04/05/2023
എൻ്റെ വീടിൻ്റെ നാലോറവും മതിലുണ്ട്.
ഞങ്ങളിവിടെ പാർക്കാൻ വരുന്ന കാലത്ത്
ഇത് മുള്ളുവേലികളുള്ള
കവുങ്ങിൻ പറമ്പായിരുന്നു.
മുള്ളുകൾ അടക്കി മെടഞ്ഞ
ഒരു മുള്ളുവാതിലും
ഇരുമ്പു ചങ്ങലയും
പറങ്കിത്താഴും ഉണ്ടായിരുന്നു.
വടക്ക് കൊട്ട്ളീക്കാര്
തെക്ക് വല്ല്യളപ്പീക്കാര്
കെഴക്ക് കൊന്തണ്യേൻ മാഷ്
പടിഞ്ഞാറ് തോണമ്മായി.
തോണ എന്നതായിരിക്കില്ല അവരുടെ പേരെന്ന്
പിൽക്കാലത്ത് സത്യേട്ടൻ എന്നോടു പറയുകയുണ്ടായി.
ചെറോണ എന്ന് തീയ്യത്തികൾക്ക് പേരുണ്ട് എന്നും.
തോണമ്മായീടെ വീടു നിന്നത്
പാടത്തിന് നടുക്കുള്ളൊരു
തറയിലാണ്.
വെളുത്ത മണ്ണിൻ്റെ തറയിൽ
തെങ്ങും മാവുമെല്ലാം
വളർന്നുയർന്നു നിന്നിരുന്നു.
തറയ്ക്ക് പടിഞ്ഞാറ്
മാട്ടത്തിന് തൊട്ട്
ശങ്കരേട്ടനും ചോത്തിയും പാർത്തിരുന്നു.
അവർക്കൊരു മകൾ
ഒരേയൊരു മകൾ
കമലാക്ഷി.
കമലാക്ഷിയെ ചാട്ടൊളത്തേക്കാണ്
പെണ്ണ് കൊണ്ടോയത്.
ശങ്കരേട്ടന് ചെവി തെല്ല് പതമായിരുന്നു.
അലകു പോലുള്ള മെലിഞ്ഞ ദേഹമായിരുന്നു.
കൊളമ്പുകാരനായിരുന്നു.
കഠിനമായ ചില നാസ്തിക ശ്ലാേകങ്ങൾ
എനിക്കു ചൊല്ലിക്കേൾപ്പിച്ചു തന്നിരുന്നു.
വലിയ പാളകോട്ടിക്കുത്തി അത്
കത്തിയുറയിൽ ഞാത്തിയാണ്
ചെത്താൻ പോയിരുന്നത്
തോണമ്മായിയ്ക്ക് മൂന്നു മക്കൾ.
ഒരാണും രണ്ടു പെണ്ണും.
മാധവി
ഭാർഗ്ഗവി
ഗോപാലൻ.
ഭാർഗ്ഗവി എന്നു പേരുള്ള പെണ്ണുങ്ങളും
വേലായുധൻ എന്നു പേരുള്ള
ആണുങ്ങളും
ചെറുവത്താനിയിൽ
അക്കാലത്ത് ധാരാളമുണ്ടായിരുന്നു.
പറഞ്ഞു വന്നതിതൊന്നുമല്ല
ഞങ്ങളിപ്പോ പാർക്കുന്ന പറമ്പിനു ചുറ്റും
മുള്ളുവേലിയും മുള്ളു കൊണ്ടുള്ള വാതിലും
ഉണ്ടായിരുന്നു എന്നതാണ്.
പുരപണിയുന്ന കാലത്തു തന്നെ
വേലി പൊളിച്ച് തീയ്യിട്ട് മതിലു കെട്ടി.
ചെമ്മണ്ണു ചവുട്ടിക്കുഴച്ച് വാരി വെച്ച് കരിങ്കല്ലുപാളികൾ അതിലുറപ്പി -
ച്ചടുക്കി വെച്ച് മതിലു പൊങ്ങി.
കിഴക്കു മതിലില്ല.
കൊന്തമണിയൻ മാഷ് ചിത്രകാരനാണ്.
ഹാർമ്മോണിയം വായിക്കാനറിയാം.
വലിയൊരു കുഴികുത്തി അതിലൊരു ശീമപ്പന്നിയെ
വളർത്തിയിരുന്നു.
കൊമ്പോറത്തിൽ തവിടും പിണ്ണാക്കും കൊട്ന്ന്
പന്നിയ്ക്ക് ഇട്ടു കൊടുക്കും.
പന്നിയെ പോർക്കെന്നാണ് മാഷ് പറയുക.
ആ പോർക്കിന് പനനൊങ്കിൻ്റെ നിറമായിരുന്നു.
ഒരു വലിയ പനനൊങ്ക് കുഴിയിൽ
വട്ടം ചുറ്റുന്നതായും
മുക്രയിടുന്നതായും
എനിക്കു തോന്നാറുണ്ടായിരുന്നു.
പറഞ്ഞു പറഞ്ഞെങ്ങോട്ടോ പോയി.
അതെ, വീടിനു ചുറ്റുമുള്ള മതിലിനെക്കുറിച്ചാണ് .
അതെങ്ങനെയാണ് പൊളിയുന്നത്
എന്നതിനെപ്പറ്റിയാണ്.
പറയാം.
ഇന്നു വ്യാഴാഴ്ച്ചയാണ്.
നാളെ ചിലപ്പോൾ വെള്ളിയാഴ്ച്ച
ആവാനിടയുണ്ട്.
മതിലുകളെപ്പറ്റി പറയേണ്ടത്
വെള്ളിയാഴ്ച്ചയാണ്.
റോബർട്ട് ഫ്രോസ്റ്റിനും
കോട്ടികോളനും നന്ദി
💨
ആകയാലും
പ്രിയരേ
സുപ്രഭാതം
🙏🏽
