03/06/2023
Triangle of Sadness – ஒரு அரசியல் ஹேங்க் ஓவர்!
கார்ல் மாடலிங் துறையில் சாதிக்க விரும்புபவன். யாயா ஏற்கனவே மாடலிங் உலகில் பிரபல மாடலாக, இன்ப்ளூயன்ஸராக இருப்பவள். இருவருக்கும் இடையே காதல் இருந்தாலும் யாயா அளவிற்கு சம்பாதிக்க முடியவில்லை, அவளது உதவியில் வாழ வேண்டியிருக்கிறது என்ற தாழ்வு மனப்பான்மை கார்ல் மனதில்..
இந்நிலையில் பெரும் பணக்காரர்கள் செல்லும் சொகுசு Yacht ரக கப்பலில் அவர்களும் பயணிக்க வாய்ப்பு கிடைக்கிறது. அந்த கப்பலின் ஆடம்பரம், செல்வந்தர்களின் அலப்பறை முதல் பாதி. பின்னர் கடல் கொள்ளையர்கள் வீசிய கையெறி குண்டில் கப்பல் மூழ்கி மீதியுள்ளவர்கள் ஒரு ஐலேண்டில் கரை ஒதுங்குகிறார்கள். அங்கு நடக்கும் கதை மீதி.
Carl & Yaya, The Yacht, The Island என மூன்று சாப்ட்டர்களாக விரியும் கதை முதலாளித்துவத்தை தங்கு தடையின்றி ட்ரோல் செய்துள்ளது. அங்கங்கே கொஞ்சம் ரஷ்யாவையும், கம்யூனிசத்தையும் கூட.
Yacht உள்ளே செல்வந்தர்கள் வரும் முன்னே அங்குள்ள சிப்பந்திகள் பேசிக் கொண்டிருக்கும் காட்சியில், ‘வரும் பணக்காரர்களிடம் நோ என்ற வார்த்தையையே யாரும் சொல்லக்கூடாது’ என்று பேசிக் கொள்வதுடன் அவர்களிடம் இருந்து பணத்தை பெறுவதுதான் தங்களது அதி உன்னத கொள்கையாக பேசிக் கொள்வார்கள்.
அதற்கு ஏற்றார்போல ஒரு ரஷ்ய செல்வந்தரின் ஆசைக்காக எல்லா கப்பல் சிப்பந்திகளையும் கடலில் சர்ஃபிங் டைவ் அடிக்க செய்வார்கள். கப்பலின் கீழ் தளத்தில் எஞ்சின் வேலை பார்ப்பவன் உட்பட. இந்த செல்வந்தர்களில் உர ஆலை நடத்துபவர், கையெறி குண்டு உள்ளிட்ட ஆயுதங்களை தயாரித்து விற்கும் ஆயுத வியாபாரி என பலர் இருப்பார்கள். அந்த ஆயுத வியாபாரி தயாரித்து விற்ற குண்டை வீசிதான் கடல் கொள்ளையர்கள் அந்த கப்பலையே அளிப்பார்கள். இதெல்லாம் படத்தின் சிறந்த ட்ரோல் காட்சிகள்.
The Yacht சாப்ட்டரில் ஒரு வாந்தி காட்சி வரும். அருமையான மேக்கிங் அது கேப்டன் டின்னரில் கப்பல் பயங்கரமாக குலுங்க தொடங்க எல்லாம் ஆங்காங்கே வாந்தி எடுக்க தொடங்குவார்கள். கொஞ்ச நேரத்தில் கப்பலே வாந்தி மயமாகிவிடும். அவ்வளவு நேரமும் சுத்தம், ஆடம்பரம் என பேசிக் கொண்டிருந்தவர்கள் எல்லாம் கலீஜாகி போய் கிடப்பார்கள்.
கப்பல் விபத்திற்கு பின் தப்பித்த சில பணக்காரர்கள் மட்டும் ஐலேண்டில் தஞ்சமடைவார்கள். அதில் கப்பல் பணிப்பெண் ஒருத்தியும் உயிர் பிழைத்திருப்பாள். இந்த பணக்காரர்களுக்கு மீன்களை பிடிக்கவோ, நெருப்பு மூட்டவோ தெரியாது. ஆனால் அந்த பணிப்பெண்ணுக்கு தெரியும். இதனால் உணவுக்கு அவர்கள் இந்த பணிப்பெண்ணை நம்பி இருக்க வேண்டிய சூழல் ஏற்படும். இந்த இடத்திலிருந்து அதிகாரம் செல்வந்தர்களிடமிருந்து பணிப்பெண்ணுக்கு மாறும்.
அவள் தன் அதிகாரத்தை கொண்டு அவர்களை கட்டுப்படுத்துவது ஒரு தனி இன்பத்தை அவளுக்கு தருகிறது. கூட்டத்தில் அழகான இளம் வாலிபனான கார்ல் கூட ஒரு மீன் துண்டிற்காக அவளுக்கு சகல தேவைகளையும் பூர்த்தி செய்ய தயாராகிறான். தனது காதலி யாயாவின் முன்னரே அவளுக்கு அடிமை சேவகம் புரிகிறான். தன்னிடம் காசு இருக்கிறது என்ற மிதப்பில் பணியாளர்களை கடலில் சர்பிங் டைவ் அடிக்க சொன்னவர்கள், தற்போது தங்கள் உணவு, இருப்பிடத்திற்காக தங்களிடம் உள்ள உயர்ரக கடிகாரங்கள், நகைகளை கூட தர போட்டி போடுகிறார்கள்.
