16/07/2024
පසුගිය සති අන්තයේ වූ වැසිබර තත්ත්වය එක්ක මාත් අපේ පවුලේ කට්ටියත් නිවසට වී කාලය ගත කළා. ඒ අතරතුර අලුත් කෑමක රස බලන්න අපේ පුතාට ආසාවක් ඇති වුණා. ඒත් ඒ වනවිට අධික වැස්ස නිසා අවශ්ය දේවල් ගේන්න කඩේට යන්නත් ලොකු ආසාවක් තිබුනේ නෑ. ඒ අනුව ගෙදර තියෙන දේවල් වලින් රස කෑමක් හදමු යැයි අපි තීරණය කළා. ඒ අනුව අල පිට්සා හදමු කියලා මම පුතාට යෝජනා කළා. පුතාත් ඉතින් දෙපාරක් හිතන්නේ නැතිව මගේ අදහස ස්ථිර කළා.
අවශ්ය ද්රව්ය:
1. මධ්යම ප්රමාණයේ අල ගෙඩියක්
2. බිත්තර 1
3. රට ලූනු ගෙඩි 3
4. පාන් පිටි කෝප්ප 1
5. බටර් 50g
6. ලුණු, ගම්මිරිස් අවශ්ය ප්රමාණයට
7. Mozzarella චීස් හෝ white sauce
8. තක්කාලි, මාලු මිරිස්, සොසේජස්
මුලින්ම අල ගෙඩිය සුද්ද කරලා ඒක පොඩි තීරුවලට ග්රේට් කර ගන්න පුතා හරිම කැමැත්තෙන් මට උදව් කළා. ඒ අතරතුර මම රට ලූනු ගෙඩි 2ක් වගේ හීනියට කපා ගත්තා. ඊටපස්සේ අල හා ලුණු එක භාජනයකට දමා එයට බිත්තරයක් හා රස අනුව ලුණු හා ගම්මිරිස් කුඩු එකතු කළා. අනතුරුව එයට පාන් පිටි කෝප්පය එකතු කරලා ඒ සියල්ල එකට මිශ්ර කරන්නකන් පුතාත් මගේ වටේ කැරකි කැරකි නොයෙකුත් ප්රශ්න විමසමින් හිටියා. ඒ නිසා මේ වැඩේ තවත් උද්යෝගයෙන් කරන්න අපි දෙන්නටම පුළුවන් වුණා.
ඊටපස්සේ අපි දෙන්න nonstick පෑන් එකක් ලිපේ තියලා එකට බටර් ටික දාල ඒක රත් වෙනකොට කලින් සාදා ගත් මිශ්රණය රවුමට එකතු කළා. එහි එක පැත්තක් හොදින් රන්වන් පාට වූ පසු අනෙක් පැත්ත හරවා එයට ගෙදර තිබුණු චීස්,තක්කාලි, මාලු මිරිස් එකතු කළා. මේ ආකාරයට අපි සකස් කර ගත් පිට්සා එක මේ විදියට ලස්සනට ඡායාරූප ගත කලේ නම් මගේ මහත්තයා තමයි. දැන් පුතාට මේකේ රස බලනකන් ඉස්පාසුවක් නෑ. ඉතින් අපි තුන් දෙනාම එදා රෑ කෑමට මේ විදියේ අල පිට්සා තුනක් හදාගෙන රස වින්දා. ඔයාලගේ ගෙදර මේ විදියට හැදෙන විශේෂ කෑම පිලිබඳ අනෙක් අයත් දැනුවත් කරන්න මේක හොද විදියක් කියලයි මට නම් හිතෙන්නේ. ඔයාලගේ අදහස් මාත් එක්ක බෙදා ගන්න අමතක කරන්න එපා.
