01/02/2026
"ការងារល្អ មិនមែនជាការងារដែលធ្វើតាមតែគេបញ្ជាឡើយ"
ទស្សនៈនៃការរស់នៅជាបុគ្គលិករដ្ឋបាលវ័យចំណាស់ជាងគេបំផុតក្នុងលោក - យ៉ាស៊ូកូ តាម៉ាគី (Yasuko Tamaki)
“ការងារមិនគួរធ្វើឡើងគ្រាន់តែដោយសារមានគេបញ្ជានោះទេ ប៉ុន្តែគួរធ្វើឡើងដោយមានគោលដៅ និងកម្លាំងចិត្តចេញពីខ្លួនឯង។ បើធ្វើបានបែបនេះ មិនថាមានអ្វីកើតឡើង ក៏អ្នកនឹងអាចឆ្លងផុតវាបានដែរ។”
នៅពេលនិយាយអំពីការធ្វើការងារ អ្នកប្រហែលជានឹកឃើញដល់ជីវិតដែលស្ថិតក្នុងក្របខ័ណ្ឌ មានភារកិច្ចធ្ងន់ធ្ងរ និងសម្ពាធជាច្រើន។ ប៉ុន្តែសម្រាប់ ‘លោកយាយ យ៉ាស៊ូកូ តាម៉ាគី’ វ័យ ៩៦ ឆ្នាំ ដែលជាបុគ្គលិកក្រុមហ៊ុនម្នាក់ត្រូវបានទទួលស្គាល់ដោយ Guinness World Record ថាជាបុគ្គលិករដ្ឋបាល ដែលមានវ័យចំណាស់ជាងគេបំផុតក្នុងលោក បែរជាមានទស្សនៈចំពោះ ‘ការងារ’ ខុសប្លែកពីគេ។
លោកយាយយល់ថា ការងារគឺជាក្ដីសុខ និងជាកន្លែងសម្រាប់ការរីកចម្រើនដែលធ្វើឱ្យលោកយាយក្លាយជាខ្លួនឯងដូចសព្វថ្ងៃ។ លោកយាយនៅតែទៅធ្វើការ ៥ ថ្ងៃក្នុងមួយសប្តាហ៍ និងតែងតែបើកចិត្តទទួលយកអ្វីដែលថ្មីជានិច្ច។
ព្រោះជីវិតគឺជាការធ្វើដំណើរដ៏វែងឆ្ងាយ ការងារដែលលោកយាយជ្រើសរើសធ្វើមិនមែនជារឿងដែលត្រូវរត់គេច ឬបង្ខំចិត្តទ្រាំនោះទេ ប៉ុន្តែវាគឺជាផ្នែកមួយនៃវិថីដែលលោកយាយសន្សឹមៗរៀនសូត្រ និងរីកចម្រើនទៅតាមពេលវេលាដែលផ្លាស់ប្តូរ។
♦️ រៀនរស់ដើម្បីរៀនធ្វើការ
ដោយសារលោកឪពុកបានចែកឋានទៅតាំងពីលោកយាយនៅក្មេង ធ្វើឱ្យកូនស្រីច្បងដូចជាលោកយាយ យ៉ាស៊ូកូ ត្រូវក្រោកឈរឡើងធ្វើជាមេគ្រួសារ ចាប់ផ្តើមធ្វើការដើម្បីចិញ្ចឹមម្ដាយ និងប្អូនៗ ៣ នាក់ទៀតឱ្យបានរៀនសូត្រ តាំងពីលោកយាយមានអាយុ ១៥ ឆ្នាំ ទោះបីជាលោកយាយរៀនចប់ដោយទទួលបានលទ្ធផលល្អឥតខ្ចោះក៏ដោយ។
បន្ទាប់ពីនោះ លោកយាយបានឈានជើងចូលក្នុងពិភពការងារយ៉ាងពេញទំហឹង ដោយសាកល្បងធ្វើការតាំងពីក្រុមហ៊ុនធានារ៉ាប់រង រហូតដល់រោងចក្រវាយនភណ្ឌ បានជួបប្រធាន និងបរិយាកាសការងារប្លែកៗ រហូតរៀនស្គាល់ពីតម្លៃនៃ ‘ការងារ’ ពិតប្រាកដ។
“ខ្ញុំធ្លាប់ធ្វើការក្នុងក្រុមហ៊ុនដែលមានអគារស្អាតៗ ប៉ុន្តែខ្ញុំគិតថា នេះប្រហែលជាមិនមែនជាការងារដែលខ្ញុំចង់ធ្វើឡើយ រហូតដល់ថ្នាក់មិនចង់ទៅធ្វើការ ហើយក៏ឈប់សម្រាកប្រហែលមួយសប្តាហ៍។ ពេលនោះសាច់ញាតិដែលណែនាំខ្ញុំឱ្យចូលធ្វើការ បានទូរសព្ទមកស្ដីបន្ទោសយ៉ាងខ្លាំង ដោយនិយាយថា មិនទាន់ទាំងបានធ្វើការឱ្យអស់ពីចិត្តផង តើមកត្អូញត្អែរអ្វី? ត្រូវធ្វើឱ្យអស់ពីសមត្ថភាពសិនទៅ!”
