29/09/2025
*ಎರಿಕ್ ಬಾಬಾವೀಣ್*
*ಕೊಂಕ್ಣಿ ಆನಿ ಕಲಾಂಗಣ್*
_(ಎರಿಕ್ ಬಾಬಾಚೊ ಮ್ಹಯ್ನ್ಯಾಚೊ ಉಗ್ಡಾಸ್)_
ಆಜಿಕ್ (29.09.25) ಭರ್ತಿ ಏಕ್ ಮ್ಹಯ್ನೊ ಜಾತಾ ಎರಿಕ್ ಬಾಬ್ ಹೊ ಸಂಸಾರ್ ಸಾಂಡುನ್. ತಾಚೆವಿಣೆಂ ಉಬ್ಜಾಲ್ಲೆಂ ನಿರ್ವಾತ್ ಆಜೂನ್ ಕೊಂಕ್ಣಿ ಸಂಸಾರಾಂತ್ ಆನಿ ಕಲಾಂಗಣಾಂತ್ ಧೊಸುನ್ ಆಸಾ.
ಆಗೋಸ್ತಾಚ್ಯೆ ತೀನ್ ತಾರಿಕೆರ್ ಕಲಾಂಗಣಾಂತ್ ಚಲ್ಲಲ್ಯಾ ರೊನಿ ಕ್ರಾಸ್ತಾಚ್ಯಾ 'ಕವಿತಾ ಫುಲೊತಾ' ಮಾಂಚಿಯೆರ್ ಆಪ್ಣಾಕ್ ಗಾಂವ್ಕ್ ಜಾಯ್ ಮ್ಹಣ್ 'ಮಾಂಯ್ಗೇ ಮ್ಹಜ್ಯೆ ಕೊಂಕಣಿ' ಪದ್ ತಾಣೆಂ ಜೊಯ್ಸ್ ಬಾಯ್ ಆನಿ ಆಲನಿ ಸವೆಂ ಗಾಯಿಲ್ಲೆಂ. ರಿಹರ್ಸಲಾ ದಿಸಾ ವಿಲ್ಸನ್ ಕಯ್ಯಾರಾನ್ ಸೊಡಯಿಲ್ಲೆಂ ಪಿಂತುರ್ ವೆದಿಕ್ ಹಾಡುಂಕ್ ನಾ ಮ್ಹಣ್ ಹಾಚೊ ಗಲಾಟೊಚ್ ಗಲಾಟೊ. ಆಮಿ ಕೊಂಕ್ಣಿ ಮಾಂಯ್ಲಾಗಿಂ ವಿನತಿ ಕರ್ಚಿ. ದೆಕುನ್ ಜಾಯ್ಜೆ ಮ್ಹಣ್ ಹಾಡಯ್ಲೆಂ. ಕಾರ್ಯಾ ದಿಸಾ ಆವಯ್ ಮುಖಾರ್ ಗಾಂವ್ಚ್ಯಾ , ವಿನತಿ ಕರ್ಚ್ಯಾ ಬಾಳಾ ಜಶೆಂ ಎರಿಕ್ ಬಾಬ್ ದಿಸ್ಲೊ. ಹೆಂ ಮ್ಹಜೆ ಖಾತಿರ್ ಬರಯಿಲ್ಲೆಂ ಪದ್, ನಿಮಾಣೆಂ ಪಾವ್ಟಿಂ ಗಾಂವ್ಚೆಂ ಮ್ಹಳ್ಳ್ಯಾ ಅರ್ಥಾರ್ ಆನಿ ಖಚಿತಾಯೆನ್ ಎರಿಕ್ ಬಾಬ್ ಉಲಯಿಲ್ಲೊ.
