14/07/2026
ಲೈಫ್ ಕೊಟ್ಟ ವಾಹಿನಿಗೇ ಕೈಕೊಟ್ಟನಾ ಗಿಲ್ಲಿ?
ಪಾಪ ಗಿಲ್ಲಿ! ತುಂಬಾ ಒಳ್ಳೇ ಹುಡುಗ, ಅಮಾಯಕ, ಪ್ರತಿಭಾವಂತ… ತನ್ನಲ್ಲಿರುವ ಟ್ಯಾಲೆಂಟನ್ನು ಮಾತ್ರ ಬಳಸಿ ಬಿಗ್ ಬಾಸ್ ಶೋವನ್ನು ಗೆದ್ದವನು. ಆ ಮೂಲಕ ಅಗಣಿತ ಅಭಿಮಾನಿಗಳನ್ನು ಸಂಪಾದಿಸಿದವನು.... ಇದು ಗಿಲ್ಲಿ ಬಗ್ಗೆ ಇರುವ ಸಾರ್ವಜನಿಕ ಅಭಿಪ್ರಾಯ!
ಆದರೆ, ಇದೇ ಗಿಲ್ಲಿ ಸಿಕ್ಕಾಪಟ್ಟೆ ಲೆಕ್ಕಾಚಾರದ ಮನ್ಷ. ಯಾರೇ ಕರೆದರೂ ವಿಪರೀತ ಕಾಸು ಕೇಳುತ್ತಾನೆ. ಸಣ್ಣ ಪುಟ್ಟ ಕಾರ್ಯಕ್ರಮಕ್ಕೆ ಕಾಲಿಡೋಕೂ ದೊಡ್ಡ ಮಟ್ಟದ ಪೇಮೆಂಟು ಬಯಸುತ್ತಾನೆ ಎನ್ನುವ ಅಸಮಧಾನ ಒಳಗೊಳಗೇ ಹೊಗೆಯಾಡುತ್ತಿದೆ. ಮಾತಾಡೋರ ತಕರಾರು ಏನೇ ಇರಲಿ, ಗಿಲ್ಲಿ ಪಾಲಿಗೆ ಇದು ಕೊಯ್ಲಿನ ಕಾಲ. ಈಗಿರುವ ಕ್ರೇಜು, ಜನಪ್ರಿಯತೆಯನ್ನು ಬಳಸಿಕೊಂಡು ಲೈಫಲ್ಲಿ ಸೆಟಲ್ ಆಗಬೇಕು. ಅದನ್ನು ಆತ ಅಚ್ಚುಕಟ್ಟಾಗಿ ಪಾಲಿಸುತ್ತಿದ್ದಾನೆ. ಇವತ್ತಿಗೆ ರೀಲ್ಸಲ್ಲಿ ಕೋತಿ ತರಾ ಕುಣಿಯೋರು, ಕಮಂಗಿಗಳಂತೆ ಡೈಲಾಗ್ ಹೊಡೆಯೋರು, ವಿಕೃತರೆಲ್ಲಾ ಸೆಲೆಬ್ರಿಟಿ ಅಂತಾ ಮೆರೆಯುತ್ತಿದ್ದಾರೆ. ಸೋಷಿಯಲ್ ಮೀಡಿಯಾ ಇನ್ಫ್ಲ್ಯೂಯೆನ್ಸರ್ ಹೆಸರಲ್ಲಿ ವಕರು-ಪೆಕರುಗಳೆಲ್ಲಾ ಸಂಪಾದನೆಗಿಳಿದಿದ್ದಾರೆ. ಅಪಾರ ಜನಪ್ರಿಯತೆ ಪಡೆದಿರುವ, ಚತುರ ಗಿಲ್ಲಿನಟ ಕಾಸು ಕೇಳೋದೇನು ತಪ್ಪಲ್ಲ!