“ពេលនោះហើយដែលខ្ញុំភ្ញាក់ខ្លួន ហើយសួរខ្លួនឯងថា តើខ្ញុំធ្លាប់ប្រឈមមុខនឹងការងារពិតប្រាកដហើយឬនៅ? ចាប់តាំងពីពេលនោះមក ខ្ញុំក៏បានប្តូរឥរិយាបថ និងតាំងចិត្តធ្វើការឱ្យអស់ពីសមត្ថភាព។”
ក្នុងឆ្នាំ ១៩៥៥ លោកយាយ យ៉ាស៊ូកូ ក្នុងវ័យ ២៥ ឆ្នាំ បានដាក់ពាក្យធ្វើជាបុគ្គលិកផ្នែកគណនេយ្យ និងរដ្ឋបាលទូទៅនៃក្រុមហ៊ុន Sunco Industries Co., Ltd. ក្នុងក្រុងអូសាកា និងបានប្រើជីវិតជាបុគ្គលិកដោយក្ដីសុខ និងភាពសប្បាយរីករាយជារៀងរាល់ថ្ងៃ។
“ខ្ញុំសប្បាយនឹងការលេងកីឡា ទៅចូលរួមសកម្មភាពក្លឹបរបស់ក្រុមហ៊ុនជាមួយមិត្តភក្តិ។ ជួនកាលថ្ងៃសុក្រទៅលេងស្គី (Ski) រួចត្រឡប់មកធ្វើការវិញនៅពេលព្រឹកក៏មាន (សើច)។ ខ្ញុំលះបង់ទាំងការងារ និងការលេងកម្សាន្តឱ្យស្មើគ្នា ធ្វើឱ្យខ្ញុំរីករាយនឹងជីវិតខ្លាំងណាស់។”
លោកយាយបានធ្វើការឆ្លងកាត់ការផ្លាស់ប្តូរនៃពិភពលោក តាំងពីសម័យអាណាឡូកដែលធ្វើការលើក្រដាស និងមានបុគ្គលិកត្រឹមតែ ១៦ នាក់ រហូតមកដល់សម័យឌីជីថលដែលគ្រប់គ្នាធ្វើការលើប្រព័ន្ធអនឡាញ និងមានបុគ្គលិករហូតដល់ ៤៣២ នាក់។ លោកយាយបាននៅក្បែរក្រុមហ៊ុនក្នុងថ្ងៃដែលលំបាក ទាំងវិបត្តិប្រេង និងវិបត្តិហិរញ្ញវត្ថុជាច្រើនលើក។ លោកយាយធ្វើការបាន ១៥ ឆ្នាំ ក៏ត្រូវបានតម្លើងតំណែងជាប្រធានផ្នែក ហើយថែមទាំងទទួលបានសំណើពីក្រុមហ៊ុនឱ្យបន្តធ្វើការងារក្នុងវ័យដែលត្រូវចូលនិវត្តន៍ (៥៥ ឆ្នាំ) និងបានធ្វើការបន្តរហូតមកដល់បច្ចុប្បន្ន។
♦️នេះគឺជាការងាររបស់ខ្ញុំ
បទពិសោធន៍ការងារដ៏យូរអង្វែងជាង ៧១ ឆ្នាំ ធ្វើឱ្យលោកយាយជួបមនុស្សជាច្រើន និងចំណុចផ្លាស់ប្តូរ ប៉ុន្តែលោកយាយនៅតែអាចបត់បែន និងឆ្លងកាត់គ្រាលំបាកមកបាន។ លោកយាយគឺជាបុគ្គលិករៀមច្បងដែលប្អូនៗគោរព និងជាប្រធានដែលកូនចៅទុកចិត្ត។
“ពេលដែលខ្ញុំឡើងធ្វើជាប្រធានក្នុងអាយុ ៣៥ ឆ្នាំ ខ្ញុំរំពឹងខ្ពស់ពេក ធ្វើឱ្យកូនចៅមិនយល់ និងមានការប្រឆាំង ប៉ុន្តែខ្ញុំក៏បានគិតឃើញថា ជំនួសឱ្យការបង្ខំគំនិតខ្លួនឯង ខ្ញុំជ្រើសរើសធ្វើការជិតស្និទ្ធជាមួយពួកគេ បង្ហាញឱ្យឃើញថា កូនចៅមិនមែនជាជំនួយការរបស់ខ្ញុំទេ ប៉ុន្តែគឺជា 'ដៃគូ' និងជាតួអង្គសំខាន់នៃដុំការងារនោះ។”
