10/05/2026
TEIKNAÐ AF KONUM: BRAUTRYÐJENDUR Í ARKITEKTÚR er opin vinnustofa og sýning sem ætlað er að gefa innsýn inn í yfirstandandi gagnaöflun um fyrstu konurnar sem luku námi í arkitektúr, allt frá árinu 1940 til og með 1980 með það að markmiði að gefa afrakstur vinnunnar út í bókarformi.
Flestar þessara kvenna eru fæddar á Íslandi, en sumar áttu rætur annars staðar. Margar sneru heim eftir nám á meðan aðrar kusu sér starfsvettvang erlendis. Ljóst er að áhrif þeirra og faglegur metnaður hefur markað varanlegt spor á íslenska byggingarlist, ýmist á sviði skipulags eða bygginga, en jafnframt náð langt út fyrir Ísland. Þar má telja til framsæknar skólabyggingar í Frakklandi og félagslegar byggingar í Svíþjóð – sumar svo mikilvæg tímamótaverk að þær hafa verið friðaðar vegna menningarsögulegs gildis. Byggingar og verk þeirra liggja enn víðar; meðal annars í Bandaríkjunum, á Ítalíu – í hjarta norræns samstarfs í Færeyjum, endurreisn tuga kastala í Skotlandi og í skipulagsmálum í Mósambík.
Á sýningunni er að finna upplýsingar úr Arkitektatali frá árinu 1997, ásamt einstaka teikningum og ljósmyndum af verkum þeirra sem gefur örlítila vísbendingu um ævistarf og höfundarverk þessarra kvenna en einnig eru myndbandsupptökur þar sem nokkrar þeirra segja frá viðhorfum sínum, reynslu og ástríðu fyrir arkitektúr til að skapa betra samfélag.
Sýningin og vinnustofan verður opin fram á haust og áhugasömum gefinn kostur á að kíkja við og kynna sér efnið, en líka bæta við fróðleik, sögum eða athugasemdum og taka þannig beinan þátt í að stækka gagnasafnið og dýpka enn frekar. Opið verður á fimmtudögum milli kl. 16 og 18, en líka er hægt að óska eftir opnun með því að senda póst á [email protected].
