Gallerí Grótta

01/09/2026

Ingibjörg Dalberg tekur á móti gestum á sýningu sína Fjöll og firnindi laugardaginn 5. september kl. 11-16.
Viðfangsefni Ingibjargar eru náttúra Íslands, himinn og jörð, fjöll og firnindi. Villtur gróður við árbakka sem og fuglar, bæði kríur sem leika sér yfir tjörn eða velli og bjarthegri, eftirlætis flækingsfuglinn, sem stendur hnarreistur á framandi slóð.
Málverkin sem eru unnin með olíu á striga eru að mestu huglæg í túlkun íslenskrar náttúru, þar sem leitast er við að finna ró, bjartsýni og fegurð landsins, þar sem sjaldan ríkir logn en ævinlega blámi.
Seltjarnarnesið á sér sérstakan stað í hjarta Ingibjargar þar sem hún var félagi í Selkórnum, söngkór Seltirninga, um þrjátíu ára skeið. Sum málverkin skírskota til eftirlætis söngverka kórsins í áranna rás og eru því helguð því litríka tímabili í lífi hennar.
Málverkasýningin Fjöll og firnindi í Gallerý Gróttu er 6. einkasýning Ingibjargar, en einnig hefur hún tekið þátt í samsýningum.
Verið velkomin í Gallerí Gróttu

28/08/2026

19/08/2026

Ingibjörg Dalberg myndlistarkona opnar sýningu sína Fjöll og firnindi í Gallerí Gróttu fimmtudaginn 27. ágúst n.k.
Viðfangsefni Ingibjargar eru náttúra Íslands, himinn og jörð, fjöll og firnindi, gróður og fuglalíf. Sýningin stendur til 26. september 2026.

04/08/2026

Kæru vinir, nú eru síðustu dagar sýningar Guðrúnar Matthíasdóttur, Tilbrigði.

Síðasti sýningardagur er 7. ágúst.

Opið 10-18 virka daga og 10-17 á föstudag.

Verið velkomin í Gallerí Gróttu.

09/07/2026

Guðrún Matthíasdóttir opnaði sýningu sína Tilbrigði í Gallerí Gróttu 25. júní sl.

Vatn er alls staðar, inni í okkur og í kringum okkur. Við tökum það sem sjálfsagðan hlut og við gleymum stundum að gefa því gaum hversu falleg eru tilbrigði vatnsins.
Guðrúnu hefur alltaf fundist síbreytileiki vatnsins spennandi viðfangsefni í ljósmyndun og hefur tekið óteljandi myndir af því í gegnum tíðina, í mismunandi formum. Til að mynda af daggardropum, ískristöllum og ölduslettum við sjávarborðið. Yfirleitt kýs hún að notast við macro- og aðdráttarlinsur til þess að fá meiri nálægð og aðra sýn.

Undanfarin ár hefur hún einbeitt sér að formunum og litunum sem umbreytast á vatnsfletinum. Með því að nálgast yfirborðið birtist breytt mynd og speglunin í vatninu tekur á sig sjálfstæða og abstrakt mynd. Markmiðið er að koma áhorfandanum á óvart og afhjúpa form og liti sem oft fara framhjá okkur en birtast hverjum og einum á sinn hátt.

Sýningin stendur til 7. ágúst.

18/06/2026

Ljósmyndasýningin Farið í fjörurnar - síðustu sýningardagar.

Verið velkomin í Gallerí Gróttu.
Opið í dag til kl. 18 og á morgun föstudag kl. 10-17.

Laugardaginn 20. júní tekur Magnús V. Guðlaugsson á móti gestum á síðasta degi sýningarinnar kl. 13-17. Ath! Gengið inn frá Eiðistorgi 2. hæð.

18/05/2026

Magnús V. Guðlaugsson opnar ljósmyndasýninguna Farið í fjörurnar í Gallerí Gróttu kl. 17. þann 21. maí.

Eftir síðustu aldamót hefur Magnús unnið að og sýnt ljósmyndaverk, innsetningu og fleira. Síðustu árin hefur hann þó einbeitt sér að ljósmyndun.

Myndefnið er gjarnan sótt í ýmiss konar birtingarmyndir náttúrunnar, oftast í nærmynd. Í nálgun sinni hefur Magnús m.a. leitað í fyrirbærafræði sér til halds og trausts. Ljósmyndirnar á sýningunni eru teknar í fjörum á Sólheimasandi, Skógasandi og á Seltjarnarnesi.

Kontaktupplýsingar:
Heimasíða: https://magnusvg.smugmug.com
Netfang: [email protected]
Sími: 897 3565

Sýningin stendur til 20. júní (þann dag er sýningin opin kl. 13-17 – aðgengi frá Eiðistorgi).

09/04/2026

Kæru vinir. Laugardaginn 11. apríl tekur Elín Anna á móti gestum á sýningu sína Ommeletta -hljómar vel- í Gallerí Gróttu kl. 11-14.

ATH! Gengið er inn í Gallerí Gróttu frá Eiðistorgi 2. hæð.