31/05/2026
'എനിക്ക് അമ്മ ഒരു ദേവതയാണ്'; ഹൃദയസ്പർശിയായ കുറിപ്പുമായി സ്വാസിക❤️
മലയാളികളുടെ പ്രിയ നായിക സ്വാസിക വിജയ് തന്റെ അമ്മയ്ക്ക് നേർന്ന പിറന്നാൾ ആശംസയാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്. ഇൻസ്റ്റാഗ്രാമിലൂടെയാണ് താരം തന്റെ അമ്മയ്ക്കൊപ്പമുള്ള മനോഹരമായ ഒരു ചിത്രവും ഒപ്പം വൈകാരികമായ ഒരു കുറിപ്പും പങ്കുവെച്ചിരിക്കുന്നത്. അമ്മ വാത്സല്യത്തോടെ സ്വാസികയ്ക്ക് ഭക്ഷണം വാരി നൽകുന്നതാണ് ചിത്രത്തിലുള്ളത്.
തന്റെ ജീവിതത്തിൽ അമ്മ നൽകിയ പിന്തുണയെയും സ്നേഹത്തെയും കുറിച്ച് സ്വാസിക കുറിപ്പിൽ വാചാലയാകുന്നുണ്ട്.
"ഹാപ്പി ബർത്ത്ഡേ അമ്മേ... എന്നിൽ തുടക്കം മുതൽ വിശ്വസിച്ച ഒരേയൊരു വ്യക്തി നിങ്ങളാണ്. ഈ ലോകത്തേക്ക് എന്നെ കൊണ്ടുവന്ന ദിവസം മുതൽ, അചഞ്ചലമായ വിശ്വാസത്തോടെയും സ്നേഹത്തോടെയും നിങ്ങൾ എനിക്കൊപ്പം നിന്നു. എന്റെ ജീവിതത്തിലെ ഏറ്റവും വലിയ പിന്തുണയും വഴികാട്ടിയും നിങ്ങളാണ്. സ്നേഹം കൊണ്ട് നിങ്ങൾ എനിക്കായി എടുത്ത ഓരോ തീരുമാനങ്ങളും എന്റെ ജീവിതത്തിലെ ഏറ്റവും മനോഹരമായ അനുഗ്രഹങ്ങളായി മാറി."
അമ്മ തനിക്ക് ദൈവത്തെ പോലെയാണെന്നും താരം പറയുന്നു. ജീവിതത്തിൽ എപ്പോഴെങ്കിലും ദൈവത്തിന്റെ അദൃശ്യ കരങ്ങൾ തന്നെ സംരക്ഷിക്കുന്നതായി തോന്നിയിട്ടുണ്ടെങ്കിൽ അത് അമ്മയിലൂടെയാണെന്നും സ്വാസിക കുറിക്കുന്നു.
"നിങ്ങളുടെ അവസാനമില്ലാത്ത സ്നേഹത്തിനും, ത്യാഗങ്ങൾക്കും, എന്നിലുള്ള വിശ്വാസത്തിനും നന്ദി. ഇന്ന് ഞാൻ എന്തെങ്കിലുമായിട്ടുണ്ടെങ്കിൽ അതിന് കാരണം നിങ്ങളാണ്. ഹാപ്പി ബർത്ത്ഡേ അമ്മ.. അനന്തമായി ഞാൻ നിങ്ങളെ സ്നേഹിക്കുന്നു," എന്ന് പറഞ്ഞുകൊണ്ടാണ് സ്വാസിക കുറിപ്പ് അവസാനിപ്പിക്കുന്നത്.
