04/12/2024
Me'Gong Festival, Tura, Meghalaya-a Europe perform ka chhim ve avanga kan group puipate te leh member dang ten report pe tura min tih avangin inthlahrung deuhvin aw.
Ni 30 (nizan) khan Europe hian performance an nei.
Tlai dar 5:00 a ṭan tura tih a ni, Restless Desire, Shanka Tribe leh Indus Creed te open tura tih an ni a, Restless Desire hi an in lan lo.
Dar 5:00 ah kan lut fel a, Indus Creed hian sound check an lo nei mek a, darkar khat aia tam fe sound check nan hun an han hmang hem mai chu a ninawm duh hle!
Shanka Tribe ten Dar 7:00 bawrah bul a rawn ṭan a, Indie/fusion band an ni a, an thiam hle. Mahse Europe ringawt rilrua a lan avangin kan bu ngheuh ngheuh peih ṭawk a ni.😀
Indus Creed in hun an rawn hmang zui, "Rock And Roll Renegade" in bul an rawn ṭana, hla paruk (?) vel rawn neiin an hun chu an hla hit "Top Of The Rock" ngei maiin an khar, an sound check kan nin tehlul nen, a performance erawh a ṭha hle a, mipui pawh an rawn chawk phur thawkhat hle. An la ṭha thlawt, original member erawh pathum chauh an ni tawh.
A dar zat ka chiang ta lo. A hun a thleng ta, crew ten stage ah ṭul neuh neuh leh sound check tenau an rawn nei (Sound check pangngai hi chu tlai lamah an nei tawh). Chutah le! Stage a rawn thim ruih a, a rawn ri ruai ruai a, kan thaw dep dep a ni ber mai.
Tunge stage rawn lut hmasa ber pawh ka hre ta lo. Drums a rawn in tlir pawp pawp a a, a thum dup dup a, an hla azawnga ṭang leh rang ber pawl leh ka hla duh em em ni bawk "On Broken Wings" in bul an rawn ṭan nghal pawp mai. Chutah le! Joey Tempest in a mic stand var ngei mai a rawn lek chhuakin a rawn zai chhunzawm nghal!Mipui kan sahawk a, khawdang kan hawi tawh lo, kan zuanga, kan lama, hun ropui chu a in ṭan tak tak ta!!
Khatiang em em a stage lian, light and sound turu, halmawi chitinreng chawhpawlh hnuaiah khan an zai khat ve tawh khawp ang le?! An phur a, a bikin Joey Tempest a che na hle, a hmuna en ngat chuan a vanglai aw aia a chawihna awm pawh ka hre lo hial a ni.
Ah hla hlui lar tak tak leh an hla thar an rawn in sak chhawk a; "Superstitious" hla an rawn her danglam kuala, a karah minute nga (?) vel lai "No Women No Cry" (Bob Marley) rawn zepin mipui min zai tir dualh dualh mai, an band introduction thiam takin a rawn pe chhunzawm bawk, a va nuam em, mipui hun a pek rei ber ṭum ni hialin ka hria!!
A laihawlah "Rock The Night" rawn sa in, mipui min zai tir nasa leh hle bawk a, min va chawk hlim thiam tehlul em!!
Stage ah hian ramp sei pui an siama, Joey Tempest a rawn phei deuh reng, kan hmu hnai ṭhin hle, ṭum khat phei chu mipui min rawn chibai hial, kan awm lohna lam a ni hlauh, a pawi vawng vawng😢😀
A tawp dawn ta.
Stage an chhuahsan, an rawn let leh mai dawn emaw kan tih laiin an reh ta vang vang; lighting chiangkuan loh vang a lo ni, nghakhlel takin kan thlir.
Chutah le! Stage thim paw ruih karah John Norum-a guitar ri ṭeng mum nalh lutuk maia bul rawn ṭanin, an hla hit "Cherokee" an rawn thlawh. Chhunzawm zelin.."chi chi chiu chiu..." a rawn ti ta, mipui kan au dur dur mai, John Leven-a'n "chu tuk duk...tung dung dung chhuaih..." tia a khuang rawn tlirin "The Final Countdown" ngei mai an rawn thlawh ta!! Mipui kan zuanga, kan lama, kan aua, kan fawn vel kha a ni ber mai, a va han nuam tak em, lights mai bakah halmawi, halpuah, halphuh zawng zawng nen van lam thlengin a eng, zuaih zuaih mai! Tichuan a vawrtawp min thlenpui ta!!
Lawmthu te sawiin inkuangkuah kuala mipui hmaa zahna chibai buka an rawn kun rual hnu in dawhsan ata min chhuahsan ta, mipui ten "Once more..." tia kan auh luih luih pawhin let zai an rel ta si lo, rilrua hmangṭha chung leh, hmuh leh ni an awm angem le?...ti rilru chungin, ka ṭhiannu nen chhuahna lam panin kan in kai chhuak ve ta a.
P.S. Europe hi an vanglai tak 1988 khan Mumbai ah Final Countdown Tour concert an rawn nei tawh a, hetah hian Rock Machine , tuna Indus Creed ni ta hian an open a, k*m 35 hnu, tun k*m 2024 India a an rawn zai leh hian Indus Creed bawk hian an lo open sak leh a ni!
Tin, he event hi Meghalaya Tourism Department hmalakna, a bik takin an CM Conrad Sangma hmalakna a ni. Joey Tempest pawhin stage ah amah hi ko chhuakin Pu Sangma hian Joey Tempest hi thilpek a pe. Joey Tempest hi a lawm thiam hle a, Meghalaya CM a kohchhuah danah pawh a ṭawngkam aṭangin dahhniam lo hle tih a hriat a; ropui takin a ko chhuak a, a kuah a, a fak a, a chal ah a fawp hial a ni, Joey Tempest hi he show hautak tur zia hre lo rual a ni lo!
Mi tamtakin an sawi fo ṭhin "Rualawh a na e" an tih ṭhin hi kan belh ve leh hram teh ang. Ka lawm e.
