16/10/2026
சென்னையில் ரூ.1.49 லட்சத்தில் ஆட்டோ வாங்கி தமிழகம், கேரளாவைச் சுற்றும் இங்கிலாந்து தம்பதி:
ராமேஸ்வரம் அக் 16,
சென்னையில் ரூ.1.49 லட்சத்தில் ஆட்டோ வாங்கி தமிழகம், கேரளாவைச் சுற்றி வரும் இங்கிலாந்து தம்பதியினர் தஞ்சைப் பெரிய கோயிலைக் கண்டு வியப்படைந்ததுடன், ராமர் பாலத்தைப் பார்வையிட ராமேஸ்வரம் வந்ததாக தெரிவித்தனர். தமிழக முதல்வர் விஜய்யின் பிரபலமான கை அசைக்கும் பாணி மிகவும் பிடித்திருப்பதால் தமிழகத்தில் உள்ள முக்கிய இடங்களில் பொதுமக்களுடன் செல்பி எடுக்கும் போது முதல்வரின் செய்கையை செய்து அனைவரது கவனத்தையும் ஈர்த்து வருகின்றனர்.
தமிழகத்தின் கலை, கலாச்சாரம், பண்பாடு மற்றும் வரலாற்றுச் சிறப்புகளை நேரில் அறிந்துகொள்ளும் நோக்கில், இங்கிலாந்தைச் சேர்ந்த மாரியஸ் (36) , ஒலிவியா (33) தம்பதியினர் சென்னை வந்துள்ளனர்
இங்கிலாந்தைச் சேர்ந்த இத்தம்பதியினர், தமிழகத்தின் பாரம்பரியம், கோயில் கட்டிடக்கலை, உள்ளூர் மக்களின் வாழ்க்கை முறை மற்றும் கலாச்சாரத்தை நேரில் அறிந்துகொள்ளும் ஆர்வத்துடன் கடந்த 8-ஆம் தேதி விமானம் மூலம் சென்னை வந்தனர்.
சென்னையில் ரூ.1 லட்சத்து 49 ஆயிரம் செலவில் ஆட்டோ ரிக்ஷா ஒன்றை வாங்கிய அவர்கள், அதிலேயே தங்களது சுற்றுப்பயணத்தைத் தொடங்கினர்.
சென்னையில் இருந்து மகாபலிபுரம், புதுச்சேரி, தஞ்சாவூர் உள்ளிட்ட பகுதிகளுக்குச் சென்ற அவர்கள், அங்குள்ள சுற்றுலாத் தலங்கள் மற்றும் வரலாற்றுச் சிறப்புமிக்க இடங்களைப் பார்வையிட்டனர்.
குறிப்பாக, தஞ்சாவூரில் உள்ள உலகப் புகழ்பெற்ற பெரிய கோயிலின் பிரம்மாண்டமான கட்டுமானம், நுணுக்கமான சிற்ப வேலைப்பாடுகள் மற்றும் தமிழர்களின் பாரம்பரியக் கட்டிடக்கலை ஆகியவற்றைக் கண்டு வியந்தனர். பல நூற்றாண்டுகளுக்கு முன்பே தமிழர்கள் இத்தகைய அற்புதமான கட்டிடக்கலைத் திறனைப் பெற்றிருந்தது தங்களுக்கு வியப்பளிப்பதாகத் தெரிவித்தனர்.
அதனை தொடர்ந்து ராமேஸ்வரம் வந்துள்ள இத்தம்பதியினர், இந்தியாவுக்கும் இலங்கைக்கும் இடையே அமைந்துள்ள கடல் பகுதியையும், ராமர் பாலம் எனப் பரவலாக அழைக்கப்படும் ஆதாம் பாலம் தொடர்பான பகுதிகளையும் பார்வையிட்டனர்.
ராமேஸ்வரத்தின் புவியியல் அமைப்பு, கடலின் இயற்கை அழகு மற்றும் ராமர் பாலம் தொடர்பான வரலாற்று, ஆன்மிகப் பின்னணிகளை அறிந்துகொள்வதற்காக இங்கு வந்துள்ளதாகத் இங்கிலாந்து தம்பதியினர் தெரிவித்தனர்.
