16/03/2020
...
2001-жыл. Кычыраган ызгаар кыш🌬❄. Февралдын тогузу Алтынай төрөтканага жеткирилген. Азыр толгоонун азабын тартып,жаны көзүнө көрүнүп,кылаарга айла таппай, ары-бери максатсыз басат. Ооруканага жеткирилген 3 күн жашоосунун эң ачуу, эң каардуу күндөрү болду. Ары-бери басып, келме келтиргендей алда эмнелерди ичинен шыбырап, Кудайлап сүйлөнөт. Ал ушундай кыйналып жатканда, шамал,бороон-чапкын🌪 күчөдү,шабыр-шубур этип, терезеден тырманып жатты. Көз ачырбай жааган кардан🌨 көчөдө бирөө жарым жок. Аба-ырайы Алтынайдын ахыбалын сезгендей бүгүн тынч эмес...
Демейде, ар нерсеге кайраты бек Алтынай бул жолу канчалык чымырканса да оорусуна чыдай алчудай эмес. Эртең менен врач-акушер келип, "Буйруса, эртең төрөйсүз"деп кеткен. Ошондо эле оорусу күч эле. 11-ФЕВРАЛЬ⚜. Азыр саат түнкү төрттөр чамасы. Бир күнү жүз күнгө татып,таңдын атмагы тозок болуп, чыкылдаган сааттын жебесин карап, демин сыртка чыгарып, бир турат,бир жатат. Таң атаары менен доктурлар келип, Алтынайдын абалын көрүп, мед.айымдарга "Даярдана бергиле, толгоо күчөдү,бүгүн төрөйт "дешти. Алтынайдын мууну калтырап, коркуп чыкты. Аны мед.айымдар коркунучтуу сезилген узун коридордон сүйрөп кетип баратышты....
Алтынайдын оозу кургап, ичинин ооруганынан беш бүгүлүп, беш жазылып,бир ыйлап, бир токтоп,бирде бошоп, бирде чымырканып,күч топтоп өлүм менен өмүр ортосунда күрөшүп жатып, бир жанды жарык дүйнөгө алып келди. Кызыл эт немени арыдан-бери орончуга ороп, Алтынайдын көкүрөгүнө жаткырышты. Алтынай сүйлөөгө алы келбей, оозун араң кыбыратып "Ким экен?!"деди.
-Кыздуу болдуңуз -дешти. Алтынай муну укканда өксүп-өксүп,жаш балача,шолоктоп,өпкөсү көөп көпкө ыйлады.
-Эмнеге ыйлайсыз? Жакшынакай кыздуу болдуңуз. Аман-эсен төрөдүңүз. Же эркек бала болбой калды деп ыйлап жатасызбы? деди ары жактагы мед.айым.
А бирок аныгында Алтынай "Кызым, кийин убагы келсе, өлүм менен өмүрдүн ортосунда күрөшүп, мендей жаны жанчылып, мендей кыйналып төрөйбү?!!!"-деп кызын аяп ыйлап жаткан эле. Наристесин аяп, эне жүрөгү ыйлады эле. Муну эч ким туйган жок. Эне жүрөгү эмне ойлоп жатканын, эч ким сезген жок.
-Кызым, көздүү мончогум...Жаным,кызым деп жытын искеп, жаны жай ала түштү....
❤ @ Я родился
