Leikfélag Hornafjarðar

02/06/2026

Hefuru áhuga á að taka þátt í starfinu okkar?

Hér er lítil könnun frá okkur í stjórninni sem við værum afar þakklát fyrir ef þið gæfuð ykkur tíma til að skoða og svara.

Markmið könnunarinnar er að kanna áhuga á þátttöku í ýmiss konar verkefnum sem okkur dettur í hug að leikfélagið gæti staðið fyrir.

Það er engin skuldbinding fólgin í því að svara könnuninni. Hins vegar hjálpar hún okkur að sjá hvaða verkefni vekja áhuga meðal félagsmanna. Ef við sjáum að nægur áhugi er fyrir ákveðnu verkefni getum við skoðað það nánar og metið hvort mögulegt sé að hrinda því af stað.

18/05/2026

ATH : Ný dagsetning á Aðalfundi.

Sælir kæru vinir,

Við þurfum því miður að fresta aðalfundinum okkar um eina viku vegna annarra listrænna viðburða.

Aðalfundurinn verður því haldinn þriðjudaginn 26. maí kl. 18:00 á Heppu.

Allir velkomnir og súpa í boði.

07/04/2026

Stórvinir okkar hjá Doorway Casting sjá um að casta í þetta spennandi verkefni. Ef þið hafið áhuga á að vera á alvöru kvikmyndatökusetti, endilega hafið samband við þau og látið vita.

29/03/2026

Leikfélag Hornafjarðar, í samstarfi við Leikfélag Söðlasýslu, þakkar áhorfendum og öllum sem komu að þessari dásamlegu sýningu kærlega fyrir þetta ferðalag.

Þótt margir hafi lagt í ótal stundir síðustu 11 vikur til að láta allt ganga upp, hefði þetta skemmtilega verk ekki verið neitt án þeirra 533 áhorfenda sem komu og lyftu sjálfstrausti þátttakenda um ómælanleg prósentustig með hlátri og gleði.

Hver einasta sýning kom hópnum á óvart á sinn einstaka og ótrúlega máta.

Í dag, Pálmasunnudaginn 29. mars, verður hópurinn niðri í Mánagarði að ganga frá þessari gleði – stafla stólum, taka niður palla, gera upp snúrur, pakka saman leikmunum og leikmynd og þrífa. Eins og gert er eftir hverja einustu sýningatörn – í nafni samverunnar sem gerir þetta starf svo dásamlegt.

28/03/2026

Þá eru 3 klukkustundir og 18 mínútur þar til lokasýningin hefst. Örfá sæti laus.

Þið sem eigið eftir að sjá Gleðilega hátíð, hafið í mesta lagi 3 klukkustundir til að taka ákvörðun – hvort þið drífið ykkur ekki inn í Mánagarð í kvöld og upplifið geggjaða leikhúsupplifun.

Síðasti séns.

27/03/2026

Sýning 7 að baki…

Hláturinn var ótrúlegur! Við óttuðumst að gestir myndu andast úr hlátri og að leikhópurinn fengi á sig ákæru fyrir manndráp af gáleysi — en þetta slapp nú allt til.

Takk fyrir kvöldið, frábæru áhorfendur! Á morgun er lokasýningin og það eru ennþá sæti laus. Svo drífið ykkur og bókið miða!

27/03/2026

Yfir 400 manns eru þegar búnir að mæta og sjá sýninguna okkar Gleðilega hátíð!
Aðeins 2 sýningar eftir – í kvöld og annað kvöld kl. 20:00.

Endilega drífið ykkur að panta miða og njótið þessarar gleði sem sýningin býður upp á!

Lokasýningatörnin okkar er að byrja! Það er ekki hægt að bæta við fleiri sýningum þannig þetta er ykkar síðasti séns til þess að sjá sýninguna - jú eða koma aftur eins og nokkrir hafa nú þegar gert!
Áhorfendur eru sammála um að sýningin er drepfyndin og um að gera að leyfa sér aðeins að gleyma sér í leikhúsinu um helgina! Hafiði samband til að bóka miða og sjáumst í Mánagarði!!!