08/08/2026
امیر وکیل کی بیٹی سے 11 روپے کے کھانے تک، ’سی گریڈ‘ فلمیں، بولڈ امیج اور خفیہ شادی؛ ارچنا پورن سنگھ کی زندگی کے حیران کن پہلو
بھارتی فلم اور ٹیلی ویژن کی معروف اداکارہ ارچنا پورن سنگھ آج اپنی بے ساختہ ہنسی، زبردست کامیڈی ٹائمنگ اور کچھ کچھ ہوتا ہے کی مس بریگنزا جیسے کرداروں کے باعث جانی جاتی ہیں، لیکن ان کی ذاتی اور پیشہ ورانہ زندگی کئی ایسے نشیب و فراز سے گزری جن کا ذکر انہوں نے حالیہ برسوں میں خود کھل کر کیا ہے۔
ارچنا کا بچپن مالی طور پر خاصا آسودہ تھا۔ ان کے والد پورن سنگھ دہرادون کے معروف کریمنل وکیل تھے اور ارچنا کے مطابق وہ سنجے گاندھی کا مقدمہ بھی لڑ چکے تھے۔ اداکارہ نے بتایا کہ ان کا خاندان بنگلے میں رہتا تھا، ان کے والد کے پاس اس دور میں شیورلیٹ امپالا سمیت مہنگی گاڑیاں تھیں اور گھر کا ماحول خوشحال تھا۔
تاہم ممبئی پہنچ کر ارچنا کی زندگی یکسر بدل گئی۔ انہوں نے اپنے ایک وی لاگ میں یاد کیا کہ جدوجہد کے دنوں میں بعض اوقات کھانے کے لیے ان کے پاس صرف 11 روپے ہوتے تھے۔ وہ 10 روپے کا ڈوسا کھاتی تھیں اور باقی ایک روپیہ ٹِپ کے طور پر چھوڑ دیتی تھیں۔ خوشحال گھر میں پلنے والی لڑکی کے لیے یہ دور ان کی زندگی کا بالکل مختلف تجربہ تھا۔
فلموں میں ارچنا کو ان کے گلیمرس، بے باک اور مزاحیہ کرداروں نے الگ شناخت دی۔ ان کے پرانے رومانوی مناظر آج بھی سوشل میڈیا پر گردش کرتے رہتے ہیں، لیکن ان کے حوالے سے ایک دلچسپ حقیقت یہ ہے کہ فلم ’لڑائی‘ میں انوپم کھیر کے ساتھ ایک کِسنگ سین تجویز کیا گیا تو ارچنا گھبرا گئیں۔ انہوں نے بتایا کہ اس وقت تک انہوں نے کبھی آن اسکرین کِس نہیں کیا تھا اور وہ یہ منظر کرنے میں آرام دہ محسوس نہیں کر رہی تھیں، جس کے بعد اسے فلم سے نکال دیا گیا۔ انوپم کھیر نے بھی بتایا تھا کہ انہوں نے ہدایتکار سے سین ہٹانے کی درخواست کی تھی کیونکہ ارچنا اسے کرنے میں بے آرام تھیں۔
ارچنا نے اپنے کیریئر کے ایک مشکل دور کے بارے میں انتہائی صاف گوئی سے یہ بھی کہا کہ گھر چلانے کے لیے انہیں ایسی فلمیں بھی قبول کرنا پڑیں جنہیں وہ خود ’C-grade‘ اور ’cheap films‘ کہتی ہیں۔ اس وقت ان کے شوہر پرمیت سیٹھی اپنے کیریئر میں جدوجہد کر رہے تھے اور بہتر کردار کا انتظار کرنا چاہتے تھے، جبکہ ارچنا گھر کی بڑی مالی ذمہ داری اٹھا رہی تھیں۔ انہوں نے اعتراف کیا کہ اس صورتحال نے ایک مرحلے پر ان کے دل میں ناراضی بھی پیدا کی۔
ارچنا کی ازدواجی زندگی بھی ابتدا سے روایتی نہیں رہی۔ ان کی پہلی شادی ماڈل گروندر سنگھ سے ہوئی تھی جو طلاق پر ختم ہوگئی۔ اس ناکام تجربے کے بعد ارچنا نے دوبارہ شادی نہ کرنے کا ارادہ کرلیا تھا، لیکن بعد میں ان کی ملاقات اداکار پرمیت سیٹھی سے ہوئی اور دونوں قریب آگئے۔
ارچنا اور پرمیت نے شادی سے پہلے تقریباً چار برس ایک ساتھ رہ کر ایک دوسرے کو سمجھا اور پھر 1992 میں خفیہ طور پر شادی کرلی۔ پرمیت کے والدین ابتدا میں اس رشتے کے حق میں نہیں تھے، جبکہ اس زمانے میں بالی ووڈ میں یہ تصور بھی عام تھا کہ شادی شدہ ہیروئن کو مرکزی کردار ملنا کم ہوجاتے ہیں۔ اسی خوف کے باعث دونوں نے اپنی شادی تقریباً چار سال تک دوستوں اور فلمی دنیا سے بھی چھپائے رکھی۔
ارچنا نے حالیہ گفتگو میں اس سوچ کو بالی ووڈ کا ایک غیر منصفانہ اور فرسودہ رجحان قرار دیا۔ ان کے مطابق اس دور میں صرف شادی ہی نہیں بلکہ کسی اداکارہ کے سنجیدہ تعلق میں ہونے کی خبر بھی اس کے کام پر اثر انداز ہوسکتی تھی، جبکہ مرد اداکاروں کے لیے ایسے پیمانے نہیں تھے۔
دونوں کی شادی میں مشکل دور بھی آئے۔ پرمیت اعتراف کر چکے ہیں کہ ایک مرحلے پر ان کے درمیان مسلسل جھگڑے ہوتے تھے، جبکہ ارچنا اور پرمیت اب کھل کر بتاتے ہیں کہ ان کا رشتہ بھی دیگر شادیوں کی طرح اختلافات، انا اور مالی دباؤ سے گزرا، مگر دونوں نے اسے برقرار رکھنے کی کوشش کی۔
دلچسپ طور پر 2026 میں ارچنا نے یہ بھی بتایا کہ وہ اور پرمیت تقریباً سات برس سے الگ بستروں پر سوتے ہیں، جسے انہوں نے مذاقاً ’sleep divorce‘ کا نام دیا، تاہم اس کی وجہ ازدواجی علیحدگی نہیں بلکہ پرمیت کے خراٹوں اور ارچنا کی ہلکی نیند کو بتایا گیا۔ دونوں نے واضح کیا کہ ان کا رشتہ بدستور قائم ہے۔
یوں ایک خوشحال وکیل کے گھر میں پرورش پانے والی لڑکی سے ممبئی میں 11 روپے کے کھانے پر گزارا کرنے، گلیمرس فلمی کرداروں، اپنی زبان میں ’سی گریڈ‘ فلمیں کرنے، پہلی ناکام شادی اور پھر چار سال تک دوسری شادی چھپانے تک ارچنا پورن سنگھ کی زندگی اسکرین پر دکھائی دینے والی ان کی قہقہوں بھری شخصیت سے کہیں زیادہ اتار چڑھاؤ سے بھرپور رہی ہے۔
