02/11/2025
कालची १ नोव्हेंबर ही कार्तिकी एकादशीच्या पूर्वसंध्येची संध्याकाळ ज्या दर्दी रसिकांनी पार्ल्याच्या दीनानाथ नाट्यगृहात अनुभवली त्यांनाच त्याची गोडी समजेल कारण कार्यक्रमाविषयी लिहून फक्त शब्द आणि फारतर फोटो किंवा व्हिडीओज पोहोचवता येतात, प्रत्यक्ष अनुभूति कधीच पोहोचू शकत नाही. पार्ल्याची आरोह आर्ट्स ही संस्था आणि अत्यंत प्रतिष्ठित अशा 'जयसत्य इव्हेंट्स' यांच्या संयुक्त विद्यमाने 'गजर माउलीचा' - विठ्ठल संगीतकारांच्या नजरेतून हा एक अत्यंत आगळ्या संकल्पनेवर आधारित कार्यक्रम १ नोव्हेंबर रोजी अत्यंत उत्साहात, अतिशय दर्दी रसिकांच्या साक्षीने आणि विठ्ठलाच्या 'स्वरभक्तीने' पार पडला. मराठीतील विविध प्रतिभासंपन्न संगीतकारांनी या विठ्ठलाकडे, संतांच्या त्या शब्दांकडे कुठल्या नजरेने पाहिले, त्या प्रत्येक संगीतकाराला विठ्ठल कसा भावला या संकल्पनेचा संक्षिप्त धांडोळा घ्यायचा हा प्रामाणिक प्रयत्न होता. आषाढी-कार्तिकीला होणारे ठरीव अभंग आणि गजराचे कार्यक्रम या साच्यातून बाहेर पडून काहीसा वेगळा प्रयोग करण्याचा आमचा हा अल्पमति प्रयत्न होता. स्वरांगी मराठे, संपदा माने, मयूर सुकाळे, चैतन्य परब आणि आमोद दातार या सर्वच गायकांनी अत्यंत समरसून विठ्ठलाचे हे निवडक अभंग प्रस्तुत केले. संवादिनीवादक निरंजन लेले, तबल्यावर अमेय ठाकूरदेसाई, पखवाज वर हनुमंत रावडे, इतर तालवाद्यांवर राजीव राणे, कीबोर्ड वर झंकार कानडे तर बासरीवर विजय तांबे या सर्व वादक कलाकारांनी बहार आणली. विठ्ठल-संगीतकारांच्या नजरेतून या संकल्पनेला पुरेपूर न्याय देत विघ्नेश जोशी आणि केशव परांजपे यांनी निवेदनाची बाजू अत्यंत समर्थपणे हाताळली. सर्वात महत्त्वाची गोष्ट म्हणजे 'गजर माउलीचा' हा वेगळा संकल्पनात्मक कार्यक्रम चोखंदळ पार्लेकर रसिकांच्या पसंतीस उतरला आणि अनेकानेक लोकांनी प्रत्यक्ष भेटून, मेसेज पाठवून, कॉल करून एका सुरेख कार्यक्रमाचा अनुभव दिल्याबद्दल आरोह आर्ट्स आणि जयसत्य इव्हेंट्स यांचे भरभरून कौतुक केले. दर्दी रसिकांची अशी दादच आम्हांला असेच नवनवीन संकल्पनांवर आधारित कार्यक्रम करण्याची प्रेरणा देते हे निश्चित!
आमचे सर्व कलाकार, वादक, निवेदक, प्रायोजक, रसिक प्रेक्षक या सर्वांचे मनःपूर्वक आभार आणि धन्यवाद !
