04/05/2026
Vinir okkar í The Puffin Run sýndu okkur það í ár að það má aldrei gefast upp þrátt fyrir mótlæti! Þau fengu að kynnast því í ár eftir hreint ótrúlega atburðarrás í samgöngumálum að það er ekkert sjálfgefið í þessu og það eina sem kemur okkur áfram er þrautseigjan og viljinn fyrir verkinu.
Svolítið svipað og hlauparara sem standa á ráslínunni í utanvegahlaupi. Það koma ýmsar hindrarnir upp á leiðinni en það sem skilar okkur í mark er viljinn 💪🏻
Til hamingju með flott hlaup og takk fyrir frábæra útsendingu með Snorra og Garp, frábært að geta fylgst með hinumegin á landinu.
The Puffin Run 2026 fór fram laugardaginn 2.maí í góðu veðri. Keppendur voru vel stemmdir og margir þeirra settu persónuleg met.
Andrea Kolbeinsdóttir sigraði í fimmta sinn í röð í kvennaflokki í The Puffin Run og sló eigið brautarmet. Hún bætti metið, sem hún átti frá 2023, um rúmar 6 mínútur og fór hringinn á 1:20:00. Magnaður árangur þessara frábæru íþróttakonu. Halldóra Huld Ingvarsdóttir var önnur á næstbesta tíma í níu ára sögu hlaupsins fór á 1:25:22 og Elísa Kristinsdóttir var þriðja á tímanum 01:27:03.
Arnar Pétursson kom fyrstur í mark í fjórða sinn og var nálægt því að slá brautarmet. Hann kom í mark á tímanum 1:15:10. Akureyringurinn Þorbergur Jónsson, sem var að taka þátt í fyrsta sinn, var annar á 01:16:30. Sigurjón Ernir Sturluson sem sigraði í hlaupinu 2020 mætti aftur til leiks og var þriðji á 1:20:20.
Þrátt fyrir erfiðleika í samgöngum milli lands og Vestmannaeyja tóku um 500 hlauparar þátt. Upphaflega höfðu um 1800 skráð sig, en vegna aðstæðna var keppendum boðið að færa skráningu sína til næsta árs sem flestir kusu að gera.
Við þökkum ykkur sem tókuð þátt og þeim fjölmörgu sem störfuðu við hlaupið. Þið voruð frábær🧡
📷 Erlingur Birgir Richardsson
