24/06/2026
Tweet 1470
ഇബ്നു അസാകിർ(റ) തന്റെ ചരിത്രഗ്രന്ഥത്തിൽ അലാഅ് ബിൻ സിയാദ് അൽ അദവി(റ)ൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞതായി എനിക്ക് നിവേദനം ചെയ്യപ്പെട്ടു. തങ്ങളെല്ലാം പ്രവാചകന്മാരാണെന്ന് വാദിക്കുന്ന മുപ്പത് വ്യാജന്മാരായ ദജ്ജാലുകൾ പുറപ്പെടുന്നത് വരെ അന്ത്യനാൾ സംഭവിക്കുകയില്ല.
അബൂ നുഐം(റ) ജാബിർ ബിൻ സമുറ(റ)യിൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു: "മുപ്പത് വ്യാജന്മാർ പുറപ്പെടുന്നത് വരെ അന്ത്യനാൾ സംഭവിക്കുകയില്ല, അവരിൽ അവസാനത്തെയാൾ മസീഹ് ദജ്ജാൽ ആണ്."
ഇബ്നു അബീ ശൈബ(റ)യും, ഇബ്നു അദിയ്യ്(റ) 'അൽ-കാമിലി'ലും ദുർബലമായ ഒരു പരമ്പരയിലൂടെ അബ്ദുല്ലാഹ് ബിൻ സുബൈറി(റ)ൽ നിന്ന് നിവേദനം ചെയ്യുന്നു; തിരുനബിﷺ അരുളി: "മുപ്പത് വ്യാജന്മാർ പുറപ്പെടുന്നത് വരെ അന്ത്യനാൾ സംഭവിക്കുകയില്ല. അവരിൽ പെട്ടവരാണ് മുസൈലിമയും അൻസിയും. അറബ് ഗോത്രങ്ങളിൽ ഏറ്റവും മോശമായവർ ബനൂ ഉമയ്യയും, ബനൂ ഹനീഫയും, സഖീഫുമാണ്."
ഇമാം അഹ്മദും(റ), ബുഖാരി(റ)യും മുസ്ലിമും(റ), അബൂദാവൂദും(റ), തിർമിദി(റ)യും അബൂഹുറൈറ(റ)യിൽ നിന്ന് നിവേദനം ചെയ്യുന്നു; തിരുനബിﷺ അരുളി: "രണ്ട് വലിയ വിഭാഗങ്ങൾ തമ്മിൽ യുദ്ധം ചെയ്യുകയും അവർക്കിടയിൽ വലിയ കൊലപാതകം നടക്കുകയും ചെയ്യുന്നത് വരെ അന്ത്യനാൾ സംഭവിക്കുകയില്ല; ഇരുവിഭാഗത്തിന്റെയും വാദം ഒന്നായിരിക്കും. തങ്ങളെല്ലാം അല്ലാഹുവിന്റെ ദൂതന്മാരാണെന്ന് വാദിക്കുന്ന മുപ്പതോളം വ്യാജന്മാരായ ദജ്ജാലുകൾ പുറപ്പെടുന്നത് വരെയും അന്ത്യനാൾ സംഭവിക്കുകയില്ല."
തിർമിദി(റ), അൽ-ഹാകിം(റ) എന്നിവർ സൗബാനി(റ)ൽ നിന്ന് നിവേദനം ചെയ്യുന്നു; തിരുനബിﷺ അരുളി: "എന്റെ ഉമ്മത്തിലെ ചില ഗോത്രങ്ങൾ ബഹുദൈവാരാധകരോട് ചേരുകയും, അവർ വിഗ്രഹങ്ങളെ ആരാധിക്കുകയും ചെയ്യുന്നത് വരെ അന്ത്യനാൾ സംഭവിക്കുകയില്ല. തീർച്ചയായും എന്റെ ഉമ്മത്തിൽ മുപ്പത് വ്യാജന്മാർ ഉണ്ടാകും, അവരെല്ലാം പ്രവാചകന്മാരാണെന്ന് വാദിക്കും. എന്നാൽ ഞാൻ പ്രവാചകന്മാരിൽ അവസാനത്തെയാളാണ്, എനിക്ക് ശേഷം യാതൊരു പ്രവാചകനുമില്ല."
ത്വബറാനി(റ) 'അൽ-കബീറി'ൽ അബ്ദുല്ലാ ബിൻ അംറ്(റ)ൽ നിന്ന് നിവേദനം ചെയ്യുന്നു; തിരുനബിﷺ പറഞ്ഞു. "എഴുപത് വ്യാജന്മാർ പുറപ്പെടുന്നത് വരെ അന്ത്യനാൾ സംഭവിക്കുകയില്ല."
ഇമാം മുസ്ലിം(റ) അബൂഹുറൈറ(റ) വിൽ നിന്ന് നിവേദനം ചെയ്യുന്നു, തീർച്ചയായും തിരുനബിﷺ പറഞ്ഞു. "എന്റെ ഉമ്മത്തിന്റെ അവസാന കാലത്ത് നിങ്ങളോ നിങ്ങളുടെ പിതാക്കന്മാരോ കേട്ടിട്ടില്ലാത്ത കാര്യങ്ങൾ നിങ്ങളോട് സംസാരിക്കുന്ന ചില ആളുകൾ ഉണ്ടാകും. അതിനാൽ നിങ്ങൾ അവരെ സൂക്ഷിക്കുക, അവർ നിങ്ങളെയും സൂക്ഷിക്കട്ടെ."
ഇബ്നു അദിയ്യും(റ) ബൈഹഖി(റ)യും വാസിലത്ത് ബിൻ അൽ-അസ്ഖഅ്(റ)വിൽ നിന്ന് നിവേദനം ചെയ്യുന്നു, അല്ലാഹുവിന്റെ തിരുനബിﷺ പറഞ്ഞു: "ഇബ്ലീസ് അങ്ങാടികളിലൂടെ നടന്ന് 'ഇന്ന ആളുടെ മകൻ ഇന്ന ആൾ എന്നോട് ഇന്നയിന്ന കാര്യങ്ങൾ സംസാരിച്ചു' എന്ന് വ്യാജമായി പറയുന്നതുവരെ അന്ത്യനാൾ സംഭവിക്കുകയില്ല."
اَللّٰهُمَّ صَلِّ عَلَى سَيِّدِنٰا مُحَمَّدٍ وَعَلَى آلِهِ وَصَحْبِهِ وَسَلِّمْ
(തുടരും)
ഡോ.മുഹമ്മദ് ഫാറൂഖ് നഈമി അൽ ബുഖാരി
