20/05/2026
Dagana 11.–15. maí fór ársfundur bókmenntaborga UNESCO fram í Tartu, Eistlandi, þar sem 66 fulltrúar frá 42 bókmenntaborgum víðs vegar að úr heiminum komu saman. Á dagskrá voru vinnufundir, heimsóknir í bókmenntastofnanir borgarinnar, fundir með rithöfundum og öðru bókmenntafólki, auk þátttöku í alþjóðlegu bókmenntahátíðinni Prima Vista.
Reykjavík hefur undanfarin ár gegnt leiðandi hlutverki innan samstarfsnets bókmenntaborga UNESCO, sem hefur aukið sýnileika bókmennta frá Reykjavík og skapað fjölmörg alþjóðleg tækifæri fyrir reykvíska höfunda.
Að þessu sinni tóku tveir höfundar frá Reykjavík þátt í samstarfsverkefnum tengdum ráðstefnunni. María Elísabet Bragadóttir, sem dvelur nú í höfundadvöl í Literaturstadt Heidelberg, lagði til texta í verkefnið TOPONYMY. TOPONYMY er farandsýning sem færist milli bókmenntaborga og tekur á sig nýja mynd í hverri gestaborg.
Sýningin var þróuð af Québec, ville de littérature Unesco og var fyrst sett upp árið 2023 á ársfundi bókmenntaborga þar í borg. Síðan hefur hún verið sýnd í Jakarta og Heidelberg og er nú komin til Tartu. Sýningin varpar ljósi á uppruna örnefna bókmenntaborga með nútímalegri túlkun.
Þá tók Ingólfur Eiríksson, sem áður hefur dvalið sem gestahöfundur í Tartu, þátt í verkefninu Bus Poetry, þar sem ljóð birtast í strætisvögnum borgarinnar. Verkefnið hefur verið starfrækt frá árinu 2015 og eru ný ljóð valin ár hvert. Ljóð Ingólfs birtist jafnframt í sérstöku safnriti sem gefið var út í tengslum við ráðstefnuna.
