Bræðslan

23/04/2026

Bræðslan segir gleðilegt sumar með vinahátíðasamkomulagi við Hammond hátíð á Djúpavogi!
Bræðslan á sér vinahátíð í sveitarfélaginu Múlaþing, sem er hin frábæra Hammond hátíð sem hefst í dag í bongóblíðu á Djúpavogi.
Til að staðfesta vinskap og virðingu milli þessara systurhátiða stillu borgfirðingarnir Magni og Óli Björns sér upp saman með skilti sem fara munu upp á Borgarfirði og Djúpavogi í sumar.
Gleðilega Hammondhátíð!

20/04/2026

Enn hægt að komast á Bræðslu, en það þarf að hafa fyrir því!!!

Tanni Travel og Fjord Bikes í samstarfi við Bræðsluna kynna frábæra upphitun fyrir veisluna á Bræðsluhelginni: Hópaskipt göngu- og fjallahjólaferð um Víknaslóðir fyrir lengra komna. Harka og lúxus haldast í hendur þar sem hóparnir fara eigin leiðir um fjalladýrð Víknaslóða og hittast aftur í lok dags til að njóta vellystinga og skiptast á frásögnum.

Innifalið í ferðinni er skálagisting, trússflutningur, íburðarmiklir kvöld- og morgunverðir sem og heimkomuhressing frá einkakokki hópsins og miðar á bæði Föstudagsforleik í Já Sæll og auðvitað sjálfa Bræðsluna. Þessi ferð er tilvalin fyrir þá sem láta ekki deigan síga þegar kemur að útivist og sækjast í fjallgöngur eða fjallahjólreiðar í krefjandi aðstæðum.
Smellið hér til að skoða nánar og bóka: https://www.fjordbikes.com/studogpud

18/04/2026

Takk fyrir storkostlegar viðtökur!
Sjáumst í sumar.

17/04/2026

Kæru Bræðsluvinir

Við þökkum frábærar viðtökur við tilkynningum um dagskrá Bræðslunnar í sumar!

Nú er staðan sú að það eru nákvæmlega 100 miðar eftir á Bræðslutónleikana 25. júlí nk. Ef þú ætlar að koma þá endilega kláraðu dæmið sem fyrst, áður en það verður uppselt!
Miðasalan er á braedslan.is

Við eigum enn einn ás upp í erminni, við ætlum fljótlega að kynna sérstaka hátíðartónleika sem haldnir verða í Bræðsluhúsinu á föstudeginum 24. júlí. Sérstök miðasala á þá verður kynnt þegar þar að kemur.

Njótið helgarinnar 🥰😎

14/04/2026

Miðasalan er hafin á www.braedslan.is - Hlökkum til að sjá ykkur í sumar!

Bræðslan er tónlistarhátíð á Borgarfirði eystra, sem fyrst var haldin árið 2005, hún er framtak Borgfirðinga sem eru áhugasamir um tónlist og viðburði.

13/04/2026

Gott samstarf milli GULLKASTSINS á Kop.is og Bræðslunnar
Áskell Heiðar Bræðslustjóri fékk þann heiður að vera gestur þeirra félaga Einars, Magga og Steina í einu elsta og virtasta hlaðvarpi landsins í kvöld í Gullkastinu á Kop.is þar sem málefni knattspyrnuliðsins Liverpool eru rædd í þaula. Stuðningur Bræðslufjölskyldunnar við það góða lið er nánast óbrigðull, þó að faðir þeirra Bræðslubræðra sé þar á öðrum stað.
Það sem sameinar Bræðslu og Kop.is er líka það að GULL, án áfengis auðvitað, stendur á bak við bæði Bræðsluhátíðina og hlaðvarpið góða. Þeir félagar gátu því sameinast í góði GULLstund.
Þeir Kop félagar ætla að gefa hlustendum möguleika á að vinna miða á Bræðslu í smá leik, nánar um það á FB síðu þeirra.
Nú er bara að vona að Liverpool hrökkvi í gang og klári tímabilið einhverju öðru en skömm!
Smelltu hér til að hlusta á GULLKASTIÐ með Bræðsluívafi.

íslensk aðdáendasíða besta félags í heimi

13/04/2026

Kæru vinir - Hér er listafólkið sem ætlar að leika fyrir okkur í sumar!
Miðasalan hefst kl.10:00 í fyrramálið á www.braedslan.is

Sjáumst í sumar.
…..vonandi skemmtiði ykkur vel!

10/04/2026

Okkar kæru vinir á RÚV fóru fögrum orðum um Bræðsluna í frábærum og splunkunýjum þætti um dægurmenningu sem byrjaði á RÚV í gær. Við þökkum góð orð í okkar garð og hvetjum ykkur öll til að horfa á þáttinn í spilara RÚV.
Við munum svo láta ykkur formlega vita í byrjun næstu viku hvaða snillingar ætla að stíga á Bræðslusviðið í sumar og miðasala byrjar formlega þriðjudaginn 14. apríl kl. 10 á heimasíðu okkar, braedlan.is
https://www.ruv.is/sjonvarp/spila/midstodin/38642/bggj91

Í fyrsta þætti Miðstöðvarinnar heimsækjum við Friðrik Dór sem sýnir á sér nýja listræna hlið í fyrsta skipti opinberlega.Lovísa Rut, útvarpskona á Rás 2, og Sandra Barilli, framleiðandi og skemmtikraftur, kíkja í myndverið og fara yfir stærstu tónlistarviðburði ársins. ...