ಆಗೋಸ್ತ್ ಇಕ್ರಾ ತಾರಿಕೆರ್ ತೊ ಆಸ್ಪತ್ರೆಂತ್ ಎಡ್ಮಿಟ್ ಜಾಲೊ. ದೋನ್ ದೀಸ್ ಜಾಯ್ಜೆ ತರ್, ಹಾಂವ್ ಆಸ್ಪತ್ರೆಂತ್ ಆಸಾಂ ಮ್ಹಣ್ ಖಬರ್ ಆಸಾಮೂ? ಮ್ಹಣ್ ಜ್ಯೋರ್ ಕರ್ನ್ ಮೆಸೆಜ್. ಲೊಕಾಂ ಮಧೆಂ ಭರ್ಸುನ್ ಆಸ್ಲಲೊ, ಆತಾಂ ಆಸ್ಪತ್ರೆಚ್ಯಾ ಕುಡಾಂತ್ ಎಕ್ಸುರ್ಪಣ್ ಭೊಗ್ತಾಲೊ ಕೊಣ್ಣಾ! ಮಾಂಡ್ ಸೊಭಾಣ್ ಸಮಿತಿ ಸಾಂದ್ಯಾಂಕ್ ಕಳಯ್ತಚ್ ವೆಳಾ ಪರ್ಮಾಣೆಂ ಥೊಡೆ ಜಣ್ ವಚುನ್ ಮೆಳುನ್ ಆಯ್ಲೆ. ಥಂಯ್ ಥಾವ್ನ್ಯಿ ಕೊಂಕ್ಣಿ ಮಾನ್ಯತಾ ದಿಸಾಚಿ ಖಬರ್ ಕಾಡ್ಲಿ. ಏಕ್ ಪಾವ್ಟಿಂ ಐಸಿಯುಕ್ ವಚುನ್ ಪಾಟಿಂ ವಾರ್ಡಾಕ್ ಆಯ್ಲೊ. ಧುವ್ ರಶ್ಮಿಲಾಗಿಂ ಮುರು ಮಾಸ್ಳಿ ಫ್ರೈ, ಇಂದಾದ್ ಆನಿ ಪೇಜ್ ಜಾಯ್ ಮ್ಹಣ್ ಸಾಂಗ್ಲಲೆಂ ಖಂಯ್. ಬರ್ಯಾಂತ್ಲಿ ಬರಿ ಚಿಕಿತ್ಸಾ ದೀವ್ನ್ ಆಸಾಂವ್ ಮ್ಹಣ್ ದಾಕ್ತೆರಾಂನಿ ಕಳಯಿಲ್ಲೆಂ ತರೀ, ಪರತ್ ಐಸಿಯುಕ್ ಗೆಲ್ಲೊ ಜಿವಂತ್ ಪಾಟಿಂ ಆಯ್ಲೊ ನಾ. ಎರಿಕ್ ಬಾಬ್ ನಿಮಾಣ್ಯಾ ಘಡಿಯೆ ಪರ್ಯಾಂತ್ಯಿ ಕುಡಿಂತ್ ಅಸ್ಕತ್ ಜಾಲ್ಲೊ ತರೀ, ಮತಿಂತ್ ಘಟ್ ಆಸ್ಲಲೊ ಮ್ಹಣ್ ದಾಕ್ತೆರಾಂನಿ ಕುಟ್ಮಾದಾರಾಂಕ್ ಸಾಂಗ್ಲಲೆಂ ಆಸಾ. ಪೂಣ್ ತೊ ಮರ್ಚೆ ಆದಿಂ, ದಾಕ್ತೆರಾನ್ ತೊ ಸರ್ಲಾ ಮ್ಹಣ್ ಘೋಷಿತ್ ಕರ್ಚೆ ಆದಿಂ ಕೊಣೆಂ ತರೀ ತಾಚ್ಯಾ ʻಮೊಗಾಚ್ಯಾಂನಿʼ ರಾತ್ಚ್ಯಾ ಮಧ್ಯಾನೆರ್ ತಾಕಾ ಮಾರ್ಲೊ ಆನಿ ಸಂಸಾರಾಚಿ ನೀದ್ ಖದ್ವಳಾಯ್ಲಿ. ಹೆಂ ವಿಪರ್ಯಾಸ್ಯಿ ಘಡುನ್ ಆಯ್ಲೆಂ.
