06/08/2025
Vá, bara ótrúlegt að lífið geti haldið áfram eftir þessa stórbrotnu verslunarmannahelgi en hingað erum við komin!
Kynngimögnuð Nábrók að baki 🤩🤩🎆 og einstaklega vel heppnuð þar sem fjölmargir sveitungar lögðu hönd á plóg og uppskáru svo sannarlega! Gleðin hófst sem endranær í fjárhúsinu á Melum þar sem Melasystur og bandamenn, Siggi, Þorvaldur og Ragnar, áttu stórleik og voru tónleikarnir einstaklega vel sóttir 🥰
Á laugardeginum var Mýrarbolti þar sem 9 lið öttu kappi og yljuðu leikmenn sér milli leikja í Krossnesvatninu, þó veður hafi reyndar verið með besta móti😍 Náðu lið Bergistanga og Mela í úrslit en þar fór Bergistangi með frækinn sigur af hólmi! Lið Víganess var valið smekklegasta liðið 😎🤌 Á laugardagskvöldið var dansleikur í félagsheimilinu Árnesi, sá eini á Vestfjörðum þetta kvöldið. Þar hélt hljómsveitin Blek og byttur uppi feiknagóðu stuði fram á rauða nótt og þessar rauðu nætur eru nú hvergi eins fallegar og í Trékyllisvík 😍😍
Á sunnudaginn hvíldu menn lúin bein en Árnesmenn og Raggi og Guðbrandur Torfa undirbjuggu fjörusöng fyrir kvöldið. Sá lukkaðist svona líka vel þó blési um tíma úr öllum áttum og svo mikið var fjörið að mátti vart vita hvort maður væri á brekkusöng eða leiksýningu! Þarna stigu á svið bæði sjóræningjar og knapar og skemmtu mannskapnum með söng og gleði þar til yfir lauk með stórsýningu Bæjarmanna! 🤩🤩
Bestu og innilegustu þakkir! til allra sem hjálpuðust að við að gera þessa helgi svona dásamlega! Þetta væri ekki hægt án ykkar ❤😘❤ OG auðvitað þakkir til allra sem mættu og göldruðu fram þessa mögnuðu stemningu með okkur🤩💕
