28/09/2026
80-കളുടെ അവസാനവും 90-കളുടെ ആദ്യവും കരിക്കോട് ടി.കെ.എം. ആർട്സ് & സയൻസ് കോളേജിൽ പഠിച്ച പൂർവ്വ വിദ്യാർത്ഥികളുടെ ഒത്തൊരുമ ഇന്നലെ കൊല്ലം പ്രസ് ക്ലബ്ബിൽ നടന്നു. പ്രിയ കൂട്ടുകാരുടെ സ്നേഹാന്വേഷണങ്ങൾ കൊണ്ട് ഹൃദ്യമായ ആ ചടങ്ങിൽ, സംസ്ഥാന അധ്യാപക അവാർഡ് നേടിയ കണ്ണൻ എസിനെയും, മുഖത്തല ബ്ലോക്ക് പഞ്ചായത്ത് അംഗം നിസാമുദ്ദീനെയും ഒപ്പം എന്നെയും കൂട്ടുകാർ സ്നേഹത്തോടെ ചേര്‍ത്ത്പിടിച്ചു. ഇരവിപുരത്തിന്റെ പ്രിയപ്പെട്ട എം.എൽ.എ. വിഷ്ണു മോഹൻ ഉദ്ഘാടനം നിർവഹിച്ച ആ സംഗമം എന്റെ മനസ്സിൽ വല്ലാത്തൊരു ഗൃഹാതുരത്വം ഉണർത്തി.
അഞ്ചാലുംമൂട് ഗവൺമെന്റ് ഹൈസ്കൂൾ എന്ന് പറയുന്ന സർക്കാർ വിദ്യാലയത്തിന്റെ നാല് ചുവരുകൾക്കിടയിൽ വിദ്യാർത്ഥി രാഷ്ട്രീയ പ്രവർത്തനവും നാടക പ്രവർത്തനവുമായി നടന്നിരുന്ന എന്നെപ്പോലൊരു സാധാരണ വിദ്യാർത്ഥിയെ രൂപപ്പെടുത്തിയതിൽ ഈ കലാലയത്തിന് വലിയ പങ്കുണ്ട്. ടി.കെ.എം. ആർട്സ് ആൻഡ് സയൻസ് കോളേജ് എനിക്ക് വെറുമൊരു വിദ്യാലയം മാത്രമായിരുന്നില്ല; അഞ്ചാലുംമൂട് സ്കൂളിനു ശേഷമുള്ള എന്റെ വിദ്യാർത്ഥി രാഷ്ട്രീയത്തിന്റെ പാഠശാല കൂടിയായിരുന്നു അത്. 1988-ൽ പ്രീഡിഗ്രി വിദ്യാർത്ഥിയായി കോളേജിൽ ചേർന്ന ഞാൻ, തുടർന്ന് ഡിഗ്രി പഠനകാലത്ത് 1989 മുതൽ പി.എസ്.യു.-വിന്റെ യൂണിറ്റ് രൂപീകരിച്ച് യൂണിറ്റ് സെക്രട്ടറിയായി പ്രവർത്തനം ആരംഭിച്ചു. പ്രീഡിഗ്രി ക്ലാസ് മുതൽ ഡിഗ്രി വരെയുള്ള കാലയളവിൽ എന്റെ രാഷ്ട്രീയ പ്രസംഗങ്ങൾ മാറ്റുരച്ച വേദി കൂടിയായിരുന്നു ആ ക്യാമ്പസ്.
രാഷ്ട്രീയ പ്രവർത്തനത്തിന്റെ ഭാഗമായി പി.എസ്.യു.-വിന് വേണ്ടി പ്രവർത്തിച്ചതിന്റെ പേരിൽ ഒട്ടനവധി അനുഭവങ്ങളാണ് ആ ക്യാമ്പസ് എനിക്ക് സമ്മാനിച്ചത്. അടിയുടെയും വിരട്ടലിന്റെയും മുന്നിൽ പതറിപ്പോകാതെ, സധൈര്യം എടുത്ത നിലപാടുകൾക്കനുസരിച്ച് പ്രവർത്തിക്കാനുള്ള ഊർജ്ജം തന്നത് ആ കലാലയമാണ്. അന്ന് എതിർത്തവരും തെറിവിളിച്ചവരും ഇന്നൊരു ഹാളിൽ ഒത്തുകൂടി സ്നേഹം വാരിക്കോരി തന്നപ്പോൾ, ഞാൻ വീണ്ടും ആ പഴയ ക്യാമ്പസ് ഓർമ്മകളിലേക്ക് തിരിച്ചുനടന്നു. 91ൽ ക്യാമ്പസ്സിൽ psu പ്രവർത്തനം ശക്തി പ്രാപിച്ചു തുടങ്ങിയപ്പോൾ, അത് തടയാൻ എസ്എഫ്ഐ യൂണിറ്റ് കമ്മിറ്റി യുടെ തീരുമാനപ്രകാരം കോളേജിലെ എസ്എഫ്ഐ നേതാവായ ഹുസൈൻ തന്ത്ര പൂർവ്വം ചായ കുടിക്കാം എന്ന് പറഞ്ഞ് കാന്റീനിലേക്ക് വിളിച്ചു കൊണ്ട് പോയി psu പ്രവർത്തനം നിറുത്തണം എന്ന് ഭീഷണി പെടുത്തിയതും അതിനു വഴങ്ങാതിരുന്നപ്പോൾ കരണക്കുറ്റിക്ക് അടി തന്നതും ഇന്നും ഓർമ്മയിലുണ്ട്. അതെല്ലാം അന്നത്തെ ക്യാമ്പസ് രാഷ്ട്രീയത്തിന്റെ ഭാഗമായി മാത്രം കാണാൻ എനിക്ക് കഴിഞ്ഞു.