ಎರಿಕ್ ಬಾಬಾಚೊ ಸರ್ವ್ ವಿವರ್ ಮ್ಹಜ್ಯಾ ಕಂಪ್ಯೂಟರಾಂತ್ ಆಸ್ಲಲೊ ಹಾಂವೆಂ ಆನಿ ವಿಕಾಸಾನ್ ಮೆಳುನ್ ಘಡಿಯೆನ್ ನ್ಯೂಸ್ ರೆಡಿ ಕೆಲೊ ಆನಿ ಮಾಧ್ಯಮಾಂಕ್ ಧಾಡುನ್ ದಿಲೊ. ಲೊಕಾಕ್ ಅಧಿಕೃತ್ ಖಬರ್ ಪಾವಯ್ಲಿ. ಸಾಮಾಜಿಕ್ ಮಾಧ್ಯಮಾಂನಿ ಎರಿಕ್ ಬಾಬ್ಚ್ ದಿಸ್ಲೊ. ಎರಿಕ್ ಬಾಬಾಚೆ ಆದ್ಲೆ ವಿಡಿಯೊ, ಫೊಟೊ ಭಾಯ್ರ್ ಆಯ್ಲೆ. ತಾಚೆಸವೆಂ ಆಪಾಪ್ಲೆ ಉಗ್ಡಾಸ್ ಅಭಿಮಾನಿಂನಿ ಜಿವಾಳಾಯ್ಲೆ. ತೊ ಜೀವ್ ಆಸ್ತಾನಾ ತಾಕಾ ಆನಿ ತಾಚ್ಯಾ ವಾವ್ರಾಕ್ ನೆಗಾರ್ಲೆಲೆಯ್ ಫುಗಾರುಂಕ್ ಲಾಗ್ಲೆ. ʻಶರಣರ ಗುಣ ಮರಣದಲ್ಲಿ ಕಾಣುʼ ಮ್ಹಳ್ಳ್ಯಾ ಸಾಂಗ್ಣೆಪರಿಂ ಎರಿಕ್ ಬಾಬ್ ಮರ್ಣಾ ಉಪ್ರಾಂತ್ಯಿ ಲೊಕಾ ಕಾಳ್ಜಾಂನಿ ಜಿವಾಳ್ಳೊ, ಜಿಯೆಂವ್ಕ್ ಲಾಗ್ಲೊ.
ಮೊರ್ಚುರಿ ಭಾಯ್ರ್ ಲುವಿಯಾಬ್, ರೊಯ್ ಬಾಬ್, ಸ್ಟ್ಯಾನಿ ಬಾಬ್ ಆನಿ ಸಮಿತಿ ಸಾಂದ್ಯಾಂಚಿ ತುರ್ತ್ ಜಮಾತ್ ಘಡ್ಲಿ. ಎರಿಕ್ ಬಾಬಾಚ್ಯಾ ಕುಟ್ಮಾದಾರಾಲಾಗಿಂ ಉಲೊವ್ನ್ ತಾಚ್ಯಾ ಆನಿ ತಾಂಚ್ಯಾ ಖುಶೆಖಾಲ್ ಮೊರ್ನ್ ಕರ್ಚೆಂ ಮ್ಹಣ್ ಠರಾವ್ ಘೆತ್ಲೊ ಆನಿ ಗರ್ಜೆಚಿ ತಯಾರಿ ಕೆಲಿ. 31.08.25 ವೆರ್ ವಾಲೆನ್ಶಿಯಾ ಇಗರ್ಜೆಂತ್ ಮೀಸ್ ಜಾಲೆಂ. ಕರ್ನಾಟಕ ಸರ್ಕಾರಾನ್ ಎಕಾ ಕೊಂಕ್ಣಿ ಕಲಾಕಾರಾಕ್ ಪಯ್ಲೆ ಪಾವ್ಟಿಂ ಮ್ಹಳ್ಳೆಪರಿಂ ಪೋಲಿಸ್ ಗೌರವ್ ಪಾಟೊವ್ನ್ ಮಾನ್ ಕೆಲೊ. ಜಿಲ್ಲಾ ಖಬಡ್ದಾರಿ ಮಂತ್ರಿನ್ ಸರ್ಕಾರಾ ತರ್ಫೆನ್ ಮಾನ್ ಪಾಟಯ್ಲೊ. ಹಾಚ್ಯಾ ಪಾಟ್ಲ್ಯಾನ್ ಎರಿಕ್ ಬಾಬಾಚೊ ಅಭಿಮಾನಿ ಎಂಎಲ್ಸಿ ಐವನ್ ಡಿಸೋಜಾಚೊ ವ್ಹಡ್ ವಾವ್ರ್ ಆಸ್ಲಲೊ.
