01/08/2026
වැරදි, වරද සහ සිපිරිගෙය
අපි සමහර වෙලාවට හිතනවා සිරකරුවන්ට කිසිම අයිතිවාසිකමක් නැහැ කියලා. හැබැයි ඇත්තටම, ඔවුන්ටත් මූලික අයිතිවාසිකම් තියෙනවා. ඒ අයිතිවාසිකම්වලට ගැළපෙන ආකාරයට තමයි බන්ධනාගාර පද්ධතිය සකස් කරලා තියෙන්නේ.
අපේ රටේ පවතින පහසුකම් අනුව, සමහර අවස්ථාවල ඒවායේ යම් යම් දුර්වලතා තිබෙන්න පුළුවන්. නමුත් මම මේ කතා කරන්න යන්නේ ඒ ගැන නොවෙයි.
වර්තමානයේ ඇතිවී තිබෙන සිදුවීම් දිහා බලන විට, සිරකරුවන්ගේ අයිතිවාසිකම් ගැන අම්මලා තාත්තලා කතා කරනවාට වඩා, තමන්ගේ දරුවන් නිවැරදි මාර්ගයට ගෙන යාමට මුල් තැන දුන්නා නම්, අනාගතයේදී සිරගෙවල්වල ඇති පහසුකම් ගැන කතා කරන්න තරම් ප්‍රශ්න ඇති නොවන්නට තිබුණා.
එක් අම්මා කෙනෙක් කියනවා, “මගේ පුතා කු/ඩු බොන්නේ එයාගේ සල්ලිවලින්, රජයේ සල්ලිවලින් නෙමෙයි” කියලා. නමුත් එවැනි වචනයක් අම්මා කෙනෙකුගේ මුවින් පිටවිය යුතු වචනයක් නොවෙයි.
මත්ද්‍රව්‍ය කියන්නේ පුද්ගලයෙකුට පමණක් නොව, මුළු සමාජයටම බලපාන විශාල ගැටලුවක්. එවැනි ගැටලු නිසා තමයි අද සිරගෙවල් පිරී යන්නේ.
ඒ නිසා අම්මලා තාත්තලා තමන්ගේ දරුවන් කුඩා කාලයේ සිටම නිවැරදි මාවතට යොමු කරන්න දැනගත යුතුයි. දරුවා කුඩා කාලයේදී යම් යම් වැරදි කරන විට, ආදරයෙන් අවවාද කරලා, ඒ වැරදි නිවැරදි කරගන්න උත්සාහ කළ යුතුයි.
එසේම, බන්ධනාගාරගතව සිටින පුද්ගලයන්ගේ දෙමාපියන්, සහෝදර සහෝදරියන් සහ බිරිඳ ඇතුළු පවුලේ අය තේරුම් ගත යුතු දෙයක් තිබෙනවා. එනම්, රටක නීතිය සියල්ලටම වඩා ඉහළින් පවතින බවයි.
කෙනෙකු සිරගෙට ගොස් කොතරම් කෑගැසුවත්, රටේ නීතියට ගරු කරන නිවැරදි ජනතාව සැමවිටම නීතියේ පැත්තේ සිටිනවා. එයට හේතුව රටක පැවැත්මට වඩාත් වැදගත් වන්නේ නීතිය නිසයි.
ඒ නිසා සියලු දේවල්වලට ඉහළින් රටක නීතිය ආරක්ෂා විය යුතුයි.
ඒ වගේ ම අපේ රට කියන්නේ නිදහස් අධ්‍යාපනයක් සහ නිදහස් සෞඛ්‍ය සේවයක් තියෙන රටක්.
ඒ නිසා දරුවෙකුට අධ්‍යාපනය ලබාදෙන්න විශාල මුදලක් තිබීම අත්‍යවශ්‍ය නැහැ. අපේ රටේ පාසල් පද්ධතිය හරහා දරුවන්ට නිදහස් අධ්‍යාපනය ලබාගන්න පුළුවන්.
ඒ වගේම දරුවෙකුට ලෙඩක්, දුකක් හෝ අසනීප තත්ත්වයක් ඇති වූ විට, නිදහස් සෞඛ්‍ය සේවාවක් ලබාගැනීමේ අවස්ථාවත් අපේ රටේ තියෙනවා.
මේ සියලු පහසුකම් ලබාදී තිබෙන රටක, දරුවෙකු යහමඟට ගෙන යාම සැබෑ ලෙසම දෙමාපියන්ගේ වගකීමක්.
එවැනි අවස්ථාවලදී නීතියට හෝ බන්ධනාගාර තුළ ඇති පහසුකම්වලට චෝදනා කරන තත්ත්වයකට පත් නොවී, තමන්ගේ දරුවන් නිවැරදි මාර්ගයට යොමු කිරීමට උත්සාහ කිරීම හැම දෙයකටම වඩා වටිනා දෙයක්.
එවිට යම් දවසක ඔබට ආඩම්බරයෙන් බලා සිටින්න පුළුවන්. විශ්වවිද්‍යාලයක උපාධි ප්‍රදානෝත්සවයක් ඉදිරියේ, ඔබේ දරුවා වෛද්‍යවරයෙකු ලෙස, උසස් රැකියාවක නිරත පුද්ගලයෙකු ලෙස හෝ සාර්ථක ව්‍යාපාරිකයෙකු ලෙස ඔබ ඉදිරියේ සිටින දවසක්.
එදාට දෙමාපියන්ට ලැබෙන්නේ විශාල අභිමානයක් සහ ගෞරවයක්.
නමුත් වැරදි මාර්ගයකට දරුවා යොමු වීමට ඉඩ දුන්නොත්, යම් දවසක බන්ධනාගාර දොරටුව අසලට යාමට සිදුවිය හැකියි.
හැබැයි එදාට සමාජය සෑම විටම ඔබේ පැත්ත ගනීවි කියලා සිතන්න එපා.
ඒ නිසා අද සිටම සිතට ගන්න. තමන්ගේ දරුවා නිවැරදි මාර්ගයේ යවන්න. එයයි දෙමාපියන්ගේ උතුම්ම වගකීම.
ඒ වගේ ම වරදක් ඔප්පු වන තුරු යමෙක් වරදකරුවෙක් නෙමේ... මම මේ කතාව කියල තියෙන්නේ ඔවුන් ගැන නෙමේ...සැබෑ වරදකරුවන් ගැන...
🙏🙏🙏🙏
