14/06/2026
ایک زمین
حفیظؔ میرٹھی
سرفراز بزمیؔ
۔۔۔۔۔
حفیظؔ
ہر سُکُوں کی تہ میں سَو آتِش فِشاں رَکھتا ہُوں مَیں
ضَبط کا اِک رُخ نُمایاں، اِک نہاں رَکھتا ہُوں مَیں
اَے پرستارانِ نَغمَہ! چھوڑ کَر تارِ رُباب
آج کُچھ دُکھتی رَگوں پر اُنگلِیاں رَکھتا ہُوں مَیں
ہائے رے نَیرَنگیاں، ہُوں تَو چراغ اَب بھی مَگَر
روشنی رَکھتا تھا پہلے اَب دُھواں رَکھتا ہُوں مَیں
آج تَک گُزری اَجل کی آرزُو میں زِندَگی
زِندَگی سے آج بھی دِلچَسپِیاں رَکھتا ہُوں مَیں
مُجھ سے کَب ہوتی بَھلا پابندئ رَسمِ وُجُود
اُنکی دِلداری کی خاطِر جِسم و جاں رَکھتا ہُوں یں
ہیچ ہیں میری نَظَر میں آشِیاں و گُلستاں
آدمی ہُوں عَزمِ تَعمِیرِ جہاں رَکھتا ہُوں مَیں
اَب بھی وہ اَپنا سَمَجھ کَر مُجھ کو اَپنا لیں حفیظؔ
کون جانے وَرنہ پِھر یہ سَر کہاں رَکھتا ہُوں مَیں۔۔۔!
۔۔۔۔۔
بزمیؔ
پَیکَرِ گِل ہُوں شعُورِ کُن فَکاں رَکھتا ہُوں مَیں
"آدمی ہُوں عَزمِ تَعمِیرِ جہاں رَکھتا ہُوں مَیں"
باندھ کر اَپنے پروں کو شَہپَرِ جِبرِیل سے
کَیا زَمِیں، پَیروں تَلے ہر آسماں رَکھتا ہُوں مَیں
کَیا کِسی آزَر کی آنکھوں میں کَھٹَکتا خار ہُوں
ہر قَدم آتِشکَدوں کے اِمتِحاں رَکھتا ہُوں مَیں
ظُلمَت شب سے کلیم طور گھبراتا نہیں
نُورِ سِینا اَپنے سِینے میں نِہاں رَکھتا ہُوں مَیں
رات آئی، مَشعَلِ مِہرِ دَرخشاں بُجھ گئی
اَنجُمِ کَم ضَو کو، اَپنا رازداں رَکھتا ہُوں مَیں
ساغَرِ شعر و سُخَن میں بھر کے صَہبائے حِجاز
بادَہ گَردانِ عَجَم کے دَرمیاں رَکھتا ہُوں مَیں
ہیں خَفا اِس بات پر مُجھ سے اَندھیروں کے اِمام
ہاتھ پر اِک شمع، کیوں ہردَم جواں رَکھتا ہُوں مَیں
گھر سے نِکلا ہُوں، کرینگی مَنزِلیں میرا طواف
راستو! ماں کی دُعا کا سائباں رَکھتا ہُوں مَیں
ہُوں شَرِیکِ بَزم لیکِن گَرمئ مَحفِل سے دُور
بُتکَدوں میں ہُوں مَگَر لَب پر اَذاں رَکھتا ہُوں مَیں
ہائے! اُس عیسیٰ نَفَس کی چَشمِ حیراں کا خُمار
واسطہ بزمیؔ کِسی سے اَب کہاں رَکھتا ہُوں مَیں۔۔۔!
Sarfaraz Bazmi