ಕಲಾಂಗಣಾಂತ್ ಆಪ್ಲೆಂ ಮರಣ್ ಸಂಭ್ರಮಿಜೆ ಮ್ಹಳ್ಳ್ಯಾ ಎರಿಕ್ ಬಾಬಾಚ್ಯೆ ಖುಶೆಕ್ ಖಾಲ್ತಿಮಾನ್ ಘಾಲುನ್ ಜೊಕ್ತಿ ತಯಾರಿ ಕೆಲ್ಲಿ. ಜೊಯೆಲ್ ಪಿರೆರಿಚ್ಯಾ ಮುಖೆಲ್ಪಣಾರ್ ಗಾವ್ಪಿ, ಸಂಗೀತ್ಗಾರ್ ಆನಿ ಕಲಾಕಾರ್ ಸಾಂಗಾತಾ ಆಯ್ಲೆ. ಕೆದಾಳಾಯ್ ʻಆಮಿ ವೆಗ್ಳೆʼ ಮ್ಹಣ್ ಮ್ಹಣ್ಚ್ಯಾ ಎರಿಕ್ ಬಾಬಾಚೆಂ ಮೋರ್ನ್ಯಿ ವೆಗ್ಳೆಪಣಾಂತ್ ಸೊಭ್ಲೆಂ. ಮೋರ್ನ್ಯಿ ಅಶೆಂ ಸಂಭ್ರಮುಂಕ್ ಜಾತಾ ಮ್ಹಣ್ ಮಾಂಡ್ ಸೊಭಾಣಾನ್ ದಾಕಯ್ಲೆಂ. ಉಪ್ರಾಂತ್ ಬೋಳೂರ್ ಚಿತಾಗಾರಾಂತ್ ಖಿಣಾನ್ ಎರಿಕ್ ಬಾಬ್ ಧುಂವರ್ ಜಾಲೊ, ಗೊಬೊರ್ ಜಾಲೊ, ಅನಂತ್ ವಿಶ್ವಾಂತ್ ಲೀನ್ ಜಾಲೊ ಆನಿ ಅಮರ್ ಜಾಲೊ.
ಪಾಟ್ಲೊ ಮ್ಹಯ್ನೊ ಎರಿಕ್ ಬಾಬಾಚೊಚ್ ಜಾಲೊ. ಸಂಸಾರ್ಭರ್ ಸಂಘಟನಾಂನಿ ಎರಿಕ್ ಬಾಬಾಕ್ ಶ್ರದ್ಧಾಂಜಲಿ ದಿಲಿ. ಹ್ಯಾ ಸರ್ವಾಂ ಮಧೆಂ ಸರ್ವಾಂಚೆಂ ಏಕ್ಚ್ ಸವಾಲ್ ಆಸ್ಲೆಂ ʻʻಎರಿಕ್ ಬಾಬಾಚ್ಯಾ ಕುಡಿಚೊ ಗೊಬೊರ್ ಕಿತೆಂ ಕೆಲೊ? ಖಂಚ್ಯಾ ರುಕಾ ಮುಳಾಂತ್ ಘಾಲೊ? ಜಾಣ್ತಿಂ, ನೆಣ್ತಿಂ, ಭುರ್ಗಿಂ, ವ್ಹಡಾಂ – ಕಲಾಂಗಣಾಕ್ ಆಯಿಲ್ಲ್ಯಾ ಸರ್ವಾಂಚೆಂ ಹೆಂಚ್ ಸವಾಲ್. ಬೋಳೂರ್ ಹುಲ್ಪಾಯಿಲ್ಲ್ಯಾ ಉಪ್ರಾಂತ್ ಎರಿಕ್ ಬಾಬಾಚ್ಯಾ ನಶ್ವರ್ ಕುಡಿಚೆ ಜೆ ಭಾಗ್ ಎಕಾ ಮಾತ್ಯೆಚ್ಯಾ ಕೊಳ್ಸುಲ್ಯಾಂತ್ ಘಾಲ್ನ್, ಸಾಂಪ್ರದಾಯಿಕ್ ರಿತಿನ್ ಬಾಂದುನ್ ತಾಂಗೆರ್ ಪಾವಿತ್ ಕೆಲ್ಲೆ ತೆ ರಶ್ಮಿ ಬಾಯೆನ್ ಆನಿ ರಿತೇಶಾನ್ ಕಲಾಂಗಣಾಕ್ ಪಾವಿತ್ ಕೆಲ್ಲೆ. ತೆ ಸಮಿತಿ ಸಾಂದ್ಯಾಂನಿ ಮಾನಾನ್ ಘೆವ್ನ್, ಕಲಾಂಗಣಾಂತ್ ದವರ್ಲ್ಯಾತ್. ಮಾಂಡ್ ಸೊಭಾಣ್ ಕೆದಾಳಾಯ್ ವೆಗ್ಳೆಂ ಚಿಂತ್ತಾ, ವ್ಹಡ್ ಚಿಂತ್ತಾ ದೆಕುನ್ ಎರಿಕ್ ಬಾಬಾಚೊ ಉಗ್ಡಾಸ್ ಕಾಯಾಮ್ ಕರ್ಚ್ಯಾ ಎಕಾ ವಿಶಿಶ್ಟ್ ಯೆವ್ಜಣೆವಿಶಿಂ ಅಧ್ಯಕ್ಷ್ ಲುವಿಯಾಬ್ ತಕ್ಲಿ ಆಟೊವ್ನ್ ಆಸಾ. ತಿ ಕಾರ್ಯಾರುಪಾಕ್ ಯೆತಚ್ ಎರಿಕ್ ಬಾಬ್ ಖಂಯ್ ಆಸಾ ಮ್ಹಣ್ ಲೊಕಾಕ್ ಕಳ್ತಲೆಂ. ತವಳ್ ಪರ್ಯಾಂತ್ ಆನಿ ಫುಡೆಂಯ್ ತೊ ತಾಚ್ಯಾ ಅಭಿಮಾನಿಂಚ್ಯಾ, ಶಿಸಾಂಚ್ಯಾ ಕಾಳ್ಜಾಂನಿ ಆಸ್ತಲೊ.
ಕಲಾಂಗಣಾಂತ್ ತೊ ಆನಿ ನಾ ಮ್ಹಳ್ಳೆಂ ಭೊಗಾಪ್ ಕೊಣಾಯ್ಕೀ ಯೇನಾ. ರುಕ್ಮಿಣಿ ಅಕ್ಕ ಖಂಚ್ಯಾ ಕಾಮಾರ್ ಆಸ್ಲ್ಯಾರೀ ಸಾಡೆ ಧಾ ವೊರಾರ್ ಏಕ್ ಪಾವ್ಟಿಂ ದಫ್ತರಾಕ್ ಯೆತಾ. ʻಸರ್ ಚಾ ಪರ್ಪುನ ಟೈಮ್ ಮ್ಹಣ್ತಾʼ, ನಿರ್ಲಿಪ್ತ್ ದೊಳ್ಯಾಂನಿ ಗಡಿಯಾಳ್ ಪಳೆತಾ ಆನಿ ಪಾಟಿಂ ವೆತಾ. ಸವಿತಾ ದಿಸಾಕ್ ಏಕ್ ಪಾವ್ಟಿಂ ಮ್ಹಜ್ಯಾ ಜಲ್ಮಾ ದಿಸಾಚ್ ಎರಿಕ್ ಬಾಬ್ ಸರ್ಲೊ ಮ್ಹಣ್ ಕಶೆಂ ಚಿಂತ್ಚೆಂ ಮ್ಹಣ್ ಖಂತ್ ಉಚಾರ್ತಾ. ಎಲ್ರೊನ್, ಕೇರನ್, ರೊನಿ, ವಿಕಾಸ್, ರಾಹುಲ್, ರೆನ್ನು ಆನಿ ಹೆರ್ ತರ್ನಾಟೆ ದಿಸಾಕ್ ಏಕ್ ಪಾವ್ಟಿಂ ಪುಣಿ ಎರಿಕ್ ಬಾಬಾಚ್ಯಾ ಕಾರ್ಯಾವಿಶಿಂ ಕಾರ್ಬಾರಾವಿಶಿಂ ಉಲಯ್ತಾತ್. ತಾಚೊ ತಾಳೊ ಕಾಡ್ನ್ ಮಿಮಿಕ್ರಿ ಕರ್ತಾತ್. ತಾಣೆಂ ಹಾಂಕಾಂ ಜ್ಯೊರ್ ಕೆಲ್ಲೆಂ ಅಭಿಮಾನಾನ್ ಸಾಂಗ್ತಾತ್. ತೊ ಆತಾಂ ಸರ್ಗಾರ್ ಕೊಂಕ್ಣಿ ಜಾಯ್ ಮ್ಹಣ್ ಹರ್ತಾಳ್ ಕರ್ಚೆವಿಶಿಂ, ಗೆಟಿಲಾಗಿಂ ಪೆದ್ರುನ್ ಸರ್ವಾಂಕ್ ದೇವ್ ಬರೊ ದೀಸ್ ದೀಂವ್ ಮ್ಹಣ್ ಸ್ವಾಗತ್ ಕರ್ಚೆವಿಶಿಂ, ಸರ್ಗ್ ಸೊಭಾಣ್ ಚಲೊಂವ್ಚೆವಿಶಿಂ ಉಲಯ್ತಾತ್. ಸಂದೀಪ್ ಝಾಡಾಂಲಾಗಿಂ ಉಲಯ್ತಾ, ಎರಿಕ್ ಬಾಬಾನ್ ಝಾಡಾಂ ಸಾಂಬಾಳುಂಕ್ ದಿಲ್ಲಿಂ ಸುಚನಾಂ ಉಗ್ಡಾಸ್ ಕಾಡ್ತಾ. ಹಾಂಗಾ ಆಮ್ಚೊ ಕಾರ್ಯದರ್ಶಿ ಕೇರನ್ ಮಾಡ್ತಾಚಿ ಏಕ್ ಗಜಾಲ್ ಸಾಂಗಾಜೆ ಪಡ್ತಾ. ಎರಿಕ್ ಬಾಬಾಚೊ ʻಥಕಾನಾತ್ಲ್ಲೊ ಝುಜಾರಿʼ ಬೂಕ್ ರಾತ್ ದೀಸ್ ಮೆಳುನ್, ನೀದ್ ಖಳುನ್ ಎಕಾ ದಿಸಾ ಭಿತರ್ ತಾಣೆಂ ಇ-ಬೂಕ್ ಜಾವ್ನ್ ಕನ್ವೆಡ್ತರ್ ಕರ್ನ್ ಲೊಕಾರ್ಪಣ್ ಕೆಲೊ. ಹೆರಾ ವೆಳಾರ್ ತರ್ ಹಫ್ತ್ಯಾಚೆಂ ಕಾಮ್ ತೆಂ. ವಿಚಾರ್ತಾನಾ ಎರಿಕ್ ಬಾಬಾಕ್ ಮ್ಹಜಿ ಶ್ರದ್ಧಾಂಜಲಿ ಹಿ ಮ್ಹಣಾಲೊ.
