02/08/2024
METÞÁTTAKA Á INNSÆVI
Innsævi, menningar- og listahátíð Fjarðabyggðar, lauk þann 27. júlí og ekki er hægt að segja annað en að hátíðin hafi tekist með miklum ágætum. Innsævi var nú haldin í þriðja sinn og átti sér stað um allt sveitarfélagið og greina mátti mikla ánægju bæði meðal þeirra fjölda gesta sem sóttu viðburði og þess listafólks sem tók þátt í þeim fjölmörgu viðburðum sem áttu sér stað í þann rúma mánuð sem Innsævi stóð yfir.
Aðsókn á viðburði var með besta móti og það er gaman að segja frá því að greina má talsverða aukningu á fjölda gesta en í sumar mættu rúmlega 1300 manns á Innsævi. Þátttakendur sem stóðu að baki Innsævis voru 122 og áttu viðburðirnir 32 sér stað í 21 viðburðarrýmum víða í sveitarfélaginu.
Í ár lagði listrænn stjórnandi og viðburðastjóri Innsævi sérstaka áherslu á að fá listafólk úr Fjarðabyggð og með austfirskar tengingar „heim“ til að koma fram, taka þátt og sýna list sína auk þess að stuðla að inngildingu í samfélaginu. Má í þessu samhengi nefna hljómsveitirnar Dundur og CHÖGMA, listakonurnar Sögu Unn, Sædísi og Svanlaugu Aðalsteinsdóttur, plötusnúðana Nonna Clausen og Tonytjokko, ljósmyndarann og skáldið Dagbjörtu Elvu Sigurðardóttur ásamt hljómsveitinni Völusteinar, gítarleikarann Svan Vilbergsson og Magma, ljóðskáldin Jón Knút Ámundsson og Önnu Karen Marinósdóttur, hljóðinnsetninguna ÓM með þeim Hauki og Kötlu, og listamennina Marc Alexander og Pál Ivan frá Eiðum. Þessi stefna setti mikinn og jákvæðan svip á hátíðina og ekki annað að sjá en að þetta hafi fallið í kramið og haft mjög góð áhrif á aðsókn.
Sýningin Pressuð flóra Íslands sem pólski listamaðurinn Maciej Łobczowski á veg og vanda af ásamt þeim Marc Alexander og Rafal Jan Koczanowicz sem opnaði í Templaranum á Fáskrúðsfirði var svo endapunkturinn á hátíðinni. og var hún virklega vel sótt.
Takk öll þið sem lögðuð leið ykkar á tónleika og sýningar hjá okkur í sumar og áttu þátt í því að gera þetta að ógleymanlegri hátíð. Takk öll þið sem lögðu hönd ykkar á plóginn, fjölluðu um það sem hér var að gerast og hjálpuðu okkur með viðburðahald og annað tilfallandi, og að lokum hjartans þakkir til þessa stóra hóps listafólks sem tók þátt í Innsævi og kom víða að til að lyfta andanum og gefa af sér á svo undursamlegan, óeigingjarnan og mikilvægan hátt!
https://www.fjardabyggd.is/vidburdir-frettir-og-tilkynningar/lesa-frettir-og-vidburdir/innsaevi-menningar-og-listahatid-fjardabyggdar
