10/01/2026
මට හැමදාම ඕනි උනේ, මගේ ඇතුලාන්තයේ ඉන්න කුඩා දරුවව දරාගන්න පුලුවන් තරම් හයිය පිරිමියෙක්.
ඇත්තම කිව්වොත්, මට තිබුනෙ තරමක කටුක ලමා කාලයක්.
මිහිරිව මතක් කරන්න කියල මහා ගොඩක් ලස්සන මතක මට නැහැ.
ඉතිං මට ඕනි උනා, ජීවිතේ මගේ පාලනයට ගන්න පුලුවන් උනාට පස්සෙදි මගේ ඇතුලාන්තයේ ඉන්න ලමයට ජීවත් වෙන්න ඉඩ දෙන්න.
එයාට දුව පැන ඇවිදින්න ඉඩ නොලැබුන තැන් වල යන්න, හයියෙන් හිනාවෙන්න, වැස්සෙ තෙමෙන්න, ඕනි නම් අසනීප වෙන්න, තුවාල කරගන්න, කඳු මුදුන් වල කෑගහන්න.
මේ වගේ මට දිගම දිග ලැයිස්තුවක් තියනව
මිනිස්සු පිටතින් මාව දකින්නෙ,
මහා ශක්තිමත් ගෑනියෙන් විදියට.
හැමදේටම තනියම මූණදෙන.
කඩාගන බිංදුවටම වැටුනත් හෙට උදේට ආයම නැගිටින්න තරම් ශක්තියක් තියන කෙනෙක් විදියට.
ඒත් ඇත්තටම, මට ඕනි කොහේහරි අඳුරු තැනක ගුලිවෙන්න.
මේ මහා බර ඉවර වෙනකල් අඬන්න.
ඒත් ඔයා දන්නවද වැදගත්ම දේ. මට ඕන කරන්නෙ මම කඩාගන වැටෙනකොට මාව අල්ලගන්න නෙවෙයි. මම අන්තිම බිංදුවටම දියවෙනකොටත් මාව බලාගන්න කෙනෙක්.
මට පුලුවන් හෙට උදේම ආයම නැගිටින්න. අමාරුවෙන් හරි හිනාවක් හොයාගන්න.❤️🩹
මට ඕනි, මට දුර්වල වෙන්න පුලුවන් තරම් ශක්තිමත් කෙනෙක්.
හැමෝම ශක්තිමත් මිනිස්සුන්ට ආදරේ කරනකොට, ඔයාට පුලුවන්ද මගේ නොවැඩුනු පුංචි කෙල්ලට ආදරේ කරන්න, ඔයාට පුලුවන් ද මට දුර්වල වෙන්න ඉඩ දෙන්න.
මේ ඉල්ලීම මහා ලොකු දෙයක්ද?