ಎರಿಕ್ ಬಾಬಾವಿಣೆಂ, ಗುರ್ಕಾರಾವಿಣೆಂ ಪಯ್ಲೆ ಪಾವ್ಟಿಂ ಮಾಂಡ್ ಸೊಭಾಣಾಚಿ ನವಿ ಸಮಿತಿ ಅಸ್ತಿತ್ವಾಕ್ ಆಯ್ಲ್ಯಾ. ತಾಚೆಂ ಸ್ವಪಣ್ ಜಾವ್ನ್ ಆಸ್ಲಲೆಂ ಕೊಂಕ್ಣಿ ಅಭಿಮಾನ್ ಸಂಸಾರಾಚ್ಯಾ ಶಿಖರಾಚೆರ್ ಚಡೊಂವ್ಚೊ ಹೆತು ದವರ್ನ್ ಹಿ ಸಮಿತಿ ವಾವುರ್ತಲಿ. ಫುಡ್ಲ್ಯಾ ವರ್ಸಾಂತ್ ಕೊಂಕ್ಣಿ ಪುಸ್ತಕಾಂ ಇ-ಬುಕ್ ಕರುನ್ ಇ-ಲೈಬ್ರೆರಿ ವಾಡೊಂವ್ಚಿ, ಕೊಂಕ್ಣಿ ಸಾಹಿತ್ಯ್ ಎಕಾ ಸಾತ್ಯಾ ಪಂದಾಂ ಜಮೊಂವ್ಚೆಂ ಇ-ಬೊಂಗ್ಸಾಳ್, ಸಾದರ್ ಕಲೆಂಕ್ ಪ್ರಚಾರ್ ಆನಿ ಪ್ರೋತ್ಸಾವ್ ದೀಂವ್ಕ್ ಕೊಂಕ್ಣಿ ಶೋ ಡೊಟ್ ಕೊಮ್, ಭುರ್ಗ್ಯಾಂಚೆಂ ಸಾಹಿತ್ಯ್ ಸಮ್ಮೇಳ್ ಅಸಲಿಂ ಕಾರ್ಯಿಂ ಕರುಂಕ್ ಯೆವ್ಜಣ್ ಘಾಲ್ಯಾ. ಸಾಂಗಾತಾ ಮ್ಹಯ್ನ್ಯಾಳಿ ಮಾಂಚಿ, ಸುಮೇಳ್, ನಾಚ್ ಸೊಭಾಣ್, ಮಾಂಡ್ ನಾಟಕ್, ಸುರ್ ಸೊಭಾಣ್, ರಜೆ ಶಿಬಿರ್ ಇತ್ಯಾದಿ ಕಾರ್ಯಿಂ ಮುಕಾರುನ್ ವೆತಲಿಂ. ಎರಿಕ್ ಬಾಬಾಚ್ಯಾ ಅಮರ್ ಉಗ್ಡಾಸಾಕ್ ಸಂಸಾರಾಚ್ಯಾ ಕೊನ್ಶಾ ಕೊನ್ಶಾಂ ಥಾವ್ನ್ ಲೊಕಾಂಕ್ ಎಕ್ವಟಾವ್ನ್ ಕೊಂಕ್ಣೆಚ್ಯಾ ವಿವಿಧತೆಂತ್ ಏಕತಾಯ್ ಸಂಭ್ರಮ್ಚೊ 12 ದೀಸ್, 12 ವೊರಾಂ ಆನಿ 12 ಮಿನುಟಾಂಚೊ ಗಿನ್ನೆಸ್ ದಾಖ್ಲೊ ರಚ್ಚಿ ತಯಾರಿ ಚಲ್ತಲಿ.
ಎರಿಕ್ ಬಾಬಾಚೊ ವಾವ್ರ್ ಮುಕಾರುಂಚೊಚ್ ತಾಕಾ ದಿಂವ್ಚಿ ಶ್ರದ್ಧಾಂಜಲಿ ಮ್ಹಣ್ ಮಾಂಡ್ ಸೊಭಾಣ್ ಪಾತ್ಯೆತಾ. ಎರಿಕ್ ಬಾಬಾವಿಣೆಂ ಏಕ್ ನಿರ್ವಾತ್ ಉಬ್ಜಾಲಾಂ ತರೀ, ತಾಣೆಂಚ್ ಸಾಂಗ್ಲಲೆ ಪರ್ಮಾಣೆಂ the show must go on.
- ವಿತೊರಿ ಕಾರ್ಕಳ್