ராமேஸ்வரத்தில் சுற்றுப்பயணத்தை முடித்துக்கொண்ட பின்னர், கன்னியாகுமரி வழியாக கேரள மாநிலத்திற்குச் சென்று அங்குள்ள சுற்றுலாத் தலங்கள், இயற்கை வளங்கள் மற்றும் மக்களின் வாழ்க்கை முறைகளையும் அறிந்துகொள்ளத் திட்டமிட்டுள்ளனர்.
தமிழகத்தின் அரசியல் மற்றும் பொதுவாழ்க்கை நிகழ்வுகளிலும் ஆர்வம் கொண்டுள்ள இத்தம்பதியினர்,தமிழக முதல்வர் விஜய்யின் இந்தத் தனித்துவமான பாணி தங்களைக் கவர்ந்துள்ளதாகவும், தமிழகத்தில் அவருக்கு இருக்கும் அறிமுகம் மற்றும் மக்கள் மத்தியில் அவரைப் பற்றிய ஆர்வம் குறித்துத் தெரிந்துகொள்வதுடன் முதல்வர் கையால் செய்யும் தனித்துவமான சைகை தங்களை ஈர்த்து இருப்பதாக இத்தம்பதியினர் தெரிவித்தனர்.
தமிழகத்தின் பல்வேறு முக்கிய இடங்களுக்குச் சுற்றுப்பயணம் மேற்கொள்ளும் இவர்கள், அங்கு தங்களுடன் செல்ஃபி எடுத்துக்கொள்ள வரும் பொதுமக்களுடன் மகிழ்ச்சியாகப் புகைப்படம் எடுத்துக்கொள்கின்றனர். அப்போது, முதல்வர் விஜய் பொதுமக்களை நோக்கிக் கை அசைக்கும் பாணியைப் பின்பற்றி அவர்களுடன் கைகளை அசைத்தும் புகைப்படங்களுக்கு போஸ் கொடுத்தும் மகிழ்கின்றனர். இதனால், அவர்களுடன் புகைப்படம் எடுத்துக்கொள்ளும் பொதுமக்களுக்கும் இந்தச் சந்திப்பு மகிழ்ச்சியான அனுபவமாக அமைந்துள்ளது.
மாரியஸ், ஒலிவியா தம்பதியினர் இணைந்து “Travels on Toast” என்ற யூடியூப் சேனல் ஒன்றையும் நடத்தி வருகின்றனர். தாங்கள் செல்லும் இடங்களின் சிறப்புகள், அங்குள்ள மக்களின் வாழ்வியல், பாரம்பரியக் கலைகள், கலாச்சாரம் மற்றும் சுற்றுலா அனுபவங்களைப் பதிவு செய்து வருகின்றனர். இதன் மூலம் இந்தியாவின் பல்வேறு பகுதிகளின் தனித்துவங்களை உலகம் முழுவதும் உள்ள பார்வையாளர்களுடன் பகிர்ந்துகொண்டு வருகின்றனர்.
ஆட்டோவில் பயணம் செய்வது தங்களுக்கு வசதியாக இருப்பதாகவும், செல்லும் வழியில் பல்வேறு இடங்களை அருகிலிருந்து ரசித்துப் பார்க்கவும், உள்ளூர் மக்களுடன் உரையாடி அவர்களின் வாழ்க்கை முறைகளை அறிந்துகொள்ளவும் முடிவதாகவும் தெரிவித்தனர்.
தமிழகத்தின் கோயில்கள், கடற்கரைப் பகுதிகள், வரலாற்றுச் சிறப்புமிக்க இடங்கள் மற்றும் மக்களின் கலாச்சாரத்தை நேரில் அனுபவித்துவரும் இத்தம்பதியினர், கேரள மாநிலத்தையும் சுற்றிப்பார்த்த பின்னர் இங்கிலாந்து திரும்பத் திட்டமிட்டுள்ளனர்.
பொதுவாக சுற்றுலாப் பயணிகள் கார் அல்லது சுற்றுலா வாகனங்களில் பயணம் செய்யும் நிலையில், வெளிநாட்டிலிருந்து இந்தியாவிற்கு வந்து, ஆட்டோ ரிக்ஷாவிலேயே பயணம் செய்து மக்களின் வாழ்வியல், கலாச்சாரம் மற்றும் உள்ளூர் சிறப்புகளை அறிந்துகொள்ளும் இவர்களின் முயற்சி, சுற்றுலா ஆர்வலர்களின் கவனத்தை ஈர்த்துள்ளது.
