07/08/2026
सन डेव्हलपर्सच्या सातव्या वर्धापनदिनानिमित्त गरजू विद्यार्थ्यांना मोफत वह्यांचे वाटप; सामाजिक बांधिलकीचा प्रेरणादायी संदेश
कुंभारी (प्रतिनिधी):
व्यवसायात यश मिळवण्याबरोबरच समाजाप्रती असलेली आपली जबाबदारीही तितक्याच प्रामाणिकपणे जपली पाहिजे, या उदात्त भावनेतून सन डेव्हलपर्सच्या सातव्या वर्धापनदिनानिमित्त श्री आजोबा ताता गणपती मंडळ, क्रांती चौक, कॉम्रेड गोदुताई परुळेकर नगर, कुंभारी यांच्या वतीने अत्यंत हृदयस्पर्शी सामाजिक उपक्रमाचे आयोजन करण्यात आले. या उपक्रमाअंतर्गत गरजू, आर्थिकदृष्ट्या दुर्बल तसेच ज्यांचे आई किंवा वडील निधन पावले आहेत अशा इयत्ता पहिली ते बारावीपर्यंत शिक्षण घेणाऱ्या विद्यार्थ्यांना मोफत वह्यांचे वाटप करण्यात आले.
बुधवार, दि. ५ ऑगस्ट रोजी श्री आजोबा ताता गणपती मंदिर परिसर, क्रांती चौक, कॉम्रेड गोदुताई परुळेकर नगर (खडी मशीन मागे), कुंभारी येथे हा उपक्रम उत्साहपूर्ण आणि भावनिक वातावरणात संपन्न झाला. विद्यार्थ्यांच्या हातात नवीन वह्या देताना त्यांच्या डोळ्यांतील आनंद, चेहऱ्यावरील समाधान आणि उज्ज्वल भविष्यासाठी उमटलेली आशेची किरणे उपस्थित प्रत्येकाच्या मनाला स्पर्शून गेली.
यावेळी सन डेव्हलपर्सचे सर्वेसर्वा भुमेश यनगंदुल हे प्रमुख पाहुणे म्हणून उपस्थित होते. त्यांच्या शुभहस्ते विद्यार्थ्यांना वह्यांचे वितरण करण्यात आले. यावेळी त्यांनी शिक्षण हेच जीवनातील सर्वात मोठे सामर्थ्य असून, कोणताही विद्यार्थी केवळ आर्थिक अडचणीमुळे शिक्षणापासून वंचित राहू नये, हीच या उपक्रमामागील प्रेरणा असल्याचे सांगितले.
हा उपक्रम केवळ वह्यांचे वाटप नसून, विद्यार्थ्यांच्या स्वप्नांना नवी दिशा देण्याचा, त्यांच्या शिक्षण प्रवासात आशेचा हात देण्याचा आणि समाजातील प्रत्येक सक्षम व्यक्तीने गरजूंसाठी पुढे यावे, असा प्रेरणादायी संदेश देणारा ठरला.
या उपक्रमाच्या यशस्वी आयोजनासाठी श्री आजोबा ताता गणपती मंडळाचे सर्व पदाधिकारी, सभासद आणि स्थानिक कार्यकर्त्यांनी मनापासून परिश्रम घेतले. त्यांच्या सामाजिक बांधिलकीचे परिसरातील नागरिकांनी मनापासून कौतुक केले. सन डेव्हलपर्स आणि मंडळाने समाजसेवेचा घेतलेला हा वसा अनेकांसाठी प्रेरणादायी ठरत असून, भविष्यातही अशाच समाजहिताच्या उपक्रमांद्वारे समाजाशी असलेले नाते अधिक दृढ करण्याचा संकल्प यावेळी व्यक्त करण्यात आला.
