21/02/2026
SUMARTÓNLEIKAR
Listasafns Sigurjóns Ólafssonar
Tónleikar hafa verið haldnir í Listasafn Sigurjóns Ólafssonar frá opnun þess, 21. október 1988, fyrstu árin ekki reglulega, en yfirleitt á þriðjudagskvöldum og nefndust þá „þriðjudagstónleikar“. Fljótlega komst þó á það form sem nú er - að halda röð vikulegra tónleika yfir hásumarið - og nefna þá Sumartónleika Listasafns Sigurjóns Ólafssonar. Hér er listi yfir alla tónleika safnsins frá upphafi og fylgja flestum þeirra efnisskrár: lso.is/Sagan_i.htm
Sumartónleikar LSÓ hafa þá sérstöðu meðal annarra tónleikaraða að vandað umsóknarferlið er opið öllum tónlistarmönnum og valið er úr umsóknum á faglegum grunni. Efnisskrá tónleikanna er ætíð afar vönduð og fjölbreytt, allt frá endurreisnar-, barrokk- og klassískri tónlist til nútímaverka. Salur listasafnsins hentar einkar vel fyrir einleik, dúó og tríó, enda eru það algengustu tónleikaformin, og fjöldi tónverka hefur verið frumfluttur þar. Gert er samkomulag við tónlistarfólk þar sem meðal annars koma fram greiðslur fyrir þátttökuna sem eru óháðar aðsókn að tónleikunum.
Styrkir frá Tónlistarsjóði til Sumartónleika LSÓ hafa verið forsenda fyrir því að geta haldið röðinni úti. Að jafnaði hefur framlag sjóðsins jafnast á við greiðslur til tónlistarfólks. Allt annað, skipulag, úrvinnsla umsókna, vinna við sjálfa tónleikana, húsnæði, kynningar, flygilstillingar og fleira hefur safnið lagt til.
Á síðasta ári var sótt um til Tónlistarsjóðs að vanda, en Sjóðurinn sá ekki ástæðu til að styrkja þetta framtak, en undirbúningi sumarsins var að mestu lokið og búið að semja við alla flytjendur þegar það fréttist. Var því ekki aftur snúið. Sumartónleikar Listasafns Sigurjóns Ólafssonar 2025 voru því haldnir með sama brag og fyrri ár, en allur kostnaður féll á safnið. Alger óvissa ríkir um framlag til næsta sumars, en safnið hefur ekki bolmagn til að taka þá áhættu að standa undir þeim eitt. Því varð að taka þá erfiðu ákvörðun að hætta sumartónleikum LSÓ eftir hátt á fjórða áratuga starf. Safnið mun halda áfram að halda staka tónleika og þá í samstarfi við tónlistarfólk.
