18/09/2026
ශ්‍රී ලාංකේය තේ ඉතිහාසය අලුතින් ලියූ නුවනි දිසානායකගේ විශිෂ්ට ජයග්‍රහණය
ශ්‍රී ලංකාවේ තේ කර්මාන්ත ඉතිහාසයේ නව පරිච්ඡේදයක් සනිටුහන් කරමින්, තේ රස පරීක්ෂණ ක්ෂේත්‍රයේ ඓතිහාසික ජයග්‍රහණයක් හිමිකර ගැනීමට නුවනි දිසානායක මහත්මිය සමත් වී තිබේ. පිරිමි ආධිපත්‍යය බහුලව පැවති මෙම සංකීර්ණ වෘත්තීය ක්ෂේත්‍රයේ ශ්‍රී ලංකා ඉතිහාසයේ ප්‍රථම වරට තේ රස පරීක්ෂණ ශූරතාව දිනාගත් කාන්තාව ලෙස ඇය වාර්තා අතරට එක්විය.
මෙම ජයග්‍රහණය හිමිවූයේ පසුගිය සැප්තැම්බර් 4 වැනිදා කොළඹ ටාජ් සමුද්‍රා හෝටලයේදී ශ්‍රී ලංකා තේ අපනයනකරුවන්ගේ සංගමය (Tea Exporters Association – TEA) සංවිධානය කළ වාර්ෂික තේ රස පරීක්ෂණ තරගාවලියේදීය. තේ රස, සුවඳ, ශක්තිය සහ ගුණාත්මකභාවය ඉතා කෙටි කාලයකදී නිවැරදිව හඳුනාගැනීම මෙම තරගයේ ප්‍රධාන අභියෝගය විය.
තේ රස පරීක්ෂාව තේ කර්මාන්තයේ වැදගත්ම ක්‍රියාවලියක් වන අතර, විවිධ තේ වර්ගවල ගුණාත්මකභාවය, සුවිශේෂී ලක්ෂණ සහ වටිනාකම තීරණය කිරීමට එය උපකාරී වේ. වෘත්තීය තේ රස පරීක්ෂකයන් තේ සාම්පලවල වර්ණය, සුවඳ, රසය, ශක්තිය සහ පසු රසය පිළිබඳව සියුම්ව ඇගයීමක් සිදු කරති. තේ මිශ්‍රණ සඳහා සුදුසු තේ තෝරා ගැනීම සහ අවසාන නිෂ්පාදනයේ ගුණාත්මකභාවය පවත්වා ගැනීම සඳහාද ඔවුන්ගේ විශේෂඥ දැනුම වැදගත් වේ. රසයේ සහ සුවඳේ සුළු වෙනස්කම් පවා තේවල ගුණාත්මකභාවයට හා වෙළෙඳ වටිනාකමට බලපාන බැවින්, තේ රස පරීක්ෂාව ඉහළ සංවේදී හැකියාවක්, අවධානයක් සහ අත්දැකීම් අවශ්‍ය වන විශේෂිත වෘත්තීය ක්ෂේත්‍රයකි.
Anverally & Sons ආයතනයේ තේ රස පරීක්ෂකවරියක් සහ ව්‍යාපාර සංවර්ධන කළමනාකාරිනියක් ලෙස කටයුතු කරන නුවනි දිසානායක, ඌව වෙල්ලස්ස විශ්වවිද්‍යාලයෙන් කෘෂිකර්ම ව්‍යවසායකත්වය පිළිබඳ උපාධිය ලබා මෙම ක්ෂේත්‍රයට පිවිසියාය. Finlays Colombo ආයතනයේ වසර හතකට ආසන්න කාලයක් පුහුණු තේ රස පරීක්ෂකවරියක් ලෙස කටයුතු කරමින් ඇය සිය සංවේදී හැකියාවන් මුවහත් කරගෙන තිබේ.
ක්ෂේත්‍රයේ ප්‍රවීණයන් වන නිෂාන් වික්‍රමරත්න, නැසීගිය විදානගමගේ ජයතිලක, තිලංක දසනායක සහ රොමේෂ් මොරායස් යන මහත්වරුන්ගේ මඟපෙන්වීමද ඇයගේ ගමනට ශක්තියක් වී ඇත. Anverally & Sons ආයතනයේ කළමනාකාර අධ්‍යක්ෂ මොහොමඩ් අනවරලි, තේ අංශයේ සාමාන්‍යාධිකාරී හරේන්ද්‍ර කිරිදෙන සහ විකුණුම් සාමාන්‍යාධිකාරී ධරණි ජයවර්ධන යන මහත්ම මහත්මීන්ගේ දිරිගැන්වීමද මෙම ජයග්‍රහණයට පසුබිම සකස් කළේය.
නුවනි දිසානායකගේ මෙම ඓතිහාසික ජයග්‍රහණය, ජාත්‍යන්තර තේ කර්මාන්තයේ ශ්‍රී ලාංකික කාන්තාවන්ගේ හැකියාවන් ලොවටම පෙන්වා දුන් සුවිශේෂී අවස්ථාවක් බවට පත්ව තිබේ. පිරිමි ආධිපත්‍යය පැවති ක්ෂේත්‍රයක සිය දක්ෂතාව, විනය සහ නොසැලෙන කැපවීම තුළින් සාර්ථකත්වය අත්කරගත් ඇය, තරුණ පරපුරටද ප්‍රබල ආදර්ශයක් වී ඇත.
Anverally & Sons (Pvt) Ltd