“ការធ្វើឱ្យពួកគេមានអារម្មណ៍ថា ខ្ញុំគឺជាអ្នកគាំទ្រ និងជាអ្នកដែលពួកគេអាចពឹងផ្អែកបាន នោះហើយគឺជាតួនាទីរបស់ប្រធាន។”
លើសពីនេះ លោកយាយនៅតែបើកចិត្តទទួលយកចំណេះដឹងថ្មីៗរាល់ថ្ងៃ អានសៀវភៅ និងបត់បែនទៅតាមសម័យកាល ជាពិសេសក្នុងថ្ងៃដែលកុំព្យូទ័របានក្លាយជាចំណែកសំខាន់នៃការងារ។
“ក្នុងអាយុ ៤១ ឆ្នាំ មានការយកកុំព្យូទ័រមកប្រើប្រាស់ មនុស្សជាច្រើនខ្លាច និងមិនស៊ាំ ប៉ុន្តែខ្ញុំជាមនុស្សចង់ដឹងចង់ឃើញ ទើបចាប់អារម្មណ៍ និងសន្សឹមៗស្វែងរកចម្លើយចំពោះអ្វីដែលមិនយល់ម្ដងមួយៗ មានមនុស្សមួយចំនួនដែលមិនអាចបត់បែនតាមកុំព្យូទ័របានក៏សម្រេចចិត្តលាឈប់ ការដែលខ្ញុំអាចឆ្លងកាត់ចំណុចនេះបាន ចាត់ទុកថាជាចំណុចរបត់សំខាន់ដែលធ្វើឱ្យខ្ញុំអាចបន្តធ្វើការងារបានរហូតមកដល់ពេលនេះ។”
មូលហេតុមួយទៀតដែលធ្វើឱ្យលោកយាយធ្វើការបានយូរ ព្រោះលោកយាយជឿជាក់យ៉ាងមុតមាំថា ការងារទាំងនោះ លោកយាយត្រូវធ្វើដោយខ្លួនឯង និងត្រូវធ្វើជាតួអង្គសំខាន់ដែលសម្រេចរាល់ការងារឱ្យបានជោគជ័យ។
“ខ្ញុំតែងតែរំលឹកខ្លួនឯងថា មិនថាការងារតូចតាចប៉ុណ្ណាក៏ដោយ វាគឺជាការងាររបស់ខ្ញុំ ហើយខ្ញុំគឺជាអ្នកធ្វើវា ខ្ញុំដាក់គោលដៅឱ្យខ្លួនឯងច្បាស់លាស់ និងរៀបចំផែនការអនុវត្ត ទើបការងារមិនដែលក្លាយជាបន្ទុក ហើយអាចធ្វើការបានដោយភាពរីករាយ។”
♦️គន្លឹះការងាររបស់ ‘បុគ្គលិករដ្ឋបាលវ័យចំណាស់ជាងគេក្នុងលោក’
ក្នុងឆ្នាំ ២០២១ លោកយាយ យ៉ាស៊ូកូ ទទួលបានវិញ្ញាបនបត្រពី Guinness World Record ថាជា អ្នកគ្រប់គ្រងការិយាល័យ (Office Manager) ដែលមានវ័យចំណាស់ជាងគេបំផុតក្នុងលោក លោកយាយនៅតែទៅធ្វើការ ៥ ថ្ងៃក្នុងមួយសប្តាហ៍ អានសៀវភៅបន្ថែមចំណេះដឹងថ្មីៗ ធ្វើការក្បែរប្អូនៗ និងមិនអៀនខ្មាសក្នុងការសួរចំណុចដែលមិនដឹងទៅកាន់ក្មេងៗឡើយ។
“ខ្ញុំគិតថាវាគ្រាន់តែជាការសន្សំបន្តិចម្ដងៗមកជារៀងរហូត ខ្ញុំតែងតែជឿជាក់ថា ខ្លួនឯងកើតមកដើម្បីធ្វើជាប្រយោជន៍ដល់នរណាម្នាក់ ដូច្នេះខ្ញុំចង់ធ្វើអ្វីដែលធ្វើឱ្យប្រធាន ថ្នាក់ដឹកនាំ និងបុគ្គលិកគ្រប់គ្នាមានក្ដីសុខជាមួយគ្នា ហើយនោះគឺជាគោលដៅពេញមួយជីវិតរបស់ខ្ញុំ។”