03/04/2026

Bestu kveðjur vestur!

Tónlistarhátíðarnar Aldrei fór ég suður og Bræðslan hafa binst vináttuböndum til að gera íslenskri tónlist sem hæst undir höfði. Aldrei fór ég suður hefst í kvöld á Ísafirði og verður í beinni útsendingu á RÚV 2.

24/03/2026

ALDREI OG BRÆÐSLAN GANGAST Í FÓSTBRÆÐRALAG

Tónlistarhátíðirnar Bræðslan á Borgarfirði eystra og Aldrei fór ég suður á Ísafirði gengust í eins konar fóstbræðralag á dögunum og hafa gert með sér svokallað „vinahátíðasamkomulag“.

Kristján Freyr rokkstjóri og Magni Bræðslustjóri hittust á eiginlegum leiðtogafundi og handsöluðu samninginn í Reykjavík, þar sem þeir voru staddir á sama tíma. Austrið og Vestrið hafa áður hizt við álíka aðstæður í Höfða og þótti það fullkominn staður til handsalsins.

Í samkomulaginu felst að hátíðirnar munu hjálpast að við að gera íslenskri tónlist sem hæst undir höfði, auka veg tónleikamenningar hér á landi og auka fagmennsku í skipulagi sínu. Hátíðirnar munu leitast við að jákvæð áhrif þeirra á nærumhverfi sitt verði sem mestar og leggja áherslu á að gestir skemmti sér fallega í sátt og samlyndi við íbúa annars vegar á Borgarfirði eystra og hins vegar á Ísafirði.

„Vinasamkomulagið mun efla samstarf tónlistarfólks beggja landshluta og skila sér í því að austfirskt tónlistarfólk heimsæki Aldrei fór ég suður og vestfirskt tónlistarfólk komi að sama skapi fram á Bræðslunni. Ef gestir vilja sækja báðar hátíðir þá fá allir pakkatilboð, greitt verði eingöngu fyrir aðra hátíðina“ segir Magni Ásgeirsson.

Starfsfólk Aldrei fór ég suður og Bræðslunnar er í skýjunum með hið nýja samkomulag sem festir annars gott vinasamband í gegnum tíðina. „Við þurfum meiri vináttu og kærleika á þessum víðsjárverðu tímum og kannski verður þetta vísir að frekari vinasambandi milli sveitarfélaganna. Talandi um vísa; í báðum bæjarstæðum verða reistir vegvísar, einn við Bræðslu sem vísar á Ísafjörð og annar við Aldrei-skemmuna sem vísar á Borgarfjörð eystra til að ramma þetta inn,“ segir Kristján Freyr.

Aldrei fór ég suður hátíðin fer fram núna um páskana, 3.- 4. apríl á Ísafirði en Bræðslan fer fram 25. júlí á Borgarfirði eystra.

10/11/2025

Hollvinasamtök Lindarbakka stofnuð - styrkur frá Bræðslunni!

Torfhúsið Lindarbakki á Borgarfirði eystra er einn helsti dýrgripur staðarins sem öllum íbúum og burtfluttum Borgfirðingum þykir vænt um. Eigandi hússins Elísabet Sveinsdóttir eða Stella á Lindarbakka afhenti Borgarfjarðarhreppi húsið til eignar árið 2019 og síðan hefur hreppurinn og nú Múlaþing séð um viðhald hússins. Stella lést á síðasta ári. Nú hefur hópur Borgfirðinga tekið sig saman og stofnað Hollvinasamtök Lindarbakka til að auðvelda velunnurum hússins að koma fjármagni til endurbóta og viðhalds á því. Samtökin voru stofnuð formlega sl. sumar og í samþykktum þeirra segir að starfsemi þeirra snúist um að safna fjármunum til endurbóta og viðhalds á húsinu með frjálsum framlögum. Fjármunum má einnig verja til viðburða við húsið, gæslu innanhúss þegar húsið er opið gestum og þá má einnig verja fjármunum samtakanna til fræðslu um húsið. Allar framkvæmdir við húsið verða auðvitað á forræði sveitarfélagsins og í samráði við Minjavernd og önnur yfirvöld minjavörslu.
Hollvinasamtök Lindarbakka eru á svonefndri almannaheillaskrá sem þýðir að þau sem styrkja félagið geta fengið skattaafslátt á móti styrknum.
Stella á Lindarbakka var mikill velunnari tónlistarhátíðarinnar Bræðslunnar og sem dæmi um það þá lánaði hún Emilíönu Torrini húsið til að gista í því eftir fyrstu Bræðslutónleikana sumarið 2005. Það er því viðeigandi að Bræðslan og Emilíana skyldu færa Hollvinasamtökum Lindarbakka hálfa milljón króna í styrk eftir 20 ára afmælistónleika Bræðslunnar sl. sumar.
Þau sem hafa áhuga á að styrkja Hollvinasamtök Lindarbakka og láta fé af hendi rakna til endurbóta og uppbyggingar Lindarbakka er bent á hlekk á heimasíðu Borgarfjarðar, borgarfjordureystri.is þar sem allar upplýsingar er að finna.
Meðfylgjandi mynd er frá formlegri stofnun Hollvinasamtaka Lindarbakka í júlí sl.