30/03/2026
ໃນວັນທີ 27 ມີນາ 2026 ຢູ່ທີ່ ຫ້ອງວ່າການສູນກາງພັກ ນະຄອນຫຼວງວຽງຈັນ, ທະນາຄານ ສົ່ງເສີມກະສິກຳ ຈຳກັດ (APB) ໄດ້ມອບເງິນຊ່ວຍເຫຼືອ ຜູ້ປະສົບໄພພິບັດທາງທໍາມະຊາດ (ພະຍຸໝາກເຫັບ) ຢູ່ນະຄອນຫຼວງວຽງຈັນ ລວມມູນຄ່າທັງໝົດ 2,000,000,000 ກີບ (ສອງຕື້ກີບ), ເຊິ່ງມອບໂດຍ ທ່ານ ພິລາວັນ ສໍພາບມີໄຊ, ຜູ້ອຳນວຍການ ທະນາຄານ ສົ່ງເສີມກະສິກຳ ຈຳກັດ (APB) ແລະ ໃຫ້ກຽດຕາງໜ້າກ່າວຮັບໂດຍ ທ່ານ ປອ ເພັດ ພົມພິພັກ ຫົວໜ້າຫ້ອງວ່າການສູນກາງພັກ ເພື່ອສືບຕໍ່ນຳເອົາເງິນຈໍານວນດັ່ງກ່າວ ໄປຈັດສັນໃນການຈັດຊື້ວັດສະດຸກໍ່ສ້າງ-ສ້ອມແປງທີ່ພັກອາໄສ ແລະ ຊ່ວຍເຫຼືອ ຜູ້ໄດ້ຮັບຜົນກະທົບໄດ້ຢ່າງທົ່ວເຖິງ.
ເຫດການພະຍຸລະດູຮ້ອນ ແລະ ໝາກເຫັບຕົກໜັກໃນນະຄອນຫຼວງວຽງຈັນຄັ້ງນີ້ ເຊິ່ງໄດ້ສ້າງຄວາມເສຍຫາຍຢ່າງຫຼວງຫຼາຍ ຕໍ່ເຮືອນຊານ ແລະ ຊັບສິນຂອງປະຊາຊົນ ມີບ້ານທີ່ໄດ້ຮັບຄວາມເສຍຫາຍຫຼາຍ. ໃນນັ້ນ, ເມືອງທີ່ໄດ້ຮັບຜົນກະທົບໜັກທີ່ສຸດແມ່ນ ເມືອງ ສີໂຄດຕະບອງ ແລະ ເມືອງ ນາຊາຍທອງ ເຊິ່ງຄວາມເສຍຫາຍ ດ້ານທີ່ພັກອາໄສ ປະກອບມີ ຫຼັງຄາເຮືອນແຕກຮົ່ວ ແລະ ເປ່ເພ່, ດ້ານພາຫະນະ ເຊັ່ນ: ປະເພດລົດໃຫຍ່ ຖືກໝາກເຫັບຕົກໃສ່ ແກ້ວແວ່ນແຕກເປ່ເພ່ ເຊັ່ນກັນ ແລະ ບໍ່ພຽງເທົ່ານັ້ນ ບັນດາສະຖານທີ່, ລະບົບພື້ນຖານໂຄງລ່າງ ກໍ່ໄດ້ຮັບຜົນກະທົບ ເຊັ່ນດຽວກັນ ເຊິ່ງສົ່ງຜົນກະທົບໂດຍກົງ ຕໍ່ການດໍາລົງຊີວິດ ຂອງພໍ່ແມ່ປະຊາຊົນ.
ການມອບເງິນຊ່ວຍເຫຼືອໃນຄັ້ງນີ້ ເປັນໜຶ່ງໃນພັນທະກິດ ທະນາຄານ ສົ່ງເສີມກະສິກຳ ຈຳກັດ (APB) ທີ່ຍຶດໝັ້ນການດໍາເນີນທຸລະກິດ ຄຽງຄູ່ໄປກັບຄວາມຫ່ວງໃຍຕໍ່ສັງຄົມ, ເຊິ່ງ ທະນາຄານ ສົ່ງເສີມກະສິກຳ ຈຳກັດ (APB) ຫວັງເປັນຢ່າງຍິ່ງວ່າ ການຊ່ວຍເຫຼືອໃນຄັ້ງນີ້ ຈະຊ່ວຍເປັນສ່ວນໜຶ່ງ ໃນການຟື້ນຟູກຳລັງໃຈ ຂອງຜູ້ປະສົບໄພ ແລະ ຊ່ວຍໃຫ້ພໍ່ແມ່ປະຊາຊົນ ສາມາດກັບມາດໍາເນີນຊີວິດຕາມປົກກະຕິໄດ້ໂດຍໄວ.
ໃນໂອກາດນີ້, ທ່ານ ປອ ເພັດ ພົມພິພັກ ໄດ້ກ່າວຂອບໃຈ ແລະ ຍ້ອງຍໍຊົມເຊີຍຕໍ່ ທະນາຄານ ສົ່ງເສີມກະສິກຳ ຈຳກັດ (APB) ທີ່ໄດ້ຮ່ວມປະກອບສ່ວນທຶນຮອນ ຊ່ວຍເຫຼືອພໍ່ແມ່ປະຊາຊົນໃນຄັ້ງນີ້, ເຊິ່ງຖືເປັນການປະກອບສ່ວນອັນສຳຄັນ ຮ່ວມກັບ ພາກລັດ ໃນການແກ້ໄຂບັນຫາ ຄວາມເດືອດຮ້ອນຂອງປະຊາຊົນ ໃຫ້ທັນກັບສະພາບການ.
"ທະນາຄານ ສົ່ງເສີມກະສິກຳ ຈຳກັດ (APB) ຂໍສົ່ງມອບກໍາລັງໃຈອັນຈິງໃຈ ມາຍັງທຸກທ່ານທີ່ປະສົບໄພໃນຄັ້ງນີ້ ຂໍໃຫ້ທຸກທ່ານມີພະລັງໃຈ ແລະ ຄວາມເຂັ້ມແຂງ ເພື່ອກ້າວຂ້າມທຸກອຸປະສັກ ແລະ ຜ່ານພົ້ນສະຖານະການນີ້ໄປດ້ວຍກັນ”
----------------------------
ທະນາຄານ ສົ່ງເສີມກະສິກຳ ຈໍາກັດ
(ວ່ອງໄວ ກ້າວໄກ ໄປຄຽງຄູ່ທ່ານ)
☎ Call Center: 1989
🌐 www.apb.com.la
🟦 Facebook: apb.bank
⬛️ Tiktok : bit.ly/ap_bank
🟥 Youtube: bit.ly/APBOfficial
🟪 Instagram: bit.ly/apbbank
