03/04/2021
"ខ្លានិងគីង្គក់" (បទពាក្យប្រាំពីរ)
មានខ្លាមួយក្បាលធាត់ទ្រលុក
បានដើរតត្រុកនៅក្នុងព្រៃ
កំពុងដើររកចាប់ចំណី
នៅប្របជើងព្រៃក្បែរមាត់បឹង ។
ប្រទះឃើញសត្វគីង្គក់មួយ
បងខ្លាអស់ព្រួយមួយគ្រាហ្នឹង
គីង្គក់ភ័យញ័រមួយទំហឹង
ងាប់ហើយមិនដឹងរត់ទៅណា ។
ស្រាប់តែនឹកឃើញល្បិចតូចមួយ
ក្រែងលោដោះព្រួយរួចសង្ខា
ក៏ស្តីប្រញ៉ាប់ប្រាប់បងខ្លា
ក្រែងបានសាច់ការរស់ផុតភ័យ ។
"ណែៗបងខ្លា មកភ្នាល់គ្នា
ហែលឆ្លងគង្គារបឹងនេះនៃ
បើបងដល់ត្រើយមុនខ្ញុំអី
ខ្ញុំអោយបងឆីមិនតវ៉ា ។"
ថាហើយខ្លាហក់សំដៅបឹង
គីង្គក់ខាំចុងកន្ទុយខ្លា
ខ្លាស្ទុះមួយវឹងដឹងយ៉ាងណា
វាត់គីង្គក់ផ្ងាធ្លាក់ត្រើយម្ខាង ។
គីង្គក់ធ្លាក់ដល់កល់ដុំថ្ម
បែកមាត់ឈាមឆរក្រហមដាង
ពេលខ្លាឡើងគោកភ្ញាក់ច្រង៉ាង
ឃើញគីង្គក់កាងនៅចាំស្រេច ។
"យីអាគីង្គក់ឫកសង្ហារ
ដល់មុនថ្មើរណាហែលយ៉ាងម៉េច
ជើងខ្លីកំបុិតក្តិតកំបុិច
ប្រាប់អញបន្តិចអោយដឹងផង ។"
"ហ៊ឺ!ខ្លាកម្សត់ត្រូវតែដឹង
យើងដល់ទីហ្នឹងយូរកន្លង
ចាប់តោពីរក្បាលស៊ីរួចផង
មិនឃើញលោកបងមកដល់ទៀត"។
ខ្លាឃើញមានឈាមនៅហ្នឹងមាត់
ខ្លាល្ងង់កម្សត់ស្ងាត់អោយជ្រៀប
រត់បោលគេចបាត់ឫកចោលម្សៀត
លែងនៅស៊កសៀតភ្លេចអាហារ ។
រត់ដល់បានឆ្ងាយណាយកម្លាំង
ក៏ឈប់មួយភាំងជួបនឹងស្វា
រៀបរាប់ដើមរឿងអស់សាច់ការ
ស្វាសើចនឹងខ្លាដែលល្ងង់ពិត ។
ស្វាប្រាប់សព្វគ្រប់ក៏ជឿស្វា
តែក្នុងចិន្តានៅភ័យភិត
បបួលស្វាទៅបានជាមិត្ត
ជិះខ្នងខ្លាគិតទៅម្តងទៀត ។
ទៅរកគីង្គក់សាកប្រាជ្ញា
វាខ្លាំងប៉ុនណារឺចោលម្សៀត
បានជាសត្វខ្លាផ្ងារចាញ់ស្នៀត
បើអញចាញ់ទៀតអោយដឹងដៃ ។
គីង្គក់មិនទាន់លោតទៅណា
មាត់នៅឈឺផ្សានៅឡើយនៃ
ក្រលេកឃើញស្វាយល់សេចក្តី
ក៏ហារស្រដីទៅពានរ ។
"ណែអាស្វាក្រេះអាកំសាក
ហែងកុំលេងញាកអាងាប់យ៎
ថាអោយគោដប់ស៊ីអោយល្អ
ឥឡូវម៉េចក៏បោកមិនស្បើយ?
បានខ្លាកញ្ចាស់មួយក្បាលហ្នឹង
តើឯងថ្ងៃហ្នឹងចង់ងាប់អី
ឆាប់ទៅរកគោបួនដប់ម្ភៃ
រីឯខ្លាព្រៃទុកហ្នឹងហើយ ។"
ខ្លាលឺដូច្នេះស្ទុះបោលវឹង
ស្វាតោងជាប់ទ្រឹងមិនលែងឡើយ
ខ្លាចរបូតដៃធ្លាក់ងាប់ហើយ
រកតែហារស្តីស្អីមិនចេញ ។
ខ្លាប្រឹងតែរត់ស៊ុតងាប់ចោល
ស្វាភ័យតែលតោលតោងជាប់ឆ្មិញ
ធ្លាក់ស្វាទៅដីប្រកាច់ស្ញេញ
ខ្លាឯណេះវិញមិនខ្ចីឈប់ ។
លុះដល់ឈប់រត់បាត់បងស្វា
"អញថាហើយថាអាស្វាឡប់
នៅសុខមិនចង់ ចង់ទៅងាប់
គីង្គក់ខាំជាប់រត់មិនរួច ។
សំណាងហើយអញរត់រហ័ស
កុំអីខានចាស់ត្រូវក្របួច
ចង្កូមគីង្គក់សែនព្រឺព្រួច
ម៉្លេះអញមិនរួចផុតសង្ខា ។"
03-04-2018
Sdach Neak
