Dil Ki Kalam Se

Dil Ki Kalam Se feelings on the paper

16/08/2024

Achcha hua maa main doctor nahin Bani
Teri God se utar kar duniya to dekhi
Per duniya itni Bhali nahin lagi
Jab tak tere Aanchal mein thi sab kuchh achcha tha
Aankhon mein ek Sapna tha doctor banne ka
Sabke dukh harne ka sabki taklifein dur karne ka
Day shift night shift kuch bhi ho
bus maksad tha sabke chehre per muskurahat bikherane ka
Sab ka ilaaj karke unke parijano ko Khush karne ka
Per maa, Aaj Kolkata ka yah haal dekhkar dar lagta hai
achcha hua main doctor nahin Bani
Agar doctor Banti to Shayad acchi beti acchi patni aur acchi maa nahin ban paati,
Kyunki meri jindagi ki kahani kisi night shift mein dafan Ho jaati..

16/08/2024

Aaj ka samaj kahan ja raha hai
vaigyanik Mangal grah per pahunch gye hain
asadhya se asadhya rogon ki davaiyan ban gyi hai
Vah sab kuchh ho raha hai jo pahle asambhav lagta tha
Per is badalte samaj mein kya betiyan suraksh*t Hain
R**e Shabd jab likhane mein itna dardnak hai to fir us beti ke dard ko bayan karna Kitna mushkil hoga
Hamara Bharat jis gati se aage badh Raha hai
Betiyon per hone wale atyachar bhi usi gati se badh rahe hain
Ab to balatkar ki koi umra Seema bhi nahin hai
3 sal ki bacchi bhi victim hai
Sochati Hun to ghinn aati hai ki yah samaj kahan ja raha hai
Hamen Chand bullet aur technology nahin chahiye
Ham betiyon ko apni Suraksha chahiye
Hai koi jawab ki Raat mein beti Ghar se bahar jaaye aur मां-बाप chain ki nind so paye
Nahin hai Na koi jawab
To fir is samaj ki basic need , ek beti ki Suraksha ko pahle pura karo, phir beti padhao Beti bachao ka Nara lagana.

16/08/2024

Aaj azadi ka din hai
Per kya hum sach mei Azad hai
31 saal ki doctor beti ki chitkar
Baar baar yah kah rhi hai ki
uski kya galti thi
Yahi ki wah Azad Bharat ki beti thi
Haan Azad to desh hua per
Bus desh Azad hua,
Logo ki Mansikta abhi bhi gulam hai
Gulam hai apni vaasna ki
Gulam hai apni haivaniyat ki
Ab batao jashn kis baat ka manaye
Jab beti hi suraksh*t ghar na aaye
Phir Tirange k aage sir kaise jhukaye
Aaj har beti ki yhi pukar hai
Wah baizzat ghar pahuch jaye
Yhi azadi ka sabse bada uphar hai..

12/04/2023

Kyu aurto ko Umra ke dayre mein bandhte hain log
Kya Khushiyon Ki Umra sirf 40 tak hi hoti
Kya Dadi Nani Ko Jeene Ka Hak Nahin Hota
Dadi Nani ko kyon kahaniyon tak hi simta Dete Hain Log
Kyon Ham Umra ke hisab se chale
Hamen bhi udane ka Hak hai, hamare pass bhi Pankh Hain
Hamen Umra ke dayre mein mat bandho ,
Ham bhi Azad Parinde Hain,
Aasmanon Mein udane Ka Shauk rakhte Hain,
40 45 ki Umra Hai To Kya ,
Har vah Kam Karne Ki Khwahish hai , Jiski Umra Seema nirdharit hai
Us Umra seema ko bhi pacharne ka ghamand rakhte Hain.
Arey!!arey!! abhi Ham Budhe Nahin hue hain
Chalo aaj,,,
Budhapa Shabd Ka Bhi Apne Jivan se Ham ant Karte Hain
Deepali rastogi

