවද කිව්වා මට දැන් මතක නෑ) මමත් ඉතිං හා කිව්වා. උදව් කරන්න පුළුවන් ද කියලනෙ ඉතිං ඇහුවෙ !
එතනින් තමයි කතාව පටන් ගත්තෙ. 2018 ජූලි 16, A11 301 ශාලාවෙ තමයි කලා සංසදයේ පලවෙනි සභා රැස්වීම තිබුණෙ. (ලේකම් විදියට පත්වෙලා පැටලි පැටලි ස්තූති කතාව කරන්නත් වුණා. සභාවක් ඉස්සරහා කතා කරන්න ගියාම සබකෝලෙනෙ 🙈) කලා සංසදය නිසා මට හොඳම හොඳ සහෝදරයො ටිකක් මුණගැහුණා. පුහු ආටෝප නැති ජ්යෙෂ්ඨ සහෝදරයො ටිකක්, අපි වගේම එකම විදියට හිතන පතන ආදරණීය කනිෂ්ඨ සහෝදර සහෝදරියන් ටිකක්, විශේෂයෙන්ම එකම batch එකේ වුණත් ඊට කලින් ලඟින් ආශ්රය කරන්න ඉඩක් නොලැබුණු ආදරණීයම හොඳම සහෝදරයො පස්දෙනෙක් කලා සංසදය නිසා මට ලැබුණා.💙 ඒ ආදරණීය සහෝදරයො පස්දෙනා එක්ක ජීවිතේ ගැන කරපු පුංචි පුංචි කතාවලින් මට ජීවිතේ එපා කරපු ප්රශ්නවලින් පැනලා යන්නෙ නැතුව විඳදරාගෙන ඉන්න ධෛර්යයක් මට ලැබුණා. (මේ ගැන කලින් උන්ට කියලා නෑ මම ) ප්රතිලාභ මොකුත්ම නැතුවමත් ආත්මතෘප්තිය වෙනුවෙන් විතරක්ම වැඩ කරන්න අවස්ථාවක් ලැබුණා. මට කැම්පස් එක අතනොහැර ඉන්න හේතුවක් ලැබුණා!
AGM එකෙන් පස්සේ 2018 අවුරුද්ද ඉවර වෙන්න කලින් ප්රකම්පන show එක කරන්න target කරගෙන proposal එක හදන්න ගත්තා, ඒකත් දවස් ගාණක මහන්සියක්. සල්ලි හොයන්න කොටුවේ කඩවල්වල ඇවිදලා ටිකට් විකිණුවා. කෝච්චියේ සින්දු කිව්වා. ඒ අතරේ අපි ජයලාල් රෝහණ මහත්මයා එක්ක, කූඹියෝ නාට්යයේ ලක්මාල් සහ තුමිඳු මහත්වරු එක්ක, මහින්ද ප්රසාද් මස්ඉඹුල මහත්මයා එක්ක වැඩසටහන් කිහිපයක් ම කලා. ප්රකම්පන (2018) සමාරම්භක උත්සවයට කලින් දවසේ හවස ඉඳන් ඒ කියන්නේ 2018 නොවැම්බර් 26 වෙනිදාට රෑ එළිවෙනකම් අපි චිත්ර/ඡායාරූප ප්රදර්ශනයට Lobby එකේ සැරසිලි කලා. 28 වෙනිදා අංගම්පොර සංදර්ශනයක් කළා. එළිමහනේ කරන්න plan කරගෙන හිටපු show එක වැස්ස නිසා DH එකේ කරන්න වුණා. 29 වෙනිදා තමයි ප්රකම්පන ප්රසංගයේ කූටප්රාප්තිය. ඒ දවස ගැන මතක් කරනකොට ඇටමැස්සා පොතේ එක වාක්යයක් මට මතක් වෙනවා.
"කාර්යයේ මගේ කොටස මම ඉටුකර ඇත්තෙමි ! "
(මගේ ජීවිතේටම ඒ වගේ පරිපූර්ණ හැඟීමක් ඇති වෙලා තියෙන්නේ එක වතාවයි.) 2018/11/29 ප්රකම්පන ප්රසංගය අවසන් වුණාට පස්සේ දැනුනේ ඒ වගේ හැඟීමක්!
2019 වෙනකොට අපේ කණ්ඩායමේ ජ්යෙෂ්ඨයෝ විශ්වවිද්යාලයේ ජීවිතය හමාර කළත් සහයෝගය ලබා දෙන එක නතර කලේ නෑ. කනිෂ්ඨ සහෝදර සහෝදරියන් අතරින් පත්වුණ අලුත් නිලධාරී මණ්ඩලයක් එක්ක අපි ආයෙමත් වැඩසටහන් සංවිධානය කළා. කලින් වතාවටත් වඩා සාර්ථකව 2019 අවුරුද්දෙත් ප්රකම්පන ප්රසංගය පවත්වන්න අපිට පුළුවන් වුණා. ඒ තමයි කලා සංසදයේ සහෝදර සහෝදරියන් සමඟ මගේ අන්තිම හමුවීම. කැම්පස් ජීවිතයෙන් ඉවත් වුණාට පස්සේ පෞද්ගලික ජීවිතෙයි වෘත්තීය ජීවිතෙයි වගකීම් එක්ක හිරවෙලා මට කලා සංසදය මඟහැරුනා. දැන් ගෙවන කාර්යබහුල දවස් ඒ කාලෙ කොච්චර සුන්දරද කියලා මට මතක් කරලා දෙනවා. base එකේ වඩේ කාලා ප්ලේන්ටි බොනගමන්, ස්ටඩියෙ මේසෙකට වටවෙලා event plan කරපු ඒ හවස්වරුවකට කාලය හරහා ආපහු යන්න පුළුවන් නම් මොනතරම් හොඳද කියලා මම හිතනවා.
ආදරණීය නංගි, මල්ලි ,
මම ඔයාලව කවදාවත් හමුවෙලා නෑ. ඒත් ඔයාලා දිගටම කලා සංසදය ක්රියාකාරීව පවත්වාගෙන යන එක ගැන ආඩම්බරයි වගේම ඒ ගැන ස්තූතියි ! 💛 කැම්පස් ජීවිතේ අපි හිතනවට වඩා ඉක්මණින් ගෙවිලා යනවා. ඒ කාලය තුළ සුන්දර මතකයන් එකතු කරගන්න. ඔයාලගේ කනිෂ්ඨ සහෝදර සහෝදරියන්ව කලා සංසදයට එකතු කරගන්න. කිසිම පෞද්ගලික ප්රතිලාභයක් බලාපොරොත්තු නොවී කලාවෙන් අකම්පිත හදවත් කම්පිත කරන්න. ආදරෙයි 💖
~ කලා සංසදයේ හිටපු පලවෙනි ලේකමී ~ 😉
