16/09/2026
ପଶ୍ଚିମ ଓଡ଼ିଶାର ପ୍ରମୁଖ କୃଷିଭିତ୍ତିକ ପର୍ବ ନୂଆଁଖାଇକୁ ନେଇ ସମ୍ବଲପୁର ସମେତ ସାରା ପଶ୍ଚିମ ଓଡ଼ିଶାରେ ଉତ୍ସବର ମାହୋଲ ଦେଖିବାକୁ ମିଳିଛି। ମଙ୍ଗଳବାର ସମ୍ବଲପୁରର ମା’ ସମଲେଶ୍ୱରୀ ମନ୍ଦିରରେ ପରମ୍ପରା ଅନୁସାରେ ନୂଆ ଧାନରୁ ପ୍ରସ୍ତୁତ ନବାନ୍ନ ମା’ଙ୍କୁ ଅର୍ପଣ କରାଯାଇଛି।
ପୂର୍ବରୁ ନିର୍ଦ୍ଧାରିତ ଶୁଭ ଲଗ୍ନ ଅନୁସାରେ ସକାଳ ୯ଟା ୪୦ ମିନିଟ୍ରୁ ୯ଟା ୫୪ ମିନିଟ୍ ମଧ୍ୟରେ ଏହି ନବାନ୍ନ ଅର୍ପଣ ହୋଇଥିଲା। ଏହାପରେ ଘରେ ଘରେ ନୂଆ ଅମଳ ଚାଉଳରୁ ପ୍ରସ୍ତୁତ ନବାନ୍ନ ସେବନ କରି ନୂଆଁଖାଇ ପାଳନ କରିଛନ୍ତି ଲୋକେ।
ମା’ ସମଲେଶ୍ୱରୀଙ୍କ ଦର୍ଶନ ଏବଂ ନବାନ୍ନ ଅର୍ପଣ ଦେଖିବା ପାଇଁ ମନ୍ଦିରରେ ବହୁ ସଂଖ୍ୟାରେ ଭକ୍ତଙ୍କ ସମାଗମ ହୋଇଥିଲା। ନୂଆ ଫସଲକୁ ପ୍ରଥମେ ଦେବୀଙ୍କୁ ଅର୍ପଣ କରିବା ପରେ ହିଁ ତାହାକୁ ଖାଇବା ଏହି ପର୍ବର ମୁଖ୍ୟ ପରମ୍ପରା ମଧ୍ୟରୁ ଅନ୍ୟତମ।
ନୂଆଁଖାଇ କେବଳ ନୂଆ ଫସଲ ଖାଇବାର ପର୍ବ ନୁହେଁ, ଏହା ପରିବାର ଓ ସମାଜକୁ ଏକାଠି କରୁଥିବା ଏକ ବଡ଼ ସାଂସ୍କୃତିକ ପରମ୍ପରା। ଏହି ଅବସରରେ ଦୂରଦୂରାନ୍ତରେ ରହୁଥିବା ଲୋକେ ମଧ୍ୟ ନିଜ ଘରକୁ ଫେରି ପରିବାର ସହ ନବାନ୍ନ ସେବନ କରିଥାନ୍ତି।
ଘରେ ଘରେ ପିଠାପଣା ଓ ବିଭିନ୍ନ ପାରମ୍ପରିକ ଖାଦ୍ୟ ପ୍ରସ୍ତୁତି ସହ ନୂଆଁଖାଇ ଭେଟଘାଟର ଆୟୋଜନ ମଧ୍ୟ ହୋଇଥାଏ। ବଡ଼ମାନଙ୍କୁ ଜୁହାର କରି ଆଶୀର୍ବାଦ ନେବା, ବନ୍ଧୁବାନ୍ଧବଙ୍କୁ ଭେଟିବା ଓ ପରସ୍ପରକୁ ‘ନୂଆଁଖାଇ ଜୁହାର’ କହିବା ଏହି ପର୍ବର ପରମ୍ପରାକୁ ଆହୁରି ଜୀବନ୍ତ କରିଥାଏ।
