22/08/2025
⚫❗⚫
ll *ଆଜି ଶ୍ରୀମନ୍ଦିରକୁ ସାତପୁରୀ ତାଡ଼ ବିଜେ* ll
ଆସନ୍ତାକାଲି ଶ୍ରୀମନ୍ଦିରରେ ସପ୍ତପୁରୀ ଅମାବାସ୍ୟା ସେଥିପାଇଁ ଆଜି ଶ୍ରୀମନ୍ଦିରର ସ୍ଵତ୍ତ୍ୱଲିପି ଅନୁଯାୟୀ ଅଠରନଳା ସ୍ଥିତ ମା ଆଲାମଚଣ୍ଡୀ ମନ୍ଦିରରୁ ଶ୍ରୀମନ୍ଦିରକୁ ସପ୍ତପୁରୀ ଅମାବାସ୍ୟା ତାଡ଼ ବିଜେ କରାଯାଏ । ମଧ୍ୟାହ୍ନ ଧୂପ ସରିବା ପରେ କୁମ୍ଭକାରମାନେ ନୂତନ ବସ୍ତ୍ର ପରିଧାନ କରି ସାତପୁରି ଘେନାଣ ନିମନ୍ତେ ଶ୍ରୀମନ୍ଦିରରୁ ଘଣ୍ଟ ଛତା କାହାଳୀ ସହିତ ଅଠରନଳା ସ୍ଥିତ ଆଲାମଚଣ୍ଡୀ ମନ୍ଦିରକୁ ଯାଆନ୍ତି । ସେଠାରେ ପୂର୍ବରୁ କୁମ୍ଭକାର ସେବକଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ଚାରିଗୋଟି ତାଡ଼ ମାଙ୍କ ନିକଟରେ ରଖା ଯାଏ । କୁମ୍ଭକାର ନିଯୋଗ ର ଇଷ୍ଟଦେବୀ ମା ଅଲାମଚଣ୍ଡିଙ୍କୁ ଶୀତଳଭୋଗ ମଣୋହୀ କରାଯିବା ପରେ କୁମ୍ଭକାର ସେବକ ମାନେ ମାଙ୍କ ନିକଟରେ ଥିବା ଚାରିଗୋଟି ତାଡ଼କୁ ବନ୍ଦାପନା କରନ୍ତି । ବନ୍ଦାପନା ସମ୍ପନ୍ନ ହେବା ଉତାରେ ବିଜେ କାହାଳୀ ବାଜି ତାଡ଼ ଗୁଡିକ ଶ୍ରୀମନ୍ଦିରକୁ ବିଜେ ହୁଏ।ବଡ଼ଠାକୁର ବଳଭଦ୍ର , ମା ସୁଭଦ୍ରା ଏବଂ ମହାପ୍ରଭୁ ଜଗନ୍ନାଥଙ୍କ ନିମନ୍ତେ ଗୋଟିଏ ଲେଖାଏଁ ତାଡ଼ ସହ ଗୋଟିଏ ଅତିରିକ୍ତ ତାଡ଼ ଶ୍ରୀମନ୍ଦିରକୁ ବିଜେ ହୁଏ । କୁମ୍ଭକାର ସେବକ ମାନେ ମୁହଁରେ ବାଘତୁଣ୍ଡି ଭିଡି ତାଡ଼ ଗୁଡିକୁ ନେଇ ଶ୍ରୀମନ୍ଦିରକୁ ଆସନ୍ତି । ବେଢ଼ା ଏକ ଥର ବୁଲାଯିବା ପରେ ତାଡ଼ ରୋଷ ବେହରଣଠାରେ ରଖାଯାଏ । ସଂଧ୍ୟାଧୂପ ପରେ ଜଣେ ପୂଜାପଣ୍ଡା ଶ୍ରୀଅଙ୍ଗରୁ ଆଜ୍ଞାମାଳ ନେଇ ଘଣ୍ଟ, ଛତା, କାହାଳୀ ସହ ଦକ୍ଷିଣକାଳୀ ମନ୍ଦିରକୁ ଯାଆନ୍ତି । ଦକ୍ଷିଣକାଳୀଙ୍କ ସେବକ ତାଙ୍କଠାରୁ ଆଜ୍ଞାମାଳ ନେଇ ଶ୍ରୀମନ୍ଦିର ଆସି ସିଂହଦ୍ବାର ଦେଇ ରୋଷଦ୍ବାର ବାହାର ପାଶେ ଆଜ୍ଞାମାଳ ରୋଷଆଡ଼େ ଦେବେ । ଏହା ପରେ ଅନ୍ୟାନ୍ୟ ନୀତି ହେବ ।
*ବ୍ରହ୍ମୋଉବାଚ*
ତ୍ରୟୋଦଶ୍ୟାଂ ତିଥୌ ରାଜନ୍ନାଚାର୍ଯ୍ୟୋ ଜଗତାଂ ପତେଃ ।