அதுவரை அந்த அதிகாரத்தை அனுபவித்திராத அந்த பணிப்பெண் தொடர்ந்து அந்த அதிகாரத்தை தக்க வைத்துக் கொள்ளவே நினைக்கிறாள். அவளை பொறுத்தவரை அவர்கள் அந்த தீவிலிருந்து தப்பிக்காமல் இருக்க வேண்டும். தொடர்ந்து இவர்கள் தனது அதிகாரத்தின் கீழ் தன் கட்டளைகளுக்கு கீழ்படிந்து இருக்க வேண்டும் என்பதே எண்ணம். அப்போது அவர்கள் இருக்கும் பகுதியிலிருந்து சிறிது தூரம் தாண்டி சென்றபோதுதான் தெரிகிறது. அந்த தீவே ஒரு சுற்றுலா தளம். அங்கு ஒரு ரெசார்ட் கூட இருக்கிறது. ஆனால் இதை கண்டறிந்தது யாயாவும், அந்த பணிப்பெண்ணும் மட்டும்தான்.
தனது அதிகாரத்தை இழக்க விரும்பாத பணிப்பெண் யாயாவை கொல்ல முயல்கிறாள். கொன்றாளா என்பதை காட்டாமலே கதை முடிகிறது. படம் முழுவதும் முதலாளித்துவத்தின் கோர முகத்தின் மீதான பகடிகள். போர் அடிக்காமல் நிறைய இடங்களில் வெடித்து சிரிக்கும் வகையில் அமைந்திருக்கிறது. அதிகாரம் என்ற ஒன்றின் மீதான போட்டி அதிகாரத்தை தொடர்ந்து கிடைக்கும் அடக்குமுறைக்கான வாய்ப்பு, அது தரும் போதை என ரொம்ப தியரிட்டிக்கலாக விவாதிக்கும் கான்செப்ட்டை ஒரு சலிக்காத படமாக எடுத்து கலக்கி இருக்கிறார்கள். அதிகாரத்தை எதிர்த்து போராடுபவர்களும் அதிகாரம் கிடைத்த பின் சர்வதிகாரியாய் மாறிவிடுவதுதானே நிசர்சனமாய் இருக்கிறது. இப்போதைய அரசியல் சூழலில் அதிகாரத்தை பிடிப்பது என்பதே கீழிருந்து மேல் வரை எல்லா தரப்பினரின் மோதலாக இருக்கிறது. ஆனால் எவர் மேலே வந்தாலும் தனக்கு கீழ் இருப்பவரை மிதிக்கவே செய்வார்.
The Yacht சாப்ட்டரில் வாந்தி எடுத்து எல்லாடும் டயர்ட் ஆகி கிடக்கும்போது அதிகமாக குடித்த உர வியாபாரி கேப்டனின் அறிவிப்பு மைக் மூலமாக கப்பல் மூழ்க போவதாக அறிவிக்க, அனைவரும் அலறி லைப் ஜாக்கெட் போட்டுக் கொண்டு உயிருக்கு பயந்து கிடப்பார்கள். ஆனால் உர வியாபாரியும், கப்பல் கேப்டனும் சேர்ந்து கொண்டு குடி போதையில் முதலாளித்துவம், கம்யூனிசம் குறித்து தீவிர விவாதம் பண்ணிக் கொண்டிருப்பார்கள். எல்லாம் எல்லாருக்கும் ஸ்பீக்கரில் கேட்டுக் கொண்டிருக்கும்.
அதுபோல கேப்டன் டின்னரில் எல்லாரும் வாந்தி எடுத்து அந்த இடத்தை விட்டு போய் விட, அதுவரை பகட்டாக நின்று கொண்டிருந்த கேப்டன் சட்டையை கழற்றி வீசிவிட்டு, உர வியாபாரியுடன் அமர்ந்து சீட்டாடிக் கொண்டிருப்பான். அப்போது உர வியாபாரி “அமெரிக்காவுல நான் கம்யூனிஸ்ட்.. ஆனா ரஷ்யாவுல கேப்பிட்டலிஸ்” என அரசியல் காமெடிகளை அவிழ்த்து விட பதிலுக்கு கேப்டனும் “நாம் தூக்கில் ஏற்றும் கடைசி கேப்பிட்டலிஸ்ட் இந்த தூக்கு கயிறை செய்த வியாபாரிதான்னு மார்க்ஸ் சொல்லிருக்காரு” என பதிலுக்கு பேச ஒரு சமயம் இரண்டு பேரிடமும் ஜோக், கருத்துகள் தீர்ந்து போக, போனில் தேடி எடுத்து ஒருவரை ஒருவர் அட்டாக் செய்து கொண்டிருப்பார்கள். மொத்த படத்தில் அந்த The Yacht சாப்ட்டர் எனக்கு மிகவும் பிடித்த ஒரு சாப்ட்டர்.
