30/04/2021
MATTHEW 24 Sunghi anasim in, Khonunga thilsoh dingho melchihna thu Jesu in ana seidoh hochu ahin,Tukhang thilsoh hotoh tekah in....
1. Chuin Jesu houin a kona apotdoh a achen, houin kisah dan ho chu avetsah dingin aseijuite ahenga ahungun ahi. 2 Ahin aman adonbut’in ajah uva, "Nang hon hi cheng hi namu louvu ham? Keiman tahbeh a kaseipeh nahiuve, hi-koma hi song suhchim louva khat chunga khat kise thom him him um louhel ding ahi,’’ ati.
Da kipatna
Mark 13:3-13; Luke 21:7-19
3 Chuin Olive mol chunga atou pet’in aseijuite guh thimin ahenga ahungun, "Hicheng chu itih le hi ding ham? Chule nangma hung kit ding phat le vannoi leiset kichai ni ding melchihna ipi hi ding ham, neiseipeh-un," atiuvin ahi. 4 Chuin Jesu n adonbut’in ajah uva hitin aseiye, "Koiman nang ho nalhep lhah louna dingun kichih theiyun. 5 Ijeh-inem itile mi tamtah keima minin hungun tin ‘Keima Christa kahi,’ tiuvin tin mi tamtah alhep lhah dingu ahi. 6 Chule nang hon gal kisat le kidou thuthang najah dingu ahi; ching theiyun, lung d**g hih-un, ijeh-inem itile hicheng chu hungsoh teiding ahi; ahivangin achaina hilou lai ding ahi 7 Ijeh-inem itile vai khat le vai khat, gam khat le gam khat hung kidouvin tin mun chom mun choma kel lhantin. ling kihot ding ahi. 8 Hiti ho jouse chu naoso nat kipan ahi. 9 Hiche phat teng chule genthei hesoh thoh dinga mihon nang ho nahinpeh doh dingu ahi. tha jong natha dingu ahi; chule keima min jal a nang ho vai jouse hot'a nahung um dingu ahi. 10 Hiteng chule mi tamtah lung lha ding ahi; chule khat le khat kipedoh tontin, chule khat le khat kihoto ding ahi. 11 Chule themgao lhem tamtah sohdoh a mi tamtah alhep lhah dingu ahi. 12 Chule chonset pun cheh cheh jeh a chu mi tamtah ngailutna dai ding ahi. 13 Ahinla akhon ni geiya thoh lhumkeiya pangdetpa bou chu huhhinga um ding ahi. 14 Chule namtin jouse hetsahna dinga hiche gam sung Thupha hi vannoi leiset pumpia kihil lhang ding ahi; chutah le kichai ding bou ahi.
Thoh hahsa nasatah
Mark 13:14-23; Luke 21:20-24
15 "Chuti ahijeh chun mi sumang thet umtah thil thudol Daniel themgao sei chu munthenga adin namu tengu le (Asim siman hehen), 16 chuteng le Judea gama um chengse thing lhang lamah jamu hen; 17 in chunga uma jong a-in a athilkeo kilah dingin kumda hen; 18 chule louva um jong apon kilah dingin kile kit da hen. 19 Ahin Ohe, hiche lai chule agaiya le nao noichep sah ho ada na dinguve! 20 Chule najam nau chu phalbi ahilou le cholngah ni ahilou na dingin taovun. 21 Ijeh-inem itile hiche teng chule hesoh genthei khoh chung nung um ding ahi; chutobang hesoh gentheina chu leiset umtil’a pat tu geiyin aumkha hih laiye, um jong um lou ding ahi. 22 Chule hiche nikho chu kisuchom lou hileh mihem him him ahinga soh umlou ding ahi; ahinla lhen chomte jal a anikho chu kisuchom ding ahi. 23 Chutengle khattouvin najah uva, ‘Ven Christa hikomah aume, ahiloule hikoma aume,’ tijong le tahsan hih-un. 24 Ijeh-inem itile Christa lhem ho le themgao lhem ho hung sohdoh untin, mel-chihna loupitah tah le mu kidang mu kidang ahinvetsah dingu ahi; ahithei le lhenchomte tah jeng jong ahinlhep lhah dingu ahi. 25 Veuvin, keiman kahil masah dem nahitauve. 26 Hijeh chun mihon najah uva, ‘Ven gamthip’ah aume,’ atiuva ahile, chedoh hih-un; ahiloule ‘Ven indan sung nungah aume’ atiu jong le tahsan hih-un. 27 ljeh-inem itile kolphe niso lama ahung phetdoh le nilhum lam geiyin asalvah-in; Mihem Chapa hung kit jong chutobang ding ahi. 28 Thilong umna a bou muthong kikhom ding ahi.
Mihem Chapa hung kitna ding
Mark 12:24-27; Luke 21:25-26
29 "Ahivangin chutenga hesoh genthei joutah chule nisa thimin tin lha jong vahta lou ding vanlaijola ahsi ho pul lhan tin, chule van thahatna ho chengse kihot lingsoh ding ahi. 30 Chutah le vanlaijola Mihem Chapa melchihna hung kilang ding; chule chutengtah le vannoi leiset phungtinin aom achup chup dingu ahi, chule vanlaijol’a Mihem chapa thu-neitah le loupi chung nung tah a mei chunga ahung amu dingu ahi. 31 Chule aman a-Vantilte sumkom gin nasatah toh asoldoh ding; chule amahon van-mong khat’a pat’a vanmong khat geiya kolkimvel li a kona alhenchomte alon khom dingu ahi.