12/04/2023

Roj , Ham Apne Armaanon ka Katla Karte Hain,
unhen kya Fark padta hai, jo yah Har Waqt Karte Hain.
Mere Aansuon Ki majal Hai, Jo Bina ijaajat Bah Jaaye,
Aur ek vah hai jo, ashakon per najm likha Karte Hain.
Ek Waqt tha, Jab Meri Hansi se Unki Jindagi Roshan hoti thi,
Per Aaj vah Pal Hai, Jab Meri chikhon se unke Dil Mein Khushiyon ke Kamal Khila Karte Hain.
Arey !!Sharir ke nishanon Ko Dekhkar, Kyon saham Jaate Ho Raham dil walon,
Jab ruh per Har din vah ek naya Nishan Diya Karte Hain.
Vah Subah to Aaegi Jab Raat Ki Kalima Apne Sath Mere jakhmon ko le Jayegi
Us Nai Subah Ke Intezar Mein Har Raat Apne jakhmon ke sath hum so Jaaya karte Hain.
Deepali rastogi

25/11/2022

Sneh aur dular se pala,
Dil ka tukda kah sambhalah,
Hasna sikhaya, jeena sikhaya
Sahna bhi sikhaya,
Per maa sabse jaruri chhez bhul g*i,
Dahej k lobhiyo se ladna nhi sikhaya,
Tumne to seench kr is guldaste ko kisi anjaan ko de diya,
Kaise itna bada sauda kr liya ,
Is guldaste ki kimat sirf tumne jani,
Kiya tumne jiske hawale, ki usne manmaani,
Noch khasot kr likh di apne julm ki kahani,
Maa kya tumhe pata tha??? Kaisa ant hoga tumhari ladli ka,
Kash maa, sahne k sath hi ladna bhi sikhati,
To aj yun ek beti qurbaan nhi hoti.
Deepali

25/11/2022

Yah panktiyan Hamare Dil Ki Dastan kahti Hain,
Hamen Jo Rula Gaya Usey Hi Dil Ki Lagam deti Hain,
Yun To Hamari Jaan Koi Le Na Saka, per Jo Jaan Le Gaya, Usi per Jaan deti Hain,
Har Kissa apni Jindagi Ka Khuli Kitab karte Hain,
Daga Dene Wale Se Mohabbat behisaab Karte Hain,
Jindagi Fanaa Kar Di Bina ashk bahae hi,
Tumhare kadmon Ke Niche Hum Apni Jaan Karte Hain,
Na socha Ki Har Lamha Koi Mayassar(available) Nahin Hota,
Tanha Jindagi Ka Koi Paasbaan(protector) Nahi Hota,
Ab Apne dastane Dil Ki Kitab ko Viram Dete Hain,
Itni Mohabbat Karte Hain Tumse,
Ki Daga Dene Ka Bhi Na Tum per Ilzaam Dete Hain.
Deepali

25/11/2022

Khushiyon Ke gehre Sagar Mein Sada hi aapki Naiya Ho,
Us Sagar Mein Aapki Kashti ka Ishwar hi Swayam Khevaiyan Ho,
Janamdin ke Prishthon per bus Khilkhilati Kahani Ho,
Baar Baar Yah Din Aaye Jab Tak Sagar Mein Pani Ho.
Deepali

24/11/2022

SHANTI

Sab jante hai shanti sabse jyada ghar per milti hai,

Patni maayke chali jaye to pati ko shanti,

Pati office k tour se bahar jaye to patni ko shanti,

Mummy papa out of station ho to bachhon ko shanti,

Saas bahu mei khitpit na ho to ghar mei shanti,

Per in sab mei sabse badi shanti to tab milti hai jab,
khoobsurat si qyamat dhane wali shanti baai biwi k mayke jane k baad sahab se pooche...

Sahab chai k sath kya lenge...

Uffff us param shanti ka ehsaas to bus keval pati parmeshwar hi bata sakte hai...
Deepali

Ek choti si koshish soye hue zamir per dastak dene ki...
24/11/2022

Ek choti si koshish soye hue zamir per dastak dene ki...

Address

Bokaro Steel City

Website

Alerts

Be the first to know and let us send you an email when Dil Ki Kalam Se posts news and promotions. Your email address will not be used for any other purpose, and you can unsubscribe at any time.

Contact The Establishment

Send a message to Dil Ki Kalam Se:

Shortcuts

Share

Category