ಆದರೆ, ನಲ್ಲಿಮೂಳೆ ಗಿಲ್ಲಿನಟನಾಗಿದ್ದ ಹುಡುಗನನ್ನು ಬಿಗ್ ಬಾಸ್ ಕಾರ್ಯಕ್ರಮಕ್ಕೆ ಕರೆಸಿಕೊಂಡು ಈ ಮಟ್ಟಕ್ಕೆ ತಂದುನಿಲ್ಲಿಸಿದ ಕಲರ್ಸ್ ಕನ್ನಡ ಚಾನೆಲ್ಲಿಗೇ ಕೈ ಕೊಟ್ಟಿದ್ದಾನಂತೆ. ಬಿಗ್ ಬಾಸ್ ಗೆದ್ದಮೇಲೆ ಕಲರ್ಸ್ ಆರಂಭಿಸಿದ ಕ್ವಾಟ್ಲೆ ಕಿಚನ್ ಕಾರ್ಯಕ್ರಮಕ್ಕೆ ಬರಲು ಗಿಲ್ಲಿ ಹಿಂದೇಟು ಹಾಕಿಬಿಟ್ಟನಂತೆ. ಒಂದು ಸಲ ಗೆದ್ದಮೇಲೆ ಅದೇ ವಾಹಿನಿಗೆ ಹೋಗಿ ಕೂರೋದು ಸರಿಯಲ್ಲ ಎನ್ನುವುದು ಗಿಲ್ಲಿ ಮನಸ್ಥಿತಿಯಂತೆ. ಸದ್ಯ ಕಲರ್ಸ್ ಕನ್ನಡದ ಹೆಡ್ ಪ್ರಕಾಶ್ಗೆ ಬಹುಶಃ ಇದರಿಂದ ಸಂಕಷ್ಟ ಎದುರಾಗಿದೆ. ಹೇಳಿಕೇಳಿ ಕಾರ್ಪೊರೇಟ್ ಸಂಸ್ಥೆ ಅದು. ಬಾಂಬೆಯಲ್ಲಿ ಕೂತಿರುವ ಮೇಲಿನವರು ʻʻಅಲ್ರೀ… ನಮ್ಮ ಕಾರ್ಯಕ್ರಮದಿಂದ ಆ ಹುಡುಗ ವಿಶ್ವವಿಖ್ಯಾತಿ ಪಡೆದಿದ್ದಾನೆ. ಅವನನ್ನು ಕರೆಸಿ ಕೂರಿಸಿಕೊಳ್ಳುವಷ್ಟು ತಾಕತ್ತಿಲ್ಲವಾ ನಿಮಗೆʼʼ ಅಂತಾ ಗದರೋದು ಸಹಜ. ಆದರೆ, ವಾಸ್ತವ ಸ್ಥಿತಿ ಬೇರೆಯದ್ದೇ ಇರುತ್ತೆ.
ವಾಹಿನಿಯ ಮುಖ್ಯಸ್ಥರು ಅತ್ತ ಬಾಂಬೆ ಬಾಸ್ಗಳ ಒತ್ತಡಕ್ಕೂ ಮಣಿಯಬೇಕು, ಇತ್ತ ತಾವೇ ಬೆಳೆಸಿದ ಹುಡುಗನ ತಟಸ್ಥ ನಿಲುವನ್ನೂ ನಿಭಾಯಿಸಬೇಕು. ವಾಹಿನಿಯ ಆಫರ್ಗಿಂತಲೂ ಗಿಲ್ಲಿಗೆ ಹೊರಗಿನಿಂದ ಬರುತ್ತಿರುವ ಆಫರ್ಗಳು ಮತ್ತು ದೊಡ್ಡ ಮೊತ್ತದ ಸಂಭಾವನೆಗಳು ಆಕರ್ಷಕವಾಗಿ ಕಾಣುತ್ತಿರುವುದು ಸುಳ್ಳಲ್ಲ. ಆದರೆ, ಕಲರ್ಸ್ ಕನ್ನಡದೊಂದಿಗಿನ ಈ ಮುನಿಸು ಅಥವಾ ಅಂತರ ಗಿಲ್ಲಿಯ ಮುಂದಿನ ವೃತ್ತಿಬದುಕಿನ ಮೇಲೆ ಯಾವ ರೀತಿಯ ಪರಿಣಾಮ ಬೀರಬಹುದು ಎನ್ನುವುದೇ ಸದ್ಯದ ಕುತೂಹಲ.
ಒಂದು ಕಡೆ, ತನಗೆ ಲೈಫ್ ಕೊಟ್ಟ ವಾಹಿನಿಗೆ ಕೃತಜ್ಞತೆ ಸಲ್ಲಿಸಬೇಕು ಎನ್ನುವುದು ಇಂಡಸ್ಟ್ರಿಯ ಅಲಿಖಿತ ನಿಯಮವಾದರೆ, ಇನ್ನೊಂದೆಡೆ ಕ್ರೇಜ್ ಇರುವಾಗಲೇ ನಾಲ್ಕು ಕಾಸು ಮಾಡಿಕೊಳ್ಳಬೇಕು ಎನ್ನುವುದು ಗಿಲ್ಲಿಯ ಪ್ರಾಯೋಗಿಕ ಲೆಕ್ಕಾಚಾರ. ಸದ್ಯ ಈ ಇಬ್ಬರ ನಡುವಿನ ಶೀತಲ ಸಮರ ಹೀಗೆಯೇ ಮುಂದುವರಿದಿದೆ. ಏನೇ ಇರಲಿ, ಕಷ್ಟಪಟ್ಟು ಮೇಲೆ ಬಂದ ಈ 'ಗಿಲ್ಲಿ'ಯ ಹಾರಾಟ ಎಲ್ಲಿಯವರೆಗೆ ಹೋಗಿ ತಲುಪುತ್ತದೆ ಮತ್ತು ಕಾರ್ಪೊರೇಟ್ ಲೆಕ್ಕಾಚಾರಗಳ ನಡುವೆ ಆತ ತನ್ನ ಜನಪ್ರಿಯತೆಯನ್ನು ಹೇಗೆ ಉಳಿಸಿಕೊಳ್ಳುತ್ತಾನೆ ಎಂಬುದನ್ನು ಕಾದು ನೋಡಬೇಕಿದೆ.
-ಅರುಣ್ ಜಿ
