28/05/2026
Өткән һәптидә, йәни 21-баһар елимиздә Мәдәнийәт вә сәнъәт хадимлири күни нишанланди. Қазақстанда бийил мәйрәм пәқәтла тәнтәнилик жиғинлар билән чәкләнмәй, мәдәнийәт вә сәнъәт саһасиниң җәмийәттики орниға йеңичә баһа берилгән күн сүпитидә атап өтүлди. Пүткүл җумһурийәт миқиясида театрлаштурулған кәчләр, көргәзмиләр, концертлар вә мукапатлаш мәрасимлири уюштурулуп, мәдәнийәт хадимлириниң әмгиги кәң тәшвиқ қилинди.
Мәйрәмниң асасий вақиәлиридин бири – Қасым-Жомарт Тоқаев мәдәнийәт вә сәнъәт әрбаплирини мукапатлаш тәнтәнисигә қатнишип, сөз сөзлиди. Дөләт рәһбири өз нутқида мәдәнийәтни милләтниң мәнивий һули сүпитидә баһалап, бу саһаниң дөләтниң келәчиги үчүн стратегиялик әһмийәткә егә екәнлигини тәкитлиди. «Мәдәнийәт – хәлқимизниң миллий моҗутлуғи вә мәнивий мустәқиллигиниң асаси. Мәдәний вә мәнивий мираслирини сақлап қалған дөләтниң абройи жуқури болиду», – деди Президент. Қасым-Жомарт Тоқаев дөләт миллий мәнавиятқа садиқ хизмәт қилип келиватқан хадимларниң иҗтимаий әһвалини яхшилашқа алаһидә әһмийәт бериватқанлиғини қәйт қилди. «Әнди мәдәнийәт саһасини қоллаш – дөләтниң конституциялик вәзиписи. Һазир бу йөнилиштә кәңдаирилик ишлар әмәлгә ашурулуватиду. Мән Дөләт рәһбири сүпитидә миллий мәнавиятқа садиқ хизмәт қилип келиватқан хадимларниң иҗтимаий әһвалини яхшилашқа алаһидә әһмийәт бериватимән. Мәсилән, ахирқи бәш жилда уларниң мааши икки һәссә өсти. Бу жилдин башлап сәнъәткарларға берилидиған дөләтлик стипендия миқдари икки һәссә ашиду. Пәқәт өткән жилниң өзидә мәмликәт бойичә 61 мәдәний объект селинди. 250тин ошуқ мәһкимидә җөндәш ишлири елип берилди. Өткән жилда Президент Пәрмани билән үч мирасгаһқа «миллий» мәртивә берилди. Бу иш бийилму давамлишиду. Мениңчә, Максим Горький намидики дөләт академиялик Рус драма театриға вә Еркеғали Рахмадиев намидики дөләт академиялик филармониягә – «миллий», шундақла Сәбит Муқанов намидики вилайәтлик Қазақ музыкилиқ-драма театриға «академиялик» мәртивә бериш керәк дәп һесаплаймән. Бу сәнъәт коллективлири пүткүл мәмликәтниң мәнивий мираслирини бейитишқа чоң һәссә қошуп келиватиду», – деди Президент.
Дөләт рәһбири әнъәнивий сәнъәткә, болупму жыр, терме вә күй сәнъитигә алаһидә диққәт бөлүш зөрүрлүгини тәкитлиди. «Миллий мәдәнийитимизниң мошундақ тәңдиши йоқ қәдрийәтлирини тәшвиқ қиливатқан сәнъәткарларни қоллаш интайин муһим. Шу мунасивәт билән мән «Асыл мұра» миллий мукапитини тәсис қилиш тоғрилиқ қарар қобул қилдим. Бу мукапат әнъәнивий сәнъәт вәкиллирини қоллашқа, уларниң иҗадини тәшвиқ қилишқа вә миллий сәнъәтниң абройини ашурушқа хизмәт қилиду. Бу алий дәриҗилик мукапат билән мунасивәтлик министрликниң тәвсийәси асасида Дөләт рәһбириниң Пәрмани бойичә мунасип сәнъәт вә мәдәнийәт хадимлири мукапатлиниду», – деди Қасым-Жомарт Тоқаев.
Президентниң ейтишичә, мәдәнийәт вә сәнъәт саһаси дөләтниң аҗралмас қисми сүпитидә дайим мәмликәтниң диққәт-нәзәридә болиду. Шуниң билән биллә Президент мәдәнийәтни қоллаш дөләтниң конституциялик вәзиписи екәнлигини, шундақла мәнивий йеңилинишниң дөләт ислаһатлири билән бирликтә меңиши керәклигини тәкитлиди.
Мәйрәм даирисидә мәмликәтниң барлиқ регионлирида мәдәнийәт хадимлириға дөләт мукапатлири тапшурулди. Астанада өткән тәнтәнилик жиғинда мәдәнийәт вә сәнъәт хадимлири Президент намидин орденлар, медальлар вә һөрмәтлик унванлар билән мукапатланди. Җүмлидин, «Отан» ордени билән Татьяна Бурмистрова, ІІ дәриҗилик «Барыс» ордени билән Мақпал Жүнисова, ІІІ дәриҗилик «Барыс» ордени билән Марина Ганцева тәғдирләнди. Актерлар Бахтияр Қожа вә Нина Макароваға «Қазақстанның халық әртісі» атиғи берилди. Қ.Ғоҗамияров намидики җумһурийәтлик дөләт академиялик Уйғур музыкилиқ комедия театриниң мудири Дилмурат Баһаров (сүрәттә) «Құрмет» ордени билән мукапатланди. Алмута шәһиридә болса, мәдәнийәт вә сәнъәт хадимлириға 60 пәтирниң ачқучлири тапшурулди. Җәнубий пайтәхттә мукапатларни Премьер-министрниң орунбасари – Мәдәнийәт вә әхбарат министри Аида Балаева тәғдим қилди. Мундақ бәхиткә еришкәнләр қатарида Уйғур театри мудириниң орунбасари Надирәм Өмәрова вә театр актери Дилшат Аманбаевму бар.
Шундақла Мәдәнийәт вә әхбарат министрлигиниң «Мәдениет саласының үздігі» бәлгүси билән театрниң бәдиий рәһбири Фархадбек Канафин, балет артистлири Тайирҗан Тохтибақиев вә Гүлнарәм Турсунова тәғдирләнди. Министрниң «Құрмет» Пәхрий ярлиғи билән режиссерниң ассистенти Мухтәрҗан Җумаров, көрәрмән залиниң рәһбири Венерәм Мәрүпова, Тәшәккүрнамиләр билән җамаәтчилик билән алақә бөлүминиң менеджери Сүлфи Мәшрәпов, кадрлар бойичә инспектори Гүлназ Қасымбай, референт-катип Тахмина Ильяс, «Салалық кәсіподаққа 30 жыл» бәлгүси билән артист Нуралим Варисов, баш администратор Абдусаттар Турдибақиев, рәссам-декоратор Виктор Лаптев мукапатланди.
Биз, пурсәттин пайдилинип, мукапат һәм пәтир егилирини сәмимий тәбрикләп, иҗадий утуқлар тиләймиз.
Йолдаш МОЛОТОВ,
«Uiğur avazi»
https://uyguravazi.kazgazeta.kz/news/54438
ҚР Мәдениет және ақпарат министрлігі
Dilmurat Bakharov