ആരോടും പരിഭവമോ വിരോധവുമില്ലാതെ എന്റെ പ്രസ്ഥാനത്തിനു വേണ്ടി സധൈര്യം ആ നാലുവർഷക്കാലം പ്രവർത്തിക്കാൻ എനിക്ക് സാധിച്ചു. ആ പ്രയത്നത്തിന്റെ അവസാനം, എതിർത്തവർ തന്നെ എന്റെ സമീപനം കണ്ട് സുഹൃത്തുക്കളായി മാറി. കൊല്ലം കോർപ്പറേഷന്റെ വികസന സ്റ്റാൻഡിംഗ് കമ്മിറ്റി ചെയർമാൻ എന്ന നിലയിലേക്ക് എത്തിയപ്പോൾ, അന്ന് എതിർത്തവരും ഇന്ന് എന്നെ സ്നേഹംകൊണ്ട് പൊതിയുകയാണ്. മൂന്ന് പതിറ്റാണ്ടുകൾക്കിപ്പുറം അന്നത്തെ പഴയ ഓർമ്മകളെ തൊട്ടുണർത്തുന്നതിനും അയവിറക്കുന്നതിനും ഈ സംരംഭം വലിയ പങ്കുവഹിച്ചു എന്ന് ഞാൻ അഭിമാനത്തോടെ പറയുന്നു.
ഈ ചടങ്ങിൽ സംസാരിച്ച ഷെഫിയും ഷൈജുവും, ജാസ്മിനും, അധ്യക്ഷം വഹിച്ച എന്റെ സഹപ്രവർത്തകൻ കൂടിയായ അഡ്വ. മരുത്തടി നവാസ് പറഞ്ഞ വാക്കുകളും യഥാർത്ഥത്തിൽ എന്നെ തൊണ്ണൂറുകളിലേക്ക് കൂട്ടിക്കൊണ്ടുപോയി. ഞാൻ കോളേജിൽ വരുമ്പോൾ വളരെ സുന്ദരനായ, M Com ന് പഠിച്ചിരുന്ന കോളേജ് യൂണിയൻ ചെയർമാൻ യഹിയയും, സാജൻ കെ. സാമുവേലും, ഇക്ബാലും, കെ.ബി. ഷഹാലും, അജയനും, പിന്നെ യൂസഫും തുടങ്ങി ഒട്ടേറെ പേർ... എനിക്ക് ഏറെ ഇഷ്ടമുണ്ടായിരുന്ന ഒട്ടേറെ സുഹൃത്തുക്കൾ... എല്ലാവരുടെയും പേര് പറയാൻ ഈ ചെറിയ സമയം തികയില്ലെങ്കിലും, ഇവരെല്ലാം എന്റെ ഓർമ്മകളിൽ എപ്പോഴുമുണ്ട്. ഈ അവസരത്തിൽ അവരെ ഓരോരുത്തരെയും ഞാൻ സ്നേഹത്തോടെ ഓർക്കുന്നു.
അഞ്ചാലുംമൂട് സ്കൂളിനുശേഷം എന്നെ ഒട്ടനവധി മാറ്റങ്ങൾക്ക് വിധേയമാക്കിയ, ഞാനിപ്പോൾ പറയുന്ന വാക്കുകൾക്കും വാചകങ്ങൾക്കും ജീവൻ നൽകിയ എന്റെ പ്രിയപ്പെട്ട ടി.കെ.എം. കോളേജിനും, ഈ മനോഹരമായ ദിവസം സമ്മാനിച്ച പ്രിയ കൂട്ടുകാർക്കും പ്രത്യേകിച്ച് ഇതിന്റെ സംഘാടകൻ ആയ best friend ഹക്കീമിനും ഹൃദയം നിറഞ്ഞ നന്ദി
നിങ്ങൾ നൽകിയ സ്നേഹവും കരുതലും എന്നും എന്റെ മനസ്സിലുണ്ടാകും.
നമുക്ക് വീണ്ടും കാണാം, ഒരുവട്ടം കൂടി ആ പഴയ കോളേജിൽ! ആ ക്യാമ്പസിന്റെ ഓർമ്മകൾക്കായി നമുക്ക് ഇനിയും കാത്തിരിക്കാം.