ତୃତୀୟକାଳପୂଜାଂ ଚ କୁର୍ଯ୍ୟାତ୍ପରମଭକ୍ତିତଂ ।।୧ ।।
*ବ୍ରହ୍ମା କହିଲେ – ହେ ରାଜନ୍ ! ତ୍ରୟୋଦଶୀ ତିଥିରେ ଆଚାର୍ଯ୍ୟ ପ୍ରବର ଜଗନ୍ନାଥଙ୍କର ତୃତୀୟ କାଳର ପୁଜା ପରମଭକ୍ତି ସହକାରେ ସଂପାଦନ କରିବେ* ।
ତଦନ୍ତେ ଜଗଦୀଶାଙ୍ଗାଦାଜ୍ଞାମାଳାଂ ସୁମଞ୍ଜୁଳାମ୍ ।
ଘଣ୍ଟାନାଂ ମର୍ଦ୍ଦଳାନାଂ ଚ କାହାଳକାଂସ୍ୟତାଳୟୋଃ ।।୨ ।।
ନିଃସ୍ୱନେ ଜାୟମାନେଽଥ ଛତ୍ରଚାମରଜୃମ୍ଭଣେ ।
ମହୋତ୍ସବତୟା ତାଂ ତୁ ଗୃହୀତ୍ଵ କାଳିକାନ୍ତିକମ୍ ।।୩।।
*ତାହାପରେ ଜଗନ୍ନାଥଙ୍କ ଶ୍ରୀଅଙ୍ଗରୁ ସୁମଞ୍ଜୁଳ ଆଜ୍ଞାମାଳ ଆଣି ଘଣ୍ଟା, ମର୍ଦ୍ଦଳ, କାହାଳୀ, ଘଣ୍ଟଧ୍ୱନି ସହିତ ଛତ୍ର ଚାମର ଧରି ମହୋତ୍ସବ ମଧ୍ୟରେ ତାହାକୁ ନେଇ କାଳିକାଙ୍କ ନିକଟକୁ ଯିବ*।
ଗଚ୍ଛେତ୍ତତ୍ର ତଦା କାଳୀଂ ପ୍ରାର୍ଥୟେନ୍ନୃପସତ୍ତମ ।
କାଳରାତ୍ରି ନମସ୍ତୁଭ୍ୟଂ ସର୍ବବିଘ୍ନବିନାଶିନି ।I ୪ I।
*ହେ ନୃପ ! ସେଠାକୁ ଯାଇ କାଳୀଙ୍କୁ ପ୍ରାର୍ଥନା କରିବ । ହେ କାଳରାତ୍ରି ! ହେ ସକଳ ବିଶ୍ବର ବିନାଶକାରିଣି ! ତୁମ୍ଭଙ୍କୁ ନମସ୍କାର* ।
ତ୍ୱଂ ବିଷ୍ଣୁବଲ୍ଲଭା ନିତ୍ୟମାଜ୍ଞାଂ କୁରୁ ଜଗତ୍ପତେଃ ।
ପାକଶାଳାଂ ସମାଗଚ୍ଛ ଶ୍ରୀଘ୍ରମେବଂ ଶୁଭେଽଧୁନା ।।୫ ।।
*ତୁମ୍ଭେ ବିଷ୍ଣୁଙ୍କର ପ୍ରିୟପତ୍ନୀ ଅଟ । ଜଗନ୍ନାଥଙ୍କର ଏହି ଆଜ୍ଞାରେ ବର୍ତ୍ତମାନ ଶୁଭସମୟରେ ପାକଶାଳାକୁ ଶୀଘ୍ର ଆସିବା ହେଉ* ।
ଅମାବାସ୍ୟାଦନିଂ ପ୍ରାପ୍ୟ ନୈବେଦ୍ୟେ ବିଘ୍ନନାଶିନି ।
ତତ୍ପରା ଭବ ହେ ମାତ ନମସ୍ତୁଭ୍ୟଂ ସୁରେଶ୍ଵରି ।। ୬ ।।
*ହେ ବିଘ୍ନନାଶିନି ! ଅମାବାସ୍ୟା ଦିନ ନୈବେଦ୍ୟ ପ୍ରସ୍ତୁତି ନିମନ୍ତେ ତୁମ୍ଭେ ତତ୍ପର ହୁଅ । ହେ ସୁରେଶ୍ଵରି ! ହେ ମାତଃ ! ତୁମ୍ଭକୁ ପ୍ରଣିପାତ ଜଣାଉଛି* ।
ଇତ୍ୟୁଚାର୍ଯ୍ୟ ଚ ତାଂ ମାଳାଂ କାଳରାତ୍ରିଂ ସମର୍ପୟେତ୍।
ତସ୍ୟା ମାଳାଂ ସମାନୀୟ ପାକଶାଳାନ୍ତରେ ପୁନଃ।। ୭।।
*ଏହା କହି ଉକ୍ତ ଆଜ୍ଞାମାଳକୁ କାଳରାତ୍ରୀଙ୍କୁ ସମର୍ପଣ କରିବ। ତାହାପରେ ସେହି ମାଳାକୁ ଆଣି ପାକଶାଳା ମଧ୍ୟରେ କୌଣସି ଏକ ସୁନିଶ୍ଚିତ ସ୍ଥାନରେ ରଖିବ*।🙏❤️