គន្លឹះសំខាន់ដែលលោកយាយបានចែករំលែកក្នុងសៀវភៅ ‘មេរៀនពីប្រធានផ្នែករដ្ឋបាលវ័យ ៩២ ឆ្នាំ’ លោកយាយបានប្រាប់ថា “ការងារសំខាន់ត្រូវធ្វើមុន” និងត្រូវត្រៀមខ្លួនសម្រាប់ការងារជានិច្ច លោកយាយតែងតែកត់ត្រាការងារប្រចាំថ្ងៃ និងគណនាពេលវេលាដែលប្រើក្នុងកិច្ចការនីមួយៗ រួចយកព័ត៌មានទាំងនោះមកវាយតម្លៃ និងរៀបចំផែនការការងារប្រចាំថ្ងៃ និងប្រចាំខែ ដោយប្រើប្រាស់ប្រតិទិន និងសៀវភៅកត់ត្រាដើម្បីមើលរូបភាពរួមនៃការងារទាំងអស់។
ព្រោះលោកយាយជឿថា ការងារល្អមិនមែនជាការងារដែលត្រូវបានគេដាក់ឱ្យធ្វើនោះទេ ប៉ុន្តែត្រូវតែជាការងារដែលបុគ្គលិកម្នាក់ចាប់ផ្តើមគិត និងបង្កើតឡើងដោយខ្លួនឯង។
លោកយាយតាំងចិត្តនឹងបន្តធ្វើការរហូតដល់អាយុ ១០០ ឆ្នាំ ព្រោះលោកយាយយល់ថា ការងារដែលផ្លាស់ប្តូរទៅជារៀងរាល់ថ្ងៃ នៅតែជារឿងដែលគួរឱ្យរំភើប បើទោះបីជាថ្ងៃនេះលោកយាយមានអាយុ ៩៦ ឆ្នាំហើយក៏ដោយ ហើយនៅពេលក្រឡេកមើលទៅកាន់មិត្តរួមការងារជំនាន់ចៅៗ អ្វីដែលលោកយាយចង់ប្រាប់ពួកគេគឺ សូមព្យាយាមមើលខ្លួនឯងដោយចិត្តជាកណ្តាល មើលទាំងចំណុចល្អ និងចំណុចខ្សោយរបស់ខ្លួនឯង ហើយសូមរស់នៅក្នុងជីវិតតាមបែបដែលអ្នកចង់ក្លាយជា។
“មិនថាអាយុប៉ុន្មានទេ ខ្ញុំចង់ឱ្យគ្រប់គ្នាស្មោះត្រង់នឹងខ្លួនឯង ហ៊ាន និងត្រៀមខ្លួនប្រឈមមុខនឹងអ្វីដែលថ្មី ដាក់គោលដៅ រួចបោះជំហានទៅមុខដើម្បីប្រើជីវិតបន្តទៅទៀត។”
រឿងរ៉ាវរបស់លោកយាយ យ៉ាស៊ូកូ មិនបានប្រាប់យើងថាត្រូវធ្វើការឱ្យបានយូរប៉ុណ្ណាទេ ប៉ុន្តែវាបានប្រាប់យើងថា អត្ថន័យនៃជីវិតប្រហែលជាគ្រាន់តែជាការទទួលស្គាល់ខ្លួនឯង ការធ្វើអ្វីដែលនៅចំពោះមុខដោយបេះដូង និងការមិនឈប់រៀនសូត្រ ព្រោះជួនកាលក្ដីសុខអាចនឹងមិនអាស្រ័យលើអាយុឡើយ តែវាអាស្រ័យលើថា តើថ្ងៃនេះយើងបានរស់នៅក្នុងជីវិតដែលយើងទទួលស្គាល់ និងមានមោទនភាពចំពោះខ្លួនឯងហើយឬនៅ។
_____សុវត្ថន៍-Sovathn
ប្រភពឯកសារយោង:
- Tamaki, Y. (2022). 92-sai soumu kachou no oshie [Lessons from the 92-year-old General Affairs Manager]. Diamond-sha.
- Guinness World Records. (2021, April 😎. 90-year-old woman from Japan becomes the world’s oldest office manager.
- The Times of India. (2025, January 28). Meet the 95-year-old Japanese woman who has worked for over 65 years at the same job: "I was born to be useful to others".